Ang Atong Pagtinguhag Mas Hataas nga Kinabuhi

“Ang tawo, nga natawo gikan sa babaye, mubog-kinabuhi ug puno sa kasamok. Sama sa usa ka bulak siya mobuswak ug pagaputlon, ug siya modagan sama sa anino ug mahanaw.”​—Job 14:1, 2.

BISAN sa panahon karon pipila lang ang mosupak niining ideya bahin sa pagkamubo sa kinabuhi, bisan pag gisulat kini sa mga 3,500 ka tuig na kanhi. Nakita kanunay sa mga tawo nga dili makalipay ang pagtilaw makadiyot sa kinapungkayan sa kinabuhi ug dayon matigulang ug mamatay. Busa, ang mga paagi sa pagpataas sa kinabuhi mikaylap sa tibuok nga kasaysayan.

Sa panahon ni Job ang mga Ehiptohanon mokaon ug itlog sa hayop sa walay kapuslanang pagpaningkamot nga mobalik ang ilang pagkabatan-on. Usa sa pangunang mga tumong sa siyensiya sa kemika sa panahon sa Edad Media mao ang paggamag ilimnon nga mohatag ug hataas nga kinabuhi. Daghang kemiko sa Edad Media nagtuo nga ang artipisyal nga pagkagamang bulawan makahatag ug walay kataposang kinabuhi ug ang pagkaon gikan sa mga platong bulawan makapataas sa kinabuhi. Ang karaang mga Taoistang Insek nagtuo nga mahimo silang makausab sa kemistriya sa lawas pinaagi sa paggamit ug mga teknik sama sa pagpamalandong, mga ehersisyo sa pagginhawa, ug pagkaon ug sa ingon makabaton ug walay kataposang kinabuhi.

Ang eksplorador nga Katsila nga si Juan Ponce de León nailhan sa iyang way-katagbawang pagpangitag tuboran sa pagkabatan-on. Usa ka ika-18ng-siglong doktor nagrekomendar diha sa iyang librong Hermippus Redivivus nga ang batan-ong mga dalagang ulay ibutang sa gamayng lawak sa panahong tingpamulak ug ang ilang gininhawa tigomon diha sa mga botelya ug gamiton ingong mga ilimnong makapalugway ug kinabuhi. Di na kinahanglang isulti pa, walay usa niining mga pamaagi ang milampos.

Karong panahona, duolan sa 3,500 ka tuig human marekord ni Moises ang mga pulong ni Job, ang tawo nakalakaw na sa bulan, nakaimbento ug mga sakyanan ug mga kompiyuter, ug nakapanukiduki sa atomo ug selula. Apan, bisan pa sa tanang teknikal nga mga kauswagan, kita nagpabilin gihapong “mubog-kinabuhi ug puno sa kasamok.” Tinuod nga diha sa ugmad nga mga nasod ang gitas-on sa kinabuhi kusog nga miuswag sa nangaging siglo. Apan kini sa panguna maoy resulta sa nag-uswag nga pag-atiman sa panglawas, mas epektibong mga paagi sa kahindik, ug mas maayong pagkaon. Pananglitan, gikan sa tungatunga sa ika-19ng siglo ngadto sa sinugdanan sa katuigang 1990, ang aberids nga gitas-on sa kinabuhi sa Sweden misaka gikan sa 40 ngadto sa 75 anyos alang sa mga lalaki ug gikan sa 44 ngadto sa 80 anyos alang sa mga babaye. Apan nagpasabot ba kini nga nakab-ot ang tinguha sa tawo nga makabaton ug hataas nga kinabuhi?

Wala, tungod kay bisan tuod sa ubang nasod mas daghang tawo ang nakabaton ug taastaas nga kinabuhi, ang mga pulong ni Moises nga gisulat mga katuigan kanhi aplikado gihapon: “Ang gitas-on sa atong mga adlaw maoy kapitoan ka tuig; ug kon tungod sa linaing kabaskog kini maoy kawaloan ka tuig . . . , kay kini sa kalit moagi, ug manglupad kita.” (Salmo 90:10) Sa haduol nga umaabot, makakita ba unya kita ug kausaban? Ang tawo kaha makabaton ug hataas nga kinabuhi? Ang sunod nga artikulo maghisgot niining mga pangutanaha.