Gikan sa Malamposong mga Estudyante Ngadto sa Malamposong mga Misyonaryo

“DILI pa gihapon ako makatuo nga nabatonan namo kining pribilehiyoa!” mipatugbaw si Will, nga naghisgot sa pagbansay nga bag-o pa lang natapos niya ug sa iyang asawa, si Patsy, ingong mga estudyante sa ika-103 nga klase sa Watchtower Bible School of Gilead. Miuyon si Zahid ug Jeni. “Gibati namong pinaboran nga ania dinhi,” sila miingon. Ang tanang estudyante makugihong nagtuon diha sa tunghaan. Karon sila naghinamhinam sa pagsugod sa ilang karera ingong mga misyonaryo. Apan una pa niana, sa programa sa graduwasyon niadtong Septiyembre 6, 1997, nakadawat sila ug mahigugmaong tambag nga motabang kanila nga molampos sa ilang misyonaryong mga asaynment.

Ang tsirman sa programa mao si Theodore Jaracz, usa ka membro sa Nagamandong Lawas. Iyang gipunting nga​—duyog sa pamilyang Bethel ug sa mga hawas sa 48 ka sangang buhatan sa Watch Tower Society​—ang mga higala ug mga paryente gikan sa Canada, Puerto Rico, Tinipong Bansa, ug sa Uropa mitambong aron pasaligan ang mga estudyante sa ilang pagpaluyo ug sa ilang gugma. Si Brader Jaracz miingon nga ang mga misyonaryo nga gipadala sa mga iglesya sa Kakristiyanohan kasagarang nalinga gikan sa misyonaryong buluhaton ug nagsugod sa pagpangagpas sa akademikong mga paningkamot o nagumon pa gani sa politika. Sa kasukwahi, ang mga graduwado sa Gilead mihimo kon unsay gibansay kanila nga buhaton. Ilang gitudloan ang mga tawo sa Bibliya.

Si Robert Butler gikan sa opisina sa Sosyedad sa Brooklyn nianang tungora namulong bahin sa tema nga “Himoang Malamposon ang Imong Dalan.” Iyang gisaysay nga samtang ang mga tawo nagsukod sa kalamposan pinaagig pinansiyal o ubang personal nga ganansiya, ang hinungdanon gayod maoy kon sa unsang paagi gisukod sa Diyos ang kalamposan. Ang ministeryo ni Jesus malamposon, dili tungod kay daghan kaayo siyag nakabig, kondili tungod kay siya matinumanon sa iyang asaynment. Gihimaya ni Jesus si Jehova, ug nagpabilin siyang wala mabulingi sa kalibotan. (Juan 16:​33; 17:4) Kini maoy mga butang nga mahimo sa matag Kristohanon.

“Mahimong mga Ulipon sa Tanang Tawo,” mitambag si Robert Pevy, kanhing misyonaryo sa Silangan. Si apostol Pablo maoy malamposong misyonaryo. Unsay iyang sekreto? Gihimo niya ang iyang kaugalingon nga ulipon sa tanan. (1 Corinto 9:​19-23) Ang mamumulong misaysay: “Ang usa ka graduwado sa Gilead nga adunay ingong tinamdan dili maglantaw sa misyonaryong pag-alagad ingong matang sa pag-asenso sa karera, usa ka tikanganan sa labi pang hinungdanong mga posisyon diha sa organisasyon. Ang usa ka misyonaryo moadto sa iyang asaynment nga adunay usa lamang ka motibo​—pag-alagad, tungod kay mao kanay buhaton sa mga ulipon.”

Nga pangunang gipasikad ang iyang tambag sa 2 Corinto mga kapitulo 3 ug 4, si Gerrit Lösch sa Nagamandong Lawas nagtambag sa mga estudyante nga “Isumbalik-Silaw Samag mga Salamin ang Himaya ni Jehova.” Gipahinumdoman niya sila nga ang kahibalo sa Diyos sama ra sa kahayag nga nagdan-ag sa usa ka Kristohanon sa dihang buksan niya ang iyang kasingkasing sa pagdawat niana. Atong gisumbalik-silaw kanang maong kahayag pinaagi sa pagsangyaw sa maayong balita ug pinaagi sa paghupot ug maayong panggawi. “Usahay mobati tingali kitang dili-takos,” siya miingon. “Sa dihang ang maong mga pagbati motungha, salig kang Jehova, ‘aron ang gahom nga labaw sa kasarangan mamahimong iya sa Diyos.’” (2 Corinto 4:7) Nagsubli sa mga pulong ni Pablo nga natala sa 2 Corinto 4:​1, si Brader Lösch mihangyo sa mga estudyante: “Ayaw pagbiya sa inyong misyonaryong asaynment. Pasinawa kanunay ang inyong salamin!”

Si Karl Adams, usa ka membro sa pakultad sa Gilead, namulong bahin sa makaiikag nga tema nga “Hain si Jehova?” Ang pangutana nagtumong, dili sa nahimutangan ni Jehova sa uniberso, kondili sa panginahanglan nga konsiderahon ang panglantaw ni Jehova ug ang mga timailhan sa iyang pagtultol. “Ilalom sa kapit-os,” siya miingon, “bisan ang usa ka tawo nga adunay taas nga rekord sa pag-alagad kang Jehova mahimong malimot niana.” (Job 35:10) Komosta sa atong modernong adlaw? Niadtong 1942, ang katawhan sa Diyos nanginahanglan ug giya. Matapos na ba ang buluhatong pagsangyaw, o duna pa bay dugang buluhaton nga himoon? Unsa ang kabubut-on ni Jehova alang sa iyang katawhan? Samtang nagtuon sila sa Pulong sa Diyos, ang tubag nahimong tin-aw. “Sa wala pa matapos ang tuig,” si Brader Adams miingon, “ang mga plano nahimo na alang sa Watchtower Bible School of Gilead.” Si Jehova nagapanalangin gayod sa buluhaton sa mga misyonaryo nga gipadala sa maong tunghaan.

Si Mark Noumair mao ang ikaduhang instruktor nga namulong. Sa iyang pakigpulong, nga nag-ulohang “Sa Unsang Paagi Gamiton Nimo ang Imong Talento?,” gidasig niya ang mga estudyante nga ipadapat ang pagbansay nga ilang nadawat sa Gilead inig-abot gayod nila sa ilang bag-ong mga asaynment. “Paningkamot nga maikag sa uban,” siya miingon. “Malangkit ka kanila. Magmaikagon sa pagkat-on sa ilang mga kostumbre, kasaysayan, mga butang kahimut-anan sa maong nasod. Kon dali ra nimong makat-onan ang pinulongan, mas makapasibo ka sa imong asaynment.”

Masibotong mga Estudyante Nakakaplag ug Kalipay Diha sa Ministeryo

Dugang pa sa pagkugi sa ilang pagtuon samtang diha sa Gilead, ang mga estudyante giasayn sa 11 ka lokal nga mga kongregasyon. Sa mga hinapos sa semana, masiboton silang nakig-ambit sa kalihokan sa pagsangyaw. Si Wallace Liverance sa pakultad sa Gilead nagdapit ug ubay-ubay kanila nga makig-ambit sa pipila nila ka kasinatian uban sa mamiminaw. Ang ilang kangaya nadayag samtang giasoy nila ang ilang nasinati samtang nagsangyaw sa mga shopping mall, sa mga parkingan, sa mga teritoryong negosyohan, sa dalan, ug gikan sa balay ngadto sa balay. Ang pipila kanila nangitag mga paagi sa pag-abot sa langyawg-pinulongan nga mga tawo nga nagpuyo ug nagtrabaho sa teritoryo sa ilang kongregasyon. Labing menos napulo ka panagtuon sa Bibliya sa balay ang gisugdan ug gidumala sa mga membro sa ika-103 nga klase sulod sa lima ka bulan nilang pagbansay.

Dugay Nang mga Misyonaryo Mipaambit sa Ilang mga Sekreto sa Kalamposan

Human niining makalingaw nga bahin sa programa, si Patrick Lafranca ug William Van de Wall midapit sa pito ka membro sa Komite sa Sanga sa paglaraw sa mga leksiyon nga ilang nakat-onan sa ilang misyonaryong mga karera alang sa kaayohan sa klase. Ilang gitambagan ang mga graduwado nga isipon ang ilang misyonaryong asaynment nga naggikan kang Jehova ug magmadeterminado sa pagpabilin sa asaynment. Ilang gihisgotan ang positibong mga epekto nga nabatonan sa gibansay sa Gilead nga mga misyonaryo diha sa buluhaton sa ubang kayutaan.

Unsay nakatabang niining mga membro sa Komite sa Sanga nga mag-alagad sulod sa mga dekada ingong malipayon, mabungahong mga misyonaryo? Sila suod nga nagtrabaho uban sa lokal nga mga igsoon ug nakakat-on gikan kanila. Nagkugi sila sa pagtuon sa pinulongan sa pag-abot gayod nila sa ilang mga asaynment. Ilang nakat-onan ang pagkamapaayon-ayonon ug sa pagpasibo sa lokal nga mga kostumbre. Si Charles Eisenhower, usa ka graduwado sa unang klase sa Gilead ug usa ka misyonaryo sulod sa 54 ka tuig, mipaambit ug lima ka “mga sekreto” nga nakat-onan sa malamposong mga misyonaryo: (1) Tun-i nga regular ang Bibliya, (2) tun-i ang pinulongan, (3) magmaaktibo diha sa ministeryo, (4) paningkamot alang sa kalinaw diha sa puy-anan sa misyonaryo, ug (5) pag-ampo nga regular kang Jehova. Ang mga estudyante nakadayeg dili lamang sa praktikal nga tambag nga ilang nadawat kondili sa dayag nga kangaya nga nabatonan niining eksperyensiyadong mga misyonaryo diha sa pag-alagad kang Jehova. Sumala sa pagkapahayag niana ni Armando ug Lupe, “sila malipayon sa dihang naghisgot sila mahitungod sa ilang mga kinabuhi.”

Human sa mga interbiyo, may usa pa ka diskurso. Si Albert Schroeder, usa ka membro sa Nagamandong Lawas, mipili ingong iyang tema sa “Matinumanong Pagdumala sa Pulong sa Diyos Magpadayag sa Bililhong mga Mutya sa Kamatuoran.” Sanglit ang Bibliya mao ang pangunang teksbok sa Gilead School, ang mga estudyante interesado sa kon unsay iyang isulti. Gipunting ni Brader Schroeder nga sa dihang ang paghubad sa New World Translation of the Holy Scriptures gisugdan 50 ka tuig kanhi, ang dinihogang mga membro sa New World Bible Translation Committee wala magtinguha sa pag-uyon sa mga tawo kondili nagsalig sa giya sa balaang espiritu. (Jeremias 17:​5-8) Apan, ning bag-o pa ang pipila ka awtoridad nag-ila sa taas nga sukdanan nga gipahiluna sa New World Translation. Sa usa ka sulat ngadto sa Sosyedad, usa ka eskolar misulat: “Mailhan nako ang de-kalidad nga publikasyon kon makakita ako niana, ug ang inyong ‘New World Bible Translation Committee’ nakahimog maayo kaayong hubad.”

Human niining pakigpulonga, ang mga estudyante nakadawat sa ilang mga diploma, ug ang ilang mga asaynment gipahibalo sa mamiminaw. Makapatandog kadto nga yugto alang sa mga membro sa klase. Samtang ang usa ka hawas sa klase nagbasa sa sulat sa apresasyon, natandog ang galamhan sa daghan ug dihay mga luha sa ilang mga mata. Ang pipila sa mga estudyante nangandam alang sa misyonaryong buluhaton sulod sa katuigan. Sa pagkaamgo nga ang kurso sa Gilead himoon sa Ingles, pipila ang mibalhin sa nagsultig-Ingles nga mga kongregasyon aron moarang-arang ang ilang pagsultig Ingles. Ang uban mibalhin diin dihay mas dakong panginahanglan sa mga payunir, sa ila kahang kaugalingong nasod o sa lain. Ang uban pa nangandam pinaagi sa pagbasa ug mga kasinatian, pagpanukiduki, o pagsublisublig tan-aw sa videocassette sa Sosyedad nga To the Ends of the Earth.

Si Will ug Patsy, nga gihisgotan sa sinugdanan, natandog pag-ayo sa personal nga interes nga gipakita ngadto sa mga estudyante. “Ang mga tawo nga wala gani makaila kanamo migakos kanamo ug nagletrato kanamo. Usa ka membro sa Nagamandong Lawas milamano sa among kamot ug miingon, ‘Gikalipay namo kamo!’” Sa walay duhaduha, ang mga estudyante sa ika-103 nga klase gimahal pag-ayo. Sila gibansay pag-ayo. Ang instruksiyon nga nadawat nila sa Gilead magtugot kanila sa paghimo sa kausaban gikan sa malamposong mga estudyante ngadto sa malamposong mga misyonaryo.

[Kahon sa panid 22]

Estadistika sa Klase

Gidaghanon sa mga nasod nga gihawasan: 9

Gidaghanon sa mga nasod nga giasaynan: 18

Gidaghanon sa mga estudyante: 48

Gidaghanon sa mga magtiayon: 24

Aberids nga edad: 33

Aberids nga katuigan diha sa kamatuoran: 16

Aberids nga katuigan diha sa bug-os-panahong ministeryo: 12

[Hulagway sa panid 23]

Ika-103 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa luyo, ug ang mga ngalan gilista gikan sa wala ngadto sa tuo sa matag laray.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Hulagway sa panid 24]

Hain kami padulong?