Interpretasyon sa Bibliya—Kang Kinsang Impluwensiya?
ANG usa ka kahubitan sa pulong “pag-interpretar” maoy “pagsabot sumala sa kahayag sa indibiduwal nga pagtuo, paghukom, o kahimtang.” (Webster’s Ninth New Collegiate Dictionary) Busa, ang interpretasyon sa usa sagad impluwensiyado sa kagikan, edukasyon, ug pagmatuto sa usa.
Apan, komosta ang bahin sa interpretasyon sa Bibliya? Libre ba kita sa pagpatin-aw sa mga teksto sa Bibliya sumala sa atong kaugalingong “pagtuo, paghukom, o kahimtang”? Natural, ang kadaghanang eskolar ug mga maghuhubad sa Bibliya nangangkon nga sila dili mohimo niini kondili nga sila gitultolan sa Diyos.
Usa ka pananglitan mao kanang giingon diha sa potnot sa Juan 1:1 sa A New Version of the Four Gospels, nga gipatik sa 1836 ni John Lingard ubos sa takobang ngalang “Usa ka Katoliko.” Kini nag-ingon: “Ang mga tawo sa tanang matang sa tinuohan nagtuo nga ilang nakaplagan ang pamatuod sa ilang lahi nga mga opinyon diha sa sagradong mga tomo: kay, sa pagkatinuod, dili ang Kasulatan ang naghatag kanilag impormasyon, kondili ilang gibutang ang ilang kaugalingong interpretasyon sa Kasulatan.”
Bisan pag may katarongan, unsa may katuyoan sa magsusulat? Ang iyang komento maoy sa pagpalig-on sa iyang interpretasyon nianang bersikuloha, diin iyang gihubad: “Sa sinugdanan mao ‘ang pulong;’ ug ‘ang pulong’ uban sa Diyos; ug Diyos ‘ang pulong,’” usa ka naandang Trinitaryanhong paghubad.
Unsay nagtukmod sa magsusulat sa paghubad sa Juan 1:1 agig pagpaluyo sa doktrinang Trinidad? Ang ‘Kasulatan ba ang nagpahibalo’ kaniya sa paghubad niana? Imposible kana, kay dili gayod makita diha sa Bibliya ang pagtulon-ang Trinidad. Matikdi kon unsay giingon sa The New Encyclopædia Britannica mahitungod niining puntoha: “Dili makita ang pulong Trinidad ni ang espesipikong doktrina diha sa Bag-ong Testamento.” Dugang pa, ang propesor sa Yale University nga si E. Washburn Hopkins nag-ingon: “Si Jesus ug Pablo dayag nga wala gayod mahibalo bahin sa doktrinang trinidad; . . . sila walay giingon bahin niana.”
Nan, unsay atong ikahinapos labot niadtong nagpaluyo sa Trinitaryanhong paagi sa paghubad sa Juan 1:1 o sa bisan haing ubang bersikulo sa Bibliya? Sumala sa kaugalingong sukdanan ni G. Lingard, “dili ang Kasulatan ang naghatag kanilag impormasyon, kondili ilang gibutang ang ilang kaugalingong interpretasyon sa Kasulatan.”
Makapalipay, kita adunay Pulong sa Diyos nga mogiya kanato bahin niini. “Hibaloi ninyo kini nga una,” miingon si apostol Pedro, “nga walay propesiya sa Kasulatan nga nagsumikad sa kinaugalingong pagbadbad. Kay ang propesiya wala sa bisan kanus-a gipadangat pinaagi sa kabubut-on sa tawo, hinunoa namulong ang mga tawo gikan sa Diyos samtang giagak sila sa balaang espiritu.”—2 Pedro 1:20, 21.