Migraduwar nga mga Estudyante sa Pulong sa Diyos
SA PAGSUNDOG sa unang siglong mga Kristohanon, ang mga Saksi ni Jehova nailhan sa tibuok-yuta sa ilang pultahan-ug-pultahang pagsangyaw. Kining buluhatona gipasiugda sa pangbukas nga pahayag sa graduwasyon sa ika-102 nga klase sa Watchtower Bible School of Gilead.
Sa Marso 1, 1997, si Albert Schroeder, usa ka membro sa Nagamandong Lawas sa mga Saksi ni Jehova, nagpunting sa dili pa dugayng artikulo sa mantalaang Pranses nga Le Point. Kini naghisgot sa mga plano sa Romano Katoliko sa pagsugod sa balay-ug-balay nga pagsangyaw sa Italya. “Aron nga [ang mga misyonaryo sa Batikano] dili moabot nga walay mahimo samtang sila makigbahin sa teritoryo sa mga Saksi ni Jehova,” nag-ingon ang artikulo, “ang Batikano naghikay pa gani sa pagpatik ug milyonmilyong kopya sa Ebanghelyo ni San Marcos, samtang atubangon sa ilang mga emisaryo ang mga eksperto [mga Saksi] diha sa pultahan-ug-pultahang ‘pagpahimutang’ sa maayong pulong.”
Ang 48 ka graduwado maoy lakip niadtong kinsa nagasundog sa ekspertong mga paagi sa pagsangyaw ni Jesus sa pagpakaylap sa Pulong sa Diyos. Sila gikan sa walo ka kayutaan nga nangabot sa Watchtower Educational Center sa Patterson, New York. Sulod sa lima ka bulan sa ilang pagtungha, gitun-an nila ang Bibliya gikan sa hapin ngadto sa hapin. Ang ilang kurso naglakip usab sa kasaysayan sa organisasyon sa Diyos, praktikal nga mga bahin sa misyonaryong kinabuhi, ug mga bunga sa espiritu sa Diyos. Kining tanan uban sa usa ka tumong sa hunahuna—sa pag-andam kanila alang sa langyawng misyonaryong pag-alagad sa 17 ka kayutaan nga niana sila ipadala. Samtang sila migraduwar, ang internasyonal nga mamiminaw nga 5,015 nakigbahin sa kalipay sa okasyon. Unsang kataposang tambag ang nadawat niadtong mga estudyante sa Gilead?
Tukma sa Panahong Pagdasig Alang sa Bag-ong mga Misyonaryo
Human sa pangbukas nga pahayag sa tsirman, si Ralph Walls, usa ka luyoluyo sa Personnel Committee sa Nagamandong Lawas, mihatag sa unang mubong pakigpulong uban ang praktikal nga tambag alang sa bag-ong mga misyonaryo. Ang iyang tema maoy “Hinumdomi ang Paghigugma.” Gipasiugda niya kon sa unsang paagi ang Bibliya, sa 2 Timoteo kapitulo 3, nagtagna nga ang kalibotan mag-uswag sa pagkawalay-gugma. Iyang gitanyag kining tukma sa panahong pahinumdom ngadto sa bag-ong mga misyonaryo, nga uyon sa kahubitan sa gugma nga makita sa 1 Corinto 13:1-7: “Kamo, ingong mga misyonaryo, mahimong malabwan ninyo ang inyong kuta sa oras. Kamo tingali nakabaton sa dagayang kahibalo tungod sa inyong pagbansay sa Gilead. O tingali kita masibotong mag-obertaym sa atong mga buluhaton sa sanga. Apan ang tanan natong mga paningkamot ug mga pagsakripisyo mawalay kapuslanan kon mahikalimot kita sa paghigugma.”
Ang ikaduha sa programa mao si Carey Barber, sa Nagamandong Lawas, nga nagtagad sa ulohang “Si Jehova Nag-agak Kanato sa Kadaogan.” Gikan sa ilang gamayng pagsugod human sa Gubat sa Kalibotan I, giagak ni Jehova nga Diyos ang iyang matinumanong mga alagad ngadto sa kadaogan sa pagmantala sa maayong balita sa iyang Gingharian, luyo sa paglutos. Niadtong 1931 ang mga Estudyante sa Bibliya, ingon sa pag-ila kanila niadto, misagop sa ngalang mga Saksi ni Jehova, sa panglipaghong sa mga klero sa Kakristiyanohan. “Ang ika-102 nga klase sa gibansay sa Gilead nga mga misyonaryo karon adunay dakong pribilehiyo sa pagpakigbahin ug dako sa mahimayaong buluhaton sa paghatag kutob sa mahimo ug kahigayonan sa pagkakat-on nianang sagradong ngalan,” nag-ingon si Brader Barber. Sila miduyog sa hataas nga listahan sa 7,131 nga misyonaryo nga gibansay sa Tunghaang Gilead ug nakatabang sa pagpaabot sa pagsangyaw sa Pulong sa Diyos gikan sa 54 ka kayutaan niadtong 1943 ngadto sa 233 ka kayutaan karong adlawa.
Ang sunod nga mamumulong, si Lloyd Barry, usab sa Nagamandong Lawas, maoy graduwado sa ika-11 nga klase sa Gilead ug nag-alagad ingong misyonaryo sa Hapon sa kapin ug 25 ka tuig. Siya naghatag ug pagdasig sa iyang temang, “Pabilin Niining mga Butanga.” “Ang dako ninyong kalipay makaplagan sa inyong paglahutay,” iyang gisultihan ang mga estudyante. Unsang mga ganti ang moabot sa paglahutay sa misyonaryong buluhaton o sa bisan unsang teokratikanhong asaynment? “Labaw sa tanan, ang atong paglahutay magpalipay sa kasingkasing ni Jehova . . . Adunay tugob nga katagbawan nga makaplagan sa paghupot sa pagkamaunongon ilalom sa pagsulay . . . Himoa ang misyonaryong pag-alagad nga inyong karera sa kinabuhi . . . Ang inyong ganti mao unya ang makapalipay sa kasingkasing nga ‘maayong pagkabuhat.’” (Mateo 25:21; Proverbio 27:11) Sa pagtapos sa iyang pahayag, kinasingkasing nga girekomendar ni Brader Barry nga ang bag-ong mga misyonaryo ‘magpabilin niining mga butanga’ pinaagi sa pagkahimong determinado nga ang misyonaryong natad mahimong ilang kinabuhi mismo.—1 Timoteo 4:16.
“Unsay Imong Makita?” mao ang pangutana nga gibangon ni Karl Adams, nga may bahin sa pagtudlo sa daghang klase sa Gilead. Iyang gipasiugda nga ang makita sa bag-ong mga misyonaryo sa ilang mga asaynment mag-agad dili lamang sa ilang pisikal nga mata kondili usab sa mga mata sa ilang kasingkasing. (Efeso 1:18) Kini giilustrar sa nakita sa Israelinhong mga espiya sa dihang gisurbi nila ang Yutang Saad. Ang tanan sa 12 ka espiya susamag nakit-an sumala sa pisikal nga pagtan-aw, apan duha lamang ang nakakita sa Yutang Saad sumala sa pagtan-aw sa Diyos. Ang mga misyonaryo makakita usab sa mga butang sa nagkalainlaing mga paagi. Sa pipila ka kayutaan diin sila mag-alagad, makita tingali nila ang kakabos, pag-antos, ug kawalay paglaom. Apan sila dili angayng mosanong nga negatibo ug mobiya sa ilang asaynment. Si Brader Adams naghisgot sa usa ka misyonaryo sa dili pa dugayng klase nga miingon: “Kini nga mga kasinatian nagpaamgo kanako nga ako kinahanglang magpabilin dinhi. Kining mga tawhana nagkinahanglan ug paglaom alang sa umaabot. Buot kong makahimog pag-uswag sa ilang mga kinabuhi.” Si Brader Adams mihinapos pinaagi sa pagdasig sa bag-ong mga misyonaryo nga tan-awon ang mga nasod nga niana sila giasayn ingong mga dapit nga gitino ni Jehova nga mahimong bahin sa Iyang tibuok-yutang Paraiso ug lantawon ang mga tawo didto ingong umaabot nga mga membro sa bag-ong kalibotang katilingban.
Ang kataposang pakigpulong niining bahina sa programa gihatag ni Wallace Liverance, nga nag-alagad sa daghang tuig sa misyonaryong kanataran sa wala pa mahimong instruktor sa Gilead. “Lihok nga may Pagsabot sa Katingalahang mga Buhat sa Diyos” maoy iyang tema. Ang paglihok nga may pagsabot naglangkit sa paglihok nga mabuot, mainampingon, ug may sentido komon. Kana maoy butang nga wala mabuhat ni Haring Saul sa Israel.—1 Samuel 13:9-13; 15:1-22.
Usa ka paagi sa paglihok nga may pagsabot mao ang pagdawat sa mga hagit sa pagpasibo sa usa ka bag-ong paagi sa kinabuhi, lakip ang pagkakat-on ug bag-ong pinulongan ug pagkaila sa mga tawo. Ang mga kasinatian sa mga misyonaryo sa pag-atubang sa mga hagit ug pagbuntog sa mga kababagan makapalig-on kanila sa espirituwal sa paagi nga si Josue ug Caleb napalig-on samtang ilang nabuntog ang yuta nga gitudlo sa Diyos kanila.
Mga Interbiyo
Ang nagsunod nga bahin sa programa naglakip sa sunodsunod nga mga interbiyo. Giinterbiyo ni Harold Jackson si Ulysses Glass, tigrehistro ug dugay na nga instruktor sa Tunghaang Gilead, nga karon 85 anyos na. Daghang misyonaryo nga anaa gihapon sa kanataran nahinumdom pag-ayo sa iyang daghang katuigan sa matinumanong pagtudlo ug pagbansay. Sunod mao si Mark Noumair, usa ka instruktor sa Gilead nga migugol ug daghang tuig sa langyawng pag-alagad sa Aprika sa wala pa moduyog sa kawani sa Tunghaang Gilead. Giinterbiyo niya ang mga estudyante bahin sa ilang ministeryo sa panahon sa lima ka bulan sa ilang pagtungha. Ang ilang mga kasinatian tin-awng nagpakita nga adunay mga tawo nga interesado sa Pulong sa Diyos diha sa lokal nga teritoryo.
Si Robert Ciranko ug Charles Molohan nakigsulti sa may kasinatiang mga lalaki nga mitambong niadto sa laing tunghaan sa mga pasilidad, usa ka tunghaan sa mga kawani sa sanga. Ang ilang tambag sa mga graduwado sa klase naglakip sa panginahanglan nga magmapainubsanon ug moamot sa panaghiusa sa kongregasyon. Sila nagsugyot nga ang mga graduwado dili angayng maghunahuna daan kon unsay mahitabo sa misyonaryong buluhaton apan, hinunoa, yanong andam nga modawat sa bisan unsang kahimtang. Ang pagpadapat niining tambaga sa walay duhaduha motabang sa bag-ong mga misyonaryo sa pagtuman sa ilang mga asaynment ingong mga magtutudlo sa Pulong sa Diyos.
Sa kataposan, si Theodore Jaracz, usa ka membro sa Nagamandong Lawas, nagpahayag sa mamiminaw uban sa ulohang “Kang Kinsa Sila Naimpluwensiyahan?” Gisaysay niya nga sa dihang kita ingong mga Kristohanon magpasundayag sa mga bunga sa espiritu, kita mahimong maayong impluwensiya sa ubang mga tawo. “Ang mga misyonaryo nga gipadala sa organisasyon ni Jehova nakapatunghag dalayegong rekord sa pag-impluwensiya sa mga tawo sa maayo, espirituwal nga paagi,” matod niya. Dayon iyang gipunting ang mga komento sa mga indibiduwal nga natabangan sa pag-alagad sa Diyos ingong resulta sa maayong mga panig-ingnan nga gipakita sa mga misyonaryo. “Hinaot huptan ninyo ang reputasyon nga nabatonan sa katawhan ni Jehova ug magpadayon sa pagtuktok niadtong mga pultahan sa inyong langyawng asaynment sa pagpangita sa mga tawong takos . . . Lain pa, pinaagi sa inyong matarong, mahinlong panggawi, sukli ang espiritu niining kalibotana, ug mahimong impluwensiya sa maayo alang sa pagdayeg ug kadungganan ni Jehova,” siya mihinapos.
Sa pagsumaryo sa programa, gipaambit sa tsirman ang mga pangomosta gikan sa duol ug sa halayo ug unya nagpresentar sa mga diploma ug nagpahibalo sa mga asaynment sa mga misyonaryo. Human niana, usa sa mga graduwado nagbasa sa resolusyon sa klase nga nagpasalamat sa instruksiyon nga gitagana. Tin-aw, ang programa sa graduwasyon sa ika-102 nga klase nakahimo sa tanang mitambong nga mas determinado sa pagpadayon sa pagmantala sa Pulong sa Diyos.
[Kapsiyon sa panid 31]
Ika-102 nga Migraduwar nga Klase sa Watchtower Bible School of Gilead
Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Duffy, C.; Alexis, D.; Harff, R.; Lee, J.; Corey, V.;Nortum, T.; Mora, N.; Journet, F. (2) Djupvik, L.; Singh, K.; Hart,B.; Kirkoryan, M.; Lee, S.; Rastall, S.; Zoulin, K.; Kollat, K.(3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet,K.; Barber, A.; Loberto, J.; Loberto, R.; Muxlow, M.; Mora,R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.