Kon Nganong Ikaw Makasalig sa Tagna sa Bibliya

SI HARING PYRRHUS sa Epirus sa amihanan-kasadpang Gresya nalangkit sa dugayng pagpakiggubat batok sa Romanhong Imperyo. Kay hilabihang nagtinguha ug kasaligang impormasyon labot sa sangpotanan niini, siya miadto aron sa pagkonsulta sa templo sa Delphi. Apan ang tubag nga iyang nadawat mahimong sabton sa bisan hain sa mosunod nga duha ka paagi: (1) “Ako moingon nga ikaw anak lalaki ni Æacus makabuntog sa mga Romano. Ikaw molakaw, ikaw mobalik, ikaw dili gayod mamatay sa gubat.” (2) “Ako moingon nga ang mga Romano makabuntog kanimo, anak lalaki ni Æacus. Ikaw molakaw, ikaw dili na gayod mobalik, ikaw mamatay sa gubat.” Iyang gipili ang pagsabot sa unang panagna sa orakulo ug busa nakiggubat batok sa Roma. Si Pyrrhus bug-os nga naparot.

Ang maong mga kaso naghimo sa karaang mga panagna sa orakulo nga ilado sa pagkadi-tataw ug mahimong sabton sa duha o mas pang mga paagi. Apan unsa na man ang tagna sa Bibliya? Ang pipila ka kritiko nag-ingon nga ang mga tagna nga makaplagan sa Bibliya walay kalainan sa mga panagna sa orakulo. Kini nga mga kritiko naghunahuna nga ang mga panagna sa Bibliya mao lamay inantigong pagtagna sa umaabot nga mga hitabo pinaagi sa utokan ug lantip kaayog panghunahunang mga tawo, nga kasagarang iya sa saserdote nga matang. Gituohan nga pinaagi lamag kasinatian o pinaagi sa ilang linaing mga koneksiyon, kining mga tawhana makakita-daan sa kinaiyanhong kaugmaran sa pipila ka mga kahimtang. Pinaagi sa pagtandi sa nagkalainlaing mga kinaiyahan sa mga tagna sa Bibliya uban nianang iya sa mga orakulo, kita labi pang masangkapan sa pagbaton ug tukmang mga konklusyon.

Mga Punto nga Magkalahi

Ang ilhanan sa mga panagna nga orakulo mao ang pagkadi-tino niini. Sa Delphi, pananglitan, ang gihatag nga mga tubag gilitok diha sa di-masabtang mga tingog. Kini kinahanglang hubaron pa sa mga saserdote ug magpatunghag mga bersikulo nga makahatag ug katugbang nga mga hubad. Usa ka iladong pananglitan niini mao ang tubag nga gihatag ngadto kang Croesus, hari sa Lydia. Sa dihang mikonsulta siya sa templo, siya giingnan: “Kon motabok si Croesus sa Halys, iyang malaglag ang usa ka gamhanang imperyo.” Ang tinuod, ang “gamhanang imperyo” nga nalaglag mao ang iyaha! Sa pagtabok ni Croesus sa subang Halys aron sa pagsulong sa Capadocia, siya naparot diha sa mga kamot ni Ciro nga Persiano.

Sukwahi kaayo sa paganong mga panagna sa orakulo, ang mga tagna sa Bibliya nailhan sa katukma ug katin-aw niini. Ang pananglitan mao ang tagna bahin sa pagkapukan sa Babilonya, nga natala sa Bibliya sa basahon ni Isaias. Mga 200 ka tuig una pa kini mahitabo, ang manalagnang si Isaias nagtagna diha sa detalyado ug tukmang paagi sa kalaglagan sa Babilonya pinaagi sa Medo-Persia. Gipadayag sa tagna nga ang mananaog paganganlag Ciro, ug gibutyag niini ang mismong estratehiya sa pagpahubas sa samag-trinsera nga depensang suba ug sa pagsulod sa usa ka kinutaang siyudad agi sa bukas nga mga ganghaan. Kining tanan tukmang natuman. (Isaias 44:27–45:2) Hustong gitagna usab nga ang Babilonya sa ngadtongadto bug-os nga dili-puy-an.​—Isaias 13:17-22.

Tagda, usab, ang pagkatino niining pasidaana nga gipahayag ni propetang Jonas: “Kap-atan ka adlaw na lamang, ug ang Nineve pagalaglagon.” (Jonas 3:4) Kini tin-aw kaayo! Ang mensahe kahibulongan ug pintok kaayo nga ang mga tawo sa Nineve dihadiha “mituo sa Diyos, ug sila nagmantala ug usa ka pagpuasa ug nagsul-ob ug besti nga sako.” Ingong resulta sa ilang paghinulsol, si Jehova wala maglaglag sa mga taga-Nineve sa maong panahon.​—Jonas 3:5-10.

Ang mga panagna sa orakulo gigamit ingong usa ka paagi sa politikanhong impluwensiya. Ang mga magmamando ug mga pangulo sa kasundalohan sagad maghisgot sa paghubad nga ilang nauyonan aron sa pagpalambo sa ilang personal nga mga interes ug mga kahimoan, ug busa naghatag niana ug “balaang takoban.” Apan, ang matagnaong mga mensahe sa Diyos gihatag nga wala mapasignunot sa personal nga mga hunahuna.

Sa pag-ilustrar: Ang manalagna ni Jehova nga si Nathan wala magpanuko sa pagbadlong sa masalaypong Haring David. (2 Samuel 12:1-12) Sulod sa pagmando ni Jeroboam II ibabaw sa napulo-ka-tribong gingharian sa Israel, ang mga manalagna nga si Oseas ug Amos grabeng nagsaway sa masuklanong hari ug sa iyang mga tigpaluyo tungod sa ilang apostasya ug nagapasipala-sa-Diyos nga panggawi. (Oseas 5:1-7; Amos 2:6-8) Ilabinang mahait ang pasidaan ni Jehova ngadto sa hari pinaagi sa baba ni manalagnang Amos: “Ako motindog batok sa balay ni Jeroboam uban ang espada.” (Amos 7:9) Gipuo ang balay ni Jeroboam.​—1 Hari 15:25-30; 2 Cronicas 13:20.

Kasagaran, ang mga panagna sa orakulo gihatag nga may bayad. Ang tawo nga mobayad ug dako makadawat sa panagna nga maoy iyang gusto. Kadtong mikonsulta sa mga templo sa Delphi mibayad ug dako alang sa way-pulos nga impormasyon, sa ingon nagpuno sa templo ni Apolo ug sa ubang mga tinukod sa daghang bahandi. Sa kasukwahi, ang mga tagna sa Bibliya ug mga pasidaan gihatag nga walay bayad ug walay pagpihigpihig sa bisan unsang paagi. Mao kanay kahimtang way-sapayan sa posisyon o bahandi sa tawo nga kini gitumong, kay ang usa ka tinuod nga manalagna dili mahiphipan. Ang manalagna ug maghuhukom nga si Samuel sinserong misukna: “Gikan kang kinsang kamot nga ako midawat ug hiphip aron sa pagbuta sa akong mga mata diha niana?”​—1 Samuel 12:3.

Sanglit ang mga panagna sa orakulo mabatonan lamang diha sa tinong mga dapit, ang indibiduwal kinahanglang manlimbasog pag-ayo sa pagpanaw didto aron makadawat niini. Alang sa kasarangang tawo, ang kadaghanan sa maong mga dapit lisod kaayong abton tungod kay kini nahimutang sa mga dapit sama sa Dodona sa Bukid Tomarus sa Epirus ug sa Delphi didto sa bukirong-dapit sa sentral Gresya. Kasagaran, ang mga dato ug mga gamhanan lamang ang makahimo sa pagkonsulta sa mga diyos sa maong mga templo. Dugang pa, “ang kabubut-on sa mga diyos” gibutyag lamang sa pipila ka adlaw sulod sa usa ka tuig. Sa kasukwahi, si Jehova nga Diyos nagpadala sa iyang manalagnang mga mensahero nga deretso ngadto sa mga tawo aron sa pagpahayag sa mga tagna nga kinahanglang ilang madunggan. Panahon sa pagkadestiyero sa mga Hudiyo sa Babilonya, pananglitan, ang Diyos dihay labing menos tulo ka manalagna nga nag-alagad taliwala sa iyang katawhan​—si Jeremias sa Jerusalem, si Ezequiel uban sa mga destiyero, ug si Daniel diha sa kaulohan sa Babilonyanhong Imperyo.​—Jeremias 1:1, 2; Ezequiel 1:1; Daniel 2:48.

Ang mga panagna sa orakulo sa kinatibuk-an gihatag sa pribado aron ang usa nga modawat niini makapahimulos sa hubad niini alang sa iyang kaayohan. Sa kasukwahi, ang mga tagna sa Bibliya kasagarang gihatag diha sa publiko aron ang tanan makadungog sa mensahe ug makasabot sa mga kahulogan niini. Ang manalagnang Jeremias sa daghang higayon misulti diha sa publiko sa Jerusalem, bisag nasayod siya nga ang iyang mensahe dili popular taliwala sa mga lider ug mga molupyo sa siyudad.​—Jeremias 7:1, 2.

Karon, ang mga panagna sa orakulo giisip ingong bahin sa karaang kasaysayan. Kini walay praktikal nga bili alang sa mga tawo nga nagkinabuhi sa lisod nga mga panahon. Ang maong mga panagna sa orakulo wala maghisgot sa atong adlaw o sa atong umaabot. Sa talagsaong pagkalahi, ang mga tagna sa Bibliya maoy bahin sa “pulong sa Diyos [nga] buhi ug gamhanang nagalihok.” (Hebreohanon 4:12) Ang natuman nga mga tagna sa Bibliya nagtaganag sumbanan sa mga pagpakiglabot ni Jehova sa mga tawo ug nagbutyag sa hinungdanong mga bahin sa iyang mga katuyoan ug personalidad. Dugang pa, ang hinungdanong mga tagna sa Bibliya mamatuman pa sa duol nga umaabot. Nga naghubit sa mahitabo sa unahan, si apostol Pedro misulat: “Adunay bag-ong mga langit [ang langitnong Mesiyanikong Gingharian] ug usa ka bag-ong yuta [usa ka matarong tawhanong katilingban] nga atong ginapaabot sumala sa saad [sa Diyos], ug niini nila magapuyo ang pagkamatarong.”​—2 Pedro 3:13.

Kining daklit nga pagtandi sa tagna sa Bibliya ug sa mga panagna sa orakulo sa bakak nga relihiyon mahimong moagak kanimo ngadto sa usa ka konklusyon nga susama nianang gipahayag diha sa basahon nga nag-ulohang The Great Ideas: “Kon maylabot sa pasiunang-kahibalo sa mga tawong mortal, ang Hebreohanong mga manalagna daw talagsaon. Dili sama sa paganong mga mananagna o mga tigpanagna, . . . sila dili kinahanglang mogamit ug mga kalaki o mga himan aron matuki ang balaang mga tinago. . . . Sa dakong bahin, ang ilang matagnaong mga pakigpulong maorag matin-aw, dili sama niadtong iya sa mga orakulo. Labing menos ang tuyo maorag mao ang pagbutyag, dili pagtago, sa laraw sa Diyos sa maong mga butang sanglit Siya Mismo buot nga makitang-daan sa mga tawo ang dalan sa Diyos.”

Mosalig Ka ba sa Tagna sa Bibliya?

Makasalig ka sa tagna sa Bibliya. Sa pagkatinuod, imong mahimo nga pangunang butang sa imong kinabuhi si Jehova ug ang katumanan sa iyang matagnaong pulong. Ang tagna sa Bibliya dili kay usa ka way-kapuslanang talaan sa natuman nga mga tagna. Daghang tagna nga makaplagan diha sa Kasulatan ang karon nagakatuman o mamatuman sa duol nga umaabot. Pinasikad sa nangagi, kita bug-os makasalig nga kini usab mamatuman. Sanglit ang maong mga tagna nagtumong sa atong mga panahon ug naglangkit sa ato mismong umaabot, maayong ato kining isipon nga hinungdanon.

Sa walay duhaduha ikaw makasalig sa tagna sa Bibliya nga makaplagan diha sa Isaias 2:2, 3: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran . . . Ug daghang katawhan ang moadto gayod ug moingon: ‘Umari kamo, ug manungas kita ngadto sa bukid ni Jehova, . . . ug siya magatudlo kanato bahin sa iyang mga dalan, ug kita magalakaw sa iyang mga alagianan.’” Karon, milyonmilyong tawo ang misagop gayod sa binayaw nga pagsimba ni Jehova ug nagtuon sa paglakaw diha sa iyang mga alagianan. Pahimuslan ba nimo ang higayon sa pagkat-on ug dugang bahin sa mga dalan sa Diyos ug sa pagbaton sa tukmang kahibalo bahin kaniya ug sa iyang mga katuyoan aron makalakaw diha sa iyang mga alagianan?​—Juan 17:3.

Ang katumanan sa laing tagna sa Bibliya nagkinahanglan ug dinaliang lihok sa atong bahin. Bahin sa duol nga umaabot, ang salmista matagnaong miawit: “Ang mga mamumuhat ug daotan pagaputlon . . . Sa makadiyot na lamang, ug ang daotan mawala na.” (Salmo 37:9, 10) Sa imong hunahuna unsay gikinahanglan aron makalikay sa nagsingabot nga kalaglagan sa mga daotan, lakip niadtong nagtamay sa mga tagna sa Bibliya? Ang samang salmo mitubag: “Kadtong nagalaom kang Jehova mao ang magapanag-iya sa yuta.” (Salmo 37:9) Ang paglaom kang Jehova nagkahulogan sa bug-os nga pagsalig sa iyang mga saad ug sa pagpahiuyon sa atong kinabuhi sa iyang mga sukdanan.​—Proverbio 2:21, 22.

Mahisama unya sa unsa ang kinabuhi sa dihang kadtong nagalaom kang Jehova manag-iya na sa yuta? Sa makausa pa, ang mga tagna sa Bibliya nagbutyag nianang usa ka mahimayaong kaugmaon nga giandam alang sa masinugtanong katawhan. Ang manalagnang si Isaias misulat: “Nianang panahona ang mga mata sa mga buta mangabuka, ug ang mga igdulungog sa mga bungol makadungog. Nianang panahona ang bakol mokatkat ingon sa laking osa, ug ang dila sa amang mosinggit sa kasadya. Kay sa kamingawan ang mga tubig mobugwak, ug ang mga bul-og sa tubig sa patag nga desyerto.” (Isaias 35:5, 6) Si apostol Juan misulat niining mapasaligong mga pulong: “Iyang [si Jehova] pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na. Ug ang Usa nga naglingkod sa trono miingon: . . . ‘Isulat, tungod kay kining mga pulonga kasaligan ug matuod.’”​—Pinadayag 21:4, 5.

Ang mga Saksi ni Jehova nahibalo nga ang Bibliya maoy usa ka basahon sa kasaligang tagna. Ug sila bug-os nga mouyon sa awhag ni apostol Pedro: “Atong nabatonan ang propetikanhong pulong nga nahimong labi pang tino; ug nagabuhat kamo ug maayo sa pagtagad niini samag nganha sa usa ka lampara nga nagasidlak sa usa ka ngitngit nga dapit, hangtod nga ang adlaw mobanagbanag ug ang bituon nga pang-adlaw mosubang, sa inyong mga kasingkasing.” (2 Pedro 1:19) Kami tim-os nga naglaom nga ikaw masibot sa maanindot kaayong mga palaaboton nga gitanyag sa tagna sa Bibliya sa umaabot!

[Kahon/​Mga hulagway sa panid 6]

ANG TEMPLO SA DELPHI ilado kaayo sa karaang Gresya.

Ang makapahubog nga mga inalisngaw nakapakuyap sa babayeng saserdote

[Mga hulagway]

Ang babayeng saserdote milingkod sa sinug-ang nga sanggaan ug militok sa iyang mga panagna

Ang mga tingog nga iyang gilitok gituohang naundan sa mga pagpadayag gikan sa diyos nga si Apolo

[Credit Lines]

Sinug-ang nga sanggaan: Gikan sa basahon nga Dictionary of Greek and Roman Antiquities; Apolo: The Complete Encyclopedia of Illustration/​J. G. Heck

[Hulagway sa panid 7]

Ang mga panagna nga gihatag diha sa templo sa Delphi bug-os nga dili kasaligan

[Credit Line]

Delphi, Gresya

[Mga hulagway sa panid 8]

Ikaw makabaton ug bug-os nga pagsalig sa tagna sa Bibliya bahin sa bag-ong kalibotan