Pagpangita ug Kasaligang mga Panagna
WALA madugay human ang hari sa Macedonia nga nailhan ingong si Alejandrong Bantogan milingkod sa trono sa 336 W.K.P., siya miduaw sa templo sa Delphi, sa sentral Gresya. Ang iyang ambisyosong mga plano sa umaabot mao gayod ang pagdaog sa dakong bahin sa kalibotan sa maong panahon. Apan nagtinguha siyag langitnong pasalig nga ang iyang dako kaayong buluhaton magmalamposon. Sumala sa kasugiran, sa adlaw nga siya nahiduaw sa Delphi, wala itugot ang pagkonsulta sa orakulo. Kay dili buot mobiya nga walay tubag, si Alejandro miinsistir, nga nagpugos sa babayeng saserdote sa pagtagna. Siya misinggit sa kahigawad: “Hay, dong, ikaw dili mabuntog!” Ang batan-ong hari nag-isip niadto nga usa ka maayong tilimad-on—nga nagpasabot ug usa ka madaogong pagpakiggubat.
Hinunoa, si Alejandro mas nasayod pa untag maayo sa sangpotan sa iyang pagpakiggubat kon iya pang gisusi ang mga tagna nga makaplagan diha sa basahon sa Bibliya ni Daniel. Uban ang talagsaong katukma, kini nagtagna sa iyang tulin nga mga pagpangdaog. Sumala sa tradisyon si Alejandro sa kapulihay nakahigayon sa pagkakita sa gitala ni Daniel bahin kaniya. Matod sa historyanong Hudiyo nga si Josephus, sa dihang ang hari sa Macedonia misulod sa Jerusalem, gipakita kaniya ang tagna ni Daniel—lagmit ang kapitulo 8 sa maong libro. (Daniel 8:5-8, 20, 21) Gikataho nga tungod niini, ang siyudad nakalingkawas sa malaglagong kasundalohan ni Alejandro.
Kinaiyanhong Tawhanong Panginahanglan
Hari o ordinaryong tawo, karaan o moderno—ang tawo mibati sa panginahanglan alang sa kasaligang mga panagna bahin sa umaabot. Isip intelihenteng mga linalang, kitang mga tawo nagtuon sa nangagi, nahibalo sa presente, ug ilabinang maikagon sa umaabot. Usa ka panultihong Ininsek tukmang nag-ingon: “Siyang makakita sa mga panghitabo nga tulo ka adlaw nga abante madato sa libolibong katuigan.”
Latas sa kapanahonan, milyonmilyon ang misulay sa paglantaw sa umaabot pinaagi sa pagkonsulta sa ilang giisip nga butang langitnon. Tagda ang karaang mga Grego ingong pananglitan. Diha silay daghang sagradong mga templo, sama nianang sa Delphi, Delos, ug Dodona, diin sila moadto aron sa pagpakisusi sa ilang mga diyos maylabot sa politikal o militaryong mga kaugmaran maingon man sa personal nga mga kalihokan sama sa pagbiyahe, kaminyoon, ug kabataan. Dili lamang mga hari ug mga lider sa kasundalohan kondili ang enterong mga tribo ug mga siyudad-estado nangitag giya gikan sa espiritung mga dominyo pinaagi niini nga mga panagna sa orakulo.
Sumala sa usa ka propesor, sa pagkakaron adunay “kalit nga pagdaghan sa mga organisasyon nga gideboto aron sa pagtuon bahin sa umaabot.” Apan, daghan ang mipili sa pagsalikway sa bugtong tukma nga tinubdan sa tagna—ang Bibliya. Direkta nilang gisalikway ang bisan unsang posibilidad nga ang mga tagna sa Bibliya naundan sa mismong impormasyon nga ilang ginapangita. Ang pipila ka eskolar miabot pa sa punto nga nagpakasama sa tagna sa Bibliya sa mga tagna nga gihatag sa karaang mga orakulo. Ang modernong-adlaw nga mga maduhaduhaon kasagarang mapihigon batok sa tagna sa Bibliya.
Amo kamong dapiton sa pagsusi mismo sa talaan. Unsay gibutyag sa maampingong pagtandi sa mga tagna sa Bibliya ug sa tawhanong mga panagna? Mas makasalig ka ba sa tagna sa Bibliya kay sa karaang mga panagna sa orakulo? Ug ikaw ba sa masaligong paagi makatukod sa imong kinabuhi diha sa mga tagna sa Bibliya?
[Hulagway sa panid 3]
Ang Bibliya nagtagna sa tulin nga mga pagpangdaog ni Alejandro
[Credit Line]
Cortesía del Museo del Prado, Madrid, Spain
[Hulagway sa panid 4]
Alejandrong Bantogan
[Credit Line]
Musei Capitolini, Roma
[Picture Credit Line sa panid 2]
HAPIN: Heneral Tito ug Alejandrong Bantogan: Musei Capitolini, Roma