Nganong Motuo Kang Jesu-Kristo?

“DAGHANG tawo nga dili gani mga Kristohanon nagtuo nga Siya mao ang dako ug maalamong magtutudlo. Siya mao gayod ang usa sa labing impluwensiyado nga tawo nga nabuhi sukad.” (The World Book Encyclopedia) Kinsa “Siya”? Si Jesu-Kristo, ang magtutukod sa Kristiyanidad.

Hinunoa, bisan pa sa gipamulong sa ensiklopedia, alang sa ginatos ka milyong tawo sa Oryente ug sa ubang dapit, si Jesu-Kristo maoy usa ka estranghero, usa lamang ka ngalan nga ilang nahinumdoman gikan sa mga libro sa hayskul. Bisan diha sa mga relihiyon sa Kakristiyanohan, adunay mga teologo ug mga klero nga nag-ingon nga kita wala gayod makaila kang Jesus ug nagduhaduha sa pagkatinuod sa upat ka nahibiling mga asoy sa iyang kinabuhi (ang mga Ebanghelyo) nga makita diha sa Bibliya.

Mahimo kaha nga gipalsipikar sa mga magsusulat sa Ebanghelyo ang kasaysayan sa kinabuhi ni Jesus? Wala gayod! Ang iladong historyano nga si Will Durant, human sa pag-analisar sa maong mga asoy sa Ebanghelyo, nagsulat: “Nga ang pipila ka simpleng mga tawo sa usa ka kaliwatan nag-imbento ug gamhanan kaayo ug madanihong personalidad, nga hataas kaayog sukdanan sa pamatasan ug makapadasig kaayog panan-awon sa panag-igsoonay sa tawo, maoy usa ka milagro nga labi pang dili-katuohan kay sa bisan unsa pa nga natala diha sa mga Ebanghelyo. Human sa duha ka siglo sa pagpanaway sa Bibliya ang laktod nga report sa kinabuhi, kinaiya, ug pagtulon-an ni Kristo, sa makataronganon nagpabiling tin-aw, ug naglakip sa labing makaiikag nga bahin sa kasaysayan sa tawo sa Kasadpan.”

Bisan pa, adunay mga tawo nga mosalikway kang Jesu-Kristo nga dili-takos sa ilang pagtagad tungod sa nahimo sa mga tawong nag-angkong iyang mga sumusunod. ‘Sila naghulog ug usa ka bomba atomika sa Nagasaki,’ moingon ang uban sa Hapon. ‘Ug ang Nagasaki mas daghan ug Kristohanon kay sa kadaghanang siyudad sa Hapon.’ Apan mabasol ba nimo ang usa ka doktor sa sakit sa pasyente kon ang pasyente wala mosunod sa paggiya sa doktor? Ang kadaghanan sa mga tawong nag-angkong mga Kristohanon dugay nang wala-manumbaling sa reseta ni Jesus aron sa pagbuntog sa mga sakit sa katawhan. Bisan pa niana, si Jesus naghatag ug solusyon alang sa atong adlaw-adlawng mga problema maingon man sa mga kasakit sa katawhan sa tibuok kalibotan. Maoy hinungdan nga gidapit ka namo sa pagbasa sa sunod nga artikulo ug tan-awa sa imong kaugalingon kon unsa siyang matanga sa tawo.