Pagtabang sa mga Tawo nga Maduol Kang Jehova
“Walay usa nga makaadto sa Amahan gawas kon pinaagi kanako.”—JUAN 14:6.
1. Unsang sugo ang gihatag sa binanhawng Jesus ngadto sa iyang mga tinun-an, ug unsay misangpot samtang ginatuman kana sa mga Saksi ni Jehova?
GISUGO ni Jesu-Kristo ang iyang mga sumusunod sa “paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.” (Mateo 28:19) Sa milabayng napulo ka tuig, ang mga Saksi ni Jehova nakatabang sa kapig tulo ka milyong tawo nga maduol sa Diyos, nga ngadtongadto nagbawtismo kanila ingong simbolo sa ilang pagpahinungod kaniya aron buhaton ang iyang kabubut-on. Pagkamalipayon nato nga nakatabang kanila nga maduol sa Diyos!—Santiago 4:8.
2. Bisag daghang bag-ohan ang nabawtismohan, unsay nahitabo?
2 Ugaling lang, diha sa pipila ka nasod diin nabawtismohan ang daghang bag-ong mga tinun-an, walay katumbas nga pag-uswag ang gidaghanon sa mga magmamantala sa Gingharian. Hinuon, kinahanglang isipon ang mga nangamatay, kay ang tinuig nga porsiyento sa nangamatay duolan man sa 1 porsiyento. Bisan pa niana, sa milabayng pipila ka tuig, tungod sa usa ka hinungdan ubay-ubay ang namiya. Ngano? Kini ug ang sunod artikulo magatuki kon sa unsang paagi makabig ang mga tawo kang Jehova ug ang posibleng mga hinungdan nga ang pipila mobiya sa pagtuo.
Ang Katuyoan sa Atong Pagsangyaw
3. (a) Sa unsang paagi ang buluhatong gisalig ngadto sa mga tinun-an ni Jesus dungan nga nahitabo sa iya sa manulondang gihisgotan sa Pinadayag 14:6? (b) Unsay napamatud-an nga epektibong paagi sa pagpukaw sa interes sa mga tawo diha sa mensahe sa Gingharian, apan unsang suliran ang naglungtad?
3 Niining “panahon sa kataposan,” ang mga tinun-an ni Jesus adunay tinudlong-buluhaton sa pagsangyaw sa “matuod nga kahibalo” mahitungod ‘niining maayong balita sa gingharian.’ (Daniel 12:4; Mateo 24:14) Ang ilang buluhaton dungan nga nahitabo sa iya sa manulonda nga “adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan.” (Pinadayag 14:6) Niining kalibotana nga nalinga kaayo sa kalibotanong mga butang, sagad ang labing epektibong paagi sa pagpaikag sa mga tawo sa Gingharian sa Diyos ug pagtabang kanila nga maduol kang Jehova mao ang pagsugilon kanila mahitungod sa paglaom sa walay-kataposang kinabuhi diha sa usa ka paraisong yuta. Bisag hisabtan kini, kadtong nakig-uban sa katawhan sa Diyos aron lamang makasulod sa Paraiso wala lig-ong magsubay sa pit-os nga dalan nga mohatod sa kinabuhi.—Mateo 7:13, 14.
4. Sumala kang Jesus ug sa manulondang naglupad sa kinatung-an sa langit, unsa ang katuyoan sa atong buluhatong pagsangyaw?
4 Si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang manulondang nagalupad sa kinatung-an sa langit nagpahayag sa “walay-kataposang maayong balita” ug nagsugo niadtong nagapuyo sa yuta: “Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na, ug busa simbaha ang Usa nga naghimo sa langit ug sa yuta ug dagat ug mga tuboran sa mga tubig.” (Pinadayag 14:7) Nagpasabot kini nga ang kinalabwang katuyoan sa atong pagsangyaw sa maayong balita mao ang pagtabang sa mga tawo nga maduol kang Jehova pinaagi ni Kristo Jesus.
Atong Papel Diha sa Buluhaton ni Jehova
5. Unsang mga pahayag ni Pablo ug Jesus ang nagpakita nga kita nagabuhat sa buluhaton ni Jehova, dili sa atoa?
5 Sa pagsulat ngadto sa isigkadinihogang mga Kristohanon, si apostol Pablo naghisgot mahitungod sa “ministeryo sa pagpahiuli” ug nag-ingon nga ang Diyos nagpahiuli sa mga tawo nganha kaniya pinasukad sa halad lukat ni Jesu-Kristo. Si Pablo nag-ingon nga kini maoy “daw ang Diyos matinuorong nagahangyo pinaagi kanamo” ug nga “ingong mga kapuli kang Kristo kami nagapakiluoy: ‘Magpahiuli kamo ngadto sa Diyos.’” Pagkamakalilipay nga hunahunaon! Kon kaha kita dinihogang “mga embahador nga kapuli kang Kristo” o mga sinugo nga may yutan-ong mga paglaom, dili gayod nato kalimtan nga kini buluhaton ni Jehova, dili atoa. (2 Corinto 5:18-20) Ang Diyos mao gayod ang magakabig sa mga tawo ug magatudlo niadtong moduol kang Kristo. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya; ug pagabanhawon ko siya sa kataposan nga adlaw. Kini nahisulat diha sa mga Propeta, ‘Ug silang tanan tudloan ni Jehova.’ Ang matag usa nga nakadungog gikan sa Amahan ug nakakat-on moari kanako.”—Juan 6:44, 45.
6. Sa unsang paagi si Jehova nagauyog sa kanasoran sa pasiunang paagi, ug sa samang panahon, kinsay nakakaplag ug kasegurohan diha sa iyang “balay” sa pagsimba?
6 Niining kataposang mga adlaw, sa unsang paagi si Jehova magakabig sa mga tawo ug magabukas alang kanila sa “ganghaan sa pagtuo”? (Buhat 14:27, potnot; 2 Timoteo 3:1) Ang usa ka pangunang paagi mao ang pagpasangyaw sa iyang mga Saksi sa iyang mga mensahe sa kaluwasan ug sa paghukom batok niining daotang sistema sa mga butang. (Isaias 43:12; 61:1, 2) Kining tibuok-kalibotang pagmantala nakapauyog sa kanasoran—usa ka tilimad-on sa mahukmanong kalaglagan nga duol nang moabot. Sa samang panahon, ang mga tawong “bililhon” sa mga mata sa Diyos ginapagula gikan niining sistemaha ug nakakaplag sa kasegurohan diha sa iyang “balay” sa matuod nga pagsimba. Sa ingon si Jehova nagatuman sa iyang matagnaong mga pulong nga gitala ni Hageo: “Pagauyogon ko ang tanang kanasoran, ug ang tilinguhaong mga butang sa tanang kanasoran mosulod; ug pagapun-on ko kining balaya sa himaya.”—Hageo 2:6, 7, potnot; Pinadayag 7:9, 15.
7. Sa unsang paagi si Jehova nagabukas sa mga kasingkasing sa mga tawo ug nagakabig sa mga indibiduwal nganha kaniya ug sa iyang Anak?
7 Ginabuksan ni Jehova ang mga kasingkasing niining mga mahadlokon sa Diyos—“ang piniling mga butang sa tanang kanasoran”—aron sila “makapatalinghog sa mga butang nga gisulti” sa iyang mga Saksi. (Hageo 2:7, Jewish Publication Society; Buhat 16:14) Sama sa unang siglo, si Jehova usahay magagamit sa iyang mga manulonda aron tultolan ang iyang mga Saksi ngadto sa sinserong mga tawo nga nagtuaw kaniya alang sa panabang. (Buhat 8:26-31) Samtang ang mga indibiduwal makakat-on mahitungod sa kahibulongang mga taganang gihimo sa Diyos alang kanila pinaagi sa iyang Anak, si Jesu-Kristo, sila maduol kang Jehova tungod sa iyang gugma. (1 Juan 4:9, 10) Oo, ang Diyos magakabig sa mga tawo nganha kaniya ug nganha sa iyang Anak pinaagi sa Iyang “mahigugmaong-kalulot,” o “maunongong gugma.”—Jeremias 31:3, potnot.
Kinsay Ginakabig ni Jehova?
8. Unsang matanga sa mga tawo ang ginakabig ni Jehova?
8 Ginakabig ni Jehova nganha kaniya ug sa iyang Anak kadtong nagapangita Kaniya. (Buhat 17:27) Nalakip kanila ang mga tawo nga “nagapanghupaw ug nagaagulo tungod sa tanang dulumtanang mga butang nga ginabuhat” diha sa Kakristiyanohan ug, sa pagkatinuod, sa tibuok kalibotan. (Ezequiel 9:4) Sila “mahunahunaon sa ilang espirituwal nga panginahanglan.” (Mateo 5:3) Sa tinuoray, sila mao ang “mga maaghop [“mapaubsanon,” potnot] sa yuta,” kinsa magapuyo sa paraisong yuta hangtod sa hangtod.—Sofonias 2:3.
9. Sa unsang paagi makakita si Jehova kon ang mga tawo “sa husto matinguhaon sa kinabuhing walay kataposan,” ug sa unsang paagi siya nagakabig kanila?
9 Si Jehova makabasa sa kasingkasing sa usa ka tawo. Giingnan ni Haring David ang iyang anak nga si Solomon: “Ang tanang kasingkasing ginasusi ni Jehova, ug ang matag kiling sa mga hunahuna iyang ginaila. Kon ikaw mangita kaniya, iyang ipahinabo nga siya imong hikaplagan.” (1 Cronicas 28:9) Pinasukad sa kahimtang sa kasingkasing ug espiritu, o nagpatigbabawng tinamdan, sa usa ka indibiduwal, si Jehova makakita kon lagmit bang mosanong siya ngadto sa balaang mga tagana alang sa kapasayloan sa mga sala ug sa paglaom sa kinabuhing walay kataposan diha sa matarong nga bag-ong sistema sa Diyos. (2 Pedro 3:13) Pinaagi sa iyang Pulong, nga ginasangyaw ug ginatudlo sa iyang mga Saksi, si Jehova nagakabig nganha kaniya ug sa iyang Anak ‘kadtong tanan nga sa husto matinguhaon sa kinabuhing walay-kataposan,’ ug sila ‘mahimong mga magtutuo.’—Buhat 13:48.
10. Unsay nagpakita nga ang pagkabig ni Jehova sa pipila ug dili sa uban wala maglangkit sa predestinasyon?
10 Ang pagkabig ni Jehova sa pipila ug dili sa uban naglangkit ba sa usa ka dagway sa predestinasyon? Dili gayod! Ang pagkabig sa Diyos sa mga tawo nag-agad sa ilang kaugalingong mga tingusbawan. Siya nagatahod sa ilang kagawasan sa pagpili o libreng kabubut-on. Ginabutang ni Jehova sa atubangan sa mga molupyo sa yuta karong adlawa ang samang kapilian nga gibutang sa atubangan sa mga Israelinhon kapig 3,000 ka tuig kanhi, sa dihang si Moises miingon: “Akong gibutang sa imong atubangan karong adlawa ang kinabuhi ug ang maayo, ug ang kamatayon ug ang daotan. . . . Akong gihimo ang mga langit ug ang yuta ingon nga mga saksi batok kaninyo karong adlawa, nga akong gibutang ang kinabuhi ug kamatayon sa imong atubangan, ang panalangin ug ang tunglo; ug kinahanglang pilion nimo ang kinabuhi aron ikaw makapadayong buhi, ikaw ug ang imong mga kaliwat, pinaagi sa paghigugma kang Jehova nga imong Diyos, pinaagi sa pagpatalinghog sa iyang tingog ug pinaagi sa pagpabilin kaniya; kay siya mao ang imong kinabuhi ug gitas-on sa imong mga adlaw.”—Deuteronomio 30:15-20.
11. Sa unsang paagi ang mga Israelinhon gipapili sa kinabuhi?
11 Matikding ang mga Israelinhon gipapili sa kinabuhi ‘pinaagi sa paghigugma kang Jehova, pinaagi sa pagpatalinghog sa iyang tingog, ug pinaagi sa pagpabilin kaniya.’ Sa gilitok kadtong mga pulonga, ang katawhan sa Israel wala pa makapanag-iya sa Yutang Saad. Sila didto niadto sa Kapatagan sa Moab, nga nag-andam nga motabok sa Suba sa Jordan ug mosulod sa Canaan. Bisag kinaiyanhong iliso nila ang ilang mga kaisipan ngadto sa “maayo ug halapad” nga yuta nga “nagapaagay sa gatas ug dugo” nga duol na nilang madawat, ang katumanan sa ilang mga pangandoy nag-agad sa ilang gugma alang kang Jehova, ilang pagpatalinghog sa iyang tingog, ug ilang pagpabilin kaniya. (Exodo 3:8) Gitin-aw kini ni Moises, nga miingon: “Kon magpatalinghog ka sa mga sugo ni Jehova nga imong Diyos, nga akong ginasugo kanimo karong adlawa, aron sa paghigugma kang Jehova nga imong Diyos, sa paglakaw diha sa iyang mga dalan ug sa pagbantay sa iyang mga sugo ug sa iyang mga tulumanon ug sa iyang hudisyal nga mga desisyon, nan ikaw makapabiling buhi ug modaghan, ug si Jehova nga imong Diyos magapanalangin kanimo diha sa yuta nga imong panag-iyahon.”—Deuteronomio 30:16.
12. Unsay angayng itudlo kanato sa panig-ingnan sa mga Israelinhon mahitungod sa atong buluhaton sa pagsangyaw ug pagtudlo?
12 Dili ba kanang kasayorana adunay ginatudlo kanato mahitungod sa atong buluhaton sa pagsangyaw ug pagpanudlo niining panahon sa kataposan? Kita naghunahuna bahin sa umaabot nga Paraisong yuta ug naghisgot niana diha sa atong pagsangyaw. Apan kita o ang mga tinun-ang ginahimo nato dili makakita sa katumanan nianang saara kon kita o sila nag-alagad sa Diyos tungod sa hinakog nga mga hinungdan. Sama sa mga Israelinhon, kita ug kadtong atong ginatudloan kinahanglang makakat-on sa ‘paghigugma kang Jehova, pagpatalinghog sa iyang tingog, ug pagpabilin kaniya.’ Kon hinumdoman nato kini sa dihang nagabuhat sa atong ministeryo, kita sa pagkatinuod nakigtambayayong sa Diyos sa pagkabig sa mga tawo nganha kaniya.
Isigkamagbubuhat sa Diyos
13, 14. (a) Sumala sa 1 Corinto 3:5-9, sa unsang paagi kita mahimong mga isigkamagbubuhat sa Diyos? (b) Kang kinsa angayng mahiadto ang pasidungog alang sa bisan unsang uswag sa gidaghanon, ug ngano?
13 Gihulagway ni Pablo ang pagpakigtambayayong sa Diyos pinaagi sa paghisgot sa pagtikad sa usa ka uma. Misulat siya: “Nan, unsa ba si Apolos? Oo, unsa ba si Pablo? Mga ministro pinaagi kang kinsa kamo nahimong mga magtutuo, ingon gayod sa gihatag sa Ginoo sa matag usa. Nagtanom ako, gibisibisan ni Apolos, apan padayong gipatubo kini sa Diyos; mao nga dili siya nga nagatanom ang hinungdanon ni siya nga nagabisibis, kundili ang Diyos nga maoy nagapatubo niini. Karon siya nga nagatanom ug siya nga nagabisibis usa ra, apan ang matag tawo magadawat sa iyang kaugalingong ganti sumala sa iyang kaugalingong kahago. Kay kami mga isigkamagbubuhat sa Diyos. Kamo mao ang uma sa Diyos ilalom sa pagtikad.”—1 Corinto 3:5-9.
14 Ingong isigkamagbubuhat sa Diyos, kinahanglang matinumanon natong itanom “ang pulong sa gingharian” diha sa mga kasingkasing sa mga tawo, unya bisibisan ang bisan unsang interes nga ipakita pinaagi sa pinalandong-pag-ayo nga mga balik-duaw ug mga pagtuon sa Bibliya. Kon ang yuta, ang kasingkasing, maayo, himoon ni Jehova ang iyang bahin pinaagi sa pagpatubo sa binhi sa kamatuoran sa Bibliya ngadto sa usa ka mabungahong tanom. (Mateo 13:19, 23) Iyang kabigon ang maong tawo nganha kaniya ug sa iyang Anak. Nan, sa pangataposang katin-awan, ang bisan unsang uswag sa gidaghanon sa mga magmamantala sa Gingharian maoy tungod sa pagbuhat ni Jehova diha sa mga kasingkasing sa mga tawo, nga ginapatubo ang binhi sa kamatuoran ug ginakabig sila nganha kaniya ug sa iyang Anak.
Buhat sa Pagpanukod nga Magpabilin
15. Unsang ilustrasyon ang gigamit ni Pablo sa pagpakita kon sa unsang paagi kita nagtabang sa uban sa pagpalambo sa pagtuo?
15 Samtang magakalipay sa uswag sa gidaghanon, kita sinserong nagtinguha nga makita ang mga tawo nga magpadayon sa paghigugma kang Jehova, pagpatalinghog sa iyang tingog, ug pagpabilin kaniya. Masubo kita sa dihang atong makita nga ang pipila mabugnaw ug mobiya. May mahimo ba kita sa pagsanta niini? Sa laing ilustrasyon, gipakita ni Pablo kon sa unsang paagi makatabang kita sa uban sa pagpalambo sa pagtuo. Misulat siya: “Walay tawo nga makapahilunag bisan unsa pang laing patukoranan kay sa unsay napahiluna na, nga mao si Jesu-Kristo. Karon kon may usa nga nagatukod diha sa patukoranan ug bulawan, pilak, bililhong mga bato, kahoy nga materyales, uhot, dagami, madayag ang buhat sa matag usa, kay ang adlaw magpadayag man niini, tungod kay kini igapadayag pinaagi sa kalayo; ug ang kalayo mismo magpamatuod kon unsa nga matang ang buhat sa matag usa.”—1 Corinto 3:11-13.
16. (a) Sa unsang paagi ang duha ka ilustrasyon nga gigamit ni Pablo magkalahi sa tumong? (b) Sa unsang paagi ang atong buluhaton sa pagtukod mahimong mosangpot nga dili kahimut-anan ug dili makasagubang sa kalayo?
16 Sa ilustrasyon ni Pablo sa uma, ang pagtubo nag-agad sa binuotang pagtanom, sa makanunayong pagbisibis, ug sa pagpanalangin sa Diyos. Ang laing ilustrasyon sa apostol nagpasiugda sa responsabilidad sa Kristohanong ministro kon unsay mahitabo sa iyang gitukod. Nagtukod ba siya ibabaw sa usa ka lig-ong patukoranan nga gigamit ang de-kalidad nga materyales? Si Pablo nagpasidaan: “Padayong pabantaya ang matag usa kon sa unsang paagi siya nagatukod diha niini.” (1 Corinto 3:10) Kay nakapukaw na sa interes sa usa ka tawo pinaagi sa pagsugilon kaniya mahitungod sa paglaom sa walay-kataposang kinabuhi diha sa Paraiso, ginapunting ba nato ang atong pagpanudlo diha lamang sa mga paninugdang kahibalo sa Kasulatan ug unya ibutang ang pasiugda ilabina diha sa kon unsay pagabuhaton sa tawo aron mabatonan ang kinabuhing dayon? Ang ato bang pagtudlo nalangkoban lamang niini: ‘Kon buot nimong mabuhi sa walay kataposan sa Paraiso, kinahanglang magtuon ka, motambong sa mga tigom, ug makig-ambit sa buluhatong pagsangyaw’? Kon mao, kita wala magtukod sa pagtuo sa tawo ibabaw sa lig-ong patukoranan, ug ang atong ginatukod basin dili makasukol sa kalayo sa mga pagsulay o makalahutay sa paglabay sa panahon. Ang pagsulay sa pagkabig sa mga tawo ngadto kang Jehova pinaagi lamang sa paglaom sa kinabuhi sa Paraiso isip baylo sa pipila ka tuig nga nagugol sa pag-alagad kaniya maoy sama sa pagtukod nga gigamit ang “kahoy nga materyales, uhot, dagami.”
Pagpalig-on sa Gugma Alang sa Diyos ug Kang Kristo
17, 18. (a) Unsay labing hinungdanon aron makalahutay ang pagtuo sa usa ka tawo? (b) Sa unsang paagi makatabang kita sa usa ka tawo aron si Kristo mopuyo diha sa iyang kasingkasing?
17 Aron molahutay ang pagtuo, kinahanglang ipasukad kini sa personal nga relasyon uban kang Jehova nga Diyos pinaagi ni Jesu-Kristo. Ingong dili-hingpit nga mga tawo, makab-ot nato ang maong makigdaitong relasyon uban sa Diyos pinaagi lamang sa iyang Anak. (Roma 5:10) Hinumdoming si Jesus miingon: “Walay makaabot sa Amahan gawas kon pinaagi kanako.” Sa pagtabang sa uban nga mapalig-on ang pagtuo, “walay tawo ang makapahiluna sa bisan unsa pang laing patukoranan gawas sa unsay napahiluna na, nga mao si Jesu-Kristo.” Unsay nalangkit niini?—Juan 14:6; 1 Corinto 3:11.
18 Ang pagtukod diha kang Kristo isip patukoranan nagpasabot sa pagtudlo sa paaging ang estudyante sa Bibliya makaugmad sa lalom nga gugma alang kang Jesus pinaagi sa bug-os nga kahibalo sa Iyang papel ingon nga Manunubos, Ulo sa kongregasyon, mahigugmaong Hataas nga Saserdote, ug nagamandong Hari. (Daniel 7:13, 14; Mateo 20:28; Colosas 1:18-20; Hebreohanon 4:14-16) Nagpasabot kini nga si Jesus himoon nga tinuod kaayo alang kanila nga siya magapuyo diha sa ilang mga kasingkasing. Ang atong pag-ampo alang kanila angayng sama sa pangaliyupo ni Pablo alang sa mga Kristohanon sa Efeso. Misulat siya: “Akong ginapiko ang akong mga tuhod ngadto sa Amahan, . . . sa tuyo nga iya untang itugot kaninyo . . . aron mopuyo ang Kristo pinaagi sa inyong pagtuo diha sa inyong mga kasingkasing uban sa gugma; aron kamo makagamot ug matukod ibabaw sa patukoranan.”—Efeso 3:14-17.
19. Unsay angay nga resulta sa pagpalambo sa gugma alang kang Kristo diha sa mga kasingkasing sa atong mga estudyante sa Bibliya, apan unsay kinahanglang itudlo?
19 Kon magtukod kita sa paagi nga ang gugma alang kang Kristo molambo diha sa mga kasingkasing sa atong mga estudyante, makataronganong kini mosangpot sa pagpalig-on sa gugma alang kang Jehova nga Diyos. Ang gugma, pagbati, ug kahangawa ni Jesus maoy tinuod nga banaag sa mga hiyas ni Jehova. (Mateo 11:28-30; Marcos 6:30-34; Juan 15:13, 14; Colosas 1:15; Hebreohanon 1:3) Busa samtang ang mga tawo makaila ug makahigugma kang Jesus, sila makaila ug makahigugma kang Jehova.a (1 Juan 4:14, 16, 19) Gikinahanglang tudloan nato ang mga estudyante sa Bibliya nga si Jehova maoy nagpaluyo sa tanang nahimo ni Kristo alang sa katawhan ug busa angayan Siya sa atong mga pasalamat, pagdayeg, ug pagsimba ingon nga “Diyos sa atong kaluwasan.”—Salmo 68:19, 20; Isaias 12:2-5; Juan 3:16; 5:19.
20. (a) Sa unsang paagi makatabang kita sa mga tawo nga maduol sa Diyos ug sa iyang Anak? (b) Unsay pagahisgotan sa sunod nga artikulo?
20 Ingon nga isigkamagbubuhat sa Diyos, atong tabangan ang mga tawo nga maduol kaniya ug sa iyang Anak, nga tabangan sila sa pagpalambo sa gugma ug pagtuo diha sa ilang mga kasingkasing. Sa ingon si Jehova mahimong tinuod alang kanila. (Juan 7:28) Pinaagi ni Kristo, sila makaarang sa pagtukod ug suod nga relasyon uban sa Diyos, ug sila mahigugma kaniya ug magpabilin kaniya. Sila dili magbutang ug mga tagal sa ilang mahigugmaong pag-alagad, nga magpasundayag sa pagtuo nga matuman ang kahibulongang mga saad ni Jehova sa gitakda niyang panahon. (Lamentaciones 3:24-26; Hebreohanon 11:6) Apan, samtang magatabang sa uban sa pagpalambo sa pagtuo, paglaom, ug gugma, kinahanglang palig-onon nato ang atong kaugalingong pagtuo aron kini mahisama sa lig-ong barko nga arang makasagubang sa kusog nga mga bagyo. Pagahisgotan kini sa sunod nga artikulo.
[Footnote]
a Usa ka ekselenteng tabang aron labaw pang mailhan si Jesus ug pinaagi kaniya, ang iyang Amahan, si Jehova, mao ang librong Ang Labing Bantogang Tawo nga Nabuhi Sukad, nga gipatik sa Watchtower Bible and Tract Society of New York, Inc.
Agig Pagsubli
◻ Sa unsang paagi sagad ginapukaw nato ang interes sa mga tawo diha sa mensahe sa Gingharian, apan unsang kapeligrohan ang naglungtad?
◻ Unsang matanga sa mga tawo ang ginakabig ni Jehova nganha kaniya ug sa iyang Anak?
◻ Ang pagsulod sa Israel ngadto sa Yutang Saad nag-agad sa unsa, ug unsay atong makat-onan gikan niini?
◻ Unsang papel ang atong ginadula sa pagtabang sa mga tawo nga maduol kang Jehova ug sa iyang Anak?
[Hulagway sa panid 10]
Bisan pag atong ginapaabot ngadto sa mga tawo ang paglaom sa walay-kataposang kinabuhi sa Paraiso, ang atong pangunang tumong mao nga maduol sila kang Jehova
[Mga hulagway sa panid 13]
Ang atong mga pagbalik-duaw mahimong epektibo kaayo kon mangandam kitag maayo