Pagpasaylo Gikan sa Imong Kasingkasing
“Sa samang paagi usab ang akong langitnong Amahan makiglabot kaninyo kon ang matag usa kaninyo dili magpasaylo sa iyang igsoon gikan sa inyong mga kasingkasing.”—MATEO 18:35.
1, 2. (a) Sa unsang paagi gipakita sa iladong makasasala ang iyang pagpabili kang Jesus? (b) Unsang punto ang giasoy ni Jesus agig tubag?
TINGALI siya usa ka babaye nga mubog-lupad, dili usa nga imong madahom nga makita diha sa balay sa usa ka tawong relihiyoso. Kon ang uban nakurat sa pagkakita kaniya didto, ang iyang gihimo labaw pang makakurat. Iyang giduol ang usa ka tawo nga hataas kaayo ug sukdanan sa pamatasan ug nagpasundayag sa iyang pagpabili sa mga buhat niining tawhana, naghugas sa iyang mga tiil pinaagi sa iyang mga luha ug gipauga kini pinaagi sa iyang buhok.
2 Wala ayri niadtong tawhana, nga si Jesus, kining babayehana, nga “nailhan sa siyudad ingong makasasala.” Apan si Simon nga Pariseo, nga maoy tag-iya sa balay, nabalaka nga siya makasasala. Si Jesus mitubag pinaagi sa pag-asoy bahin sa duha ka tawo nga may utang sa tigpahulam. Ang usa dakog utang—duolan sa duha ka tuig nga suweldo sa usa ka mamumuo. Ang lain nakautang ug ikanapulong bahin niana—halos katumbas sa tulo ka bulang suweldo. Sa dihang ang duha wala makabayad, ang tigpahulam ‘dagayang nagpasaylo kanilang duha.’ Tin-aw, ang usa nga gipasaylog daghan mas dakog katarongan sa pagsanong diha sa gugma. Human sa pagpaamgid sa malulotong buhat sa babaye, gidugang ni Jesus ang prinsipyo: “Siya nga gipasaylog diyutay, mahigugmag diyutay.” Dayon iyang gisultihan ang babaye: “Ang imong mga sala gipasaylo.”—Lucas 7:36-48.
3. Unsa ang angay natong hunahunaon labot sa atong kaugalingon?
3 Pangutan-a ang imong kaugalingon, ‘Kon ako pa kadtong babayhana o kon ako pa ang anaa sa samang kahimtang ug gipakitaan ako ug kaluoy, nan ako ba mapintasong dili mopasaylo sa uban?’ Tingali ikaw motubag, ‘Dili gayod!’ Bisan pa, nagtuo ka ba gayod nga ikaw mapinasayloon? Mao ba gayod kanay imong kinaiya? Daghan na bang higayon nga andam kang mipasaylo, ug matawag ka ba sa uban nga mapinasayloon? Atong tan-awon kon nganong kini angay hatagan sa matag usa kanato sa atong tinuoray, mahinuktokong pagtagad.
Pasaylo Gikinahanglan—Ug Gipakita Kanato
4. Unsang kamatuoran bahin sa atong kaugalingon ang angay natong dawaton?
4 Ikaw dili-hingpit, nahibalo ka gayod niana. Kon pangutan-on, ikaw modawat pa niini, nga tingali mahinumdom sa mga pulong nga makita diha sa 1 Juan 1:8: “Kon kita mopahayag: ‘Kita walay sala,’ atong ginapahisalaag ang atong kaugalingon ug wala kanato ang kamatuoran.” (Roma 3:23; 5:12) Alang sa uban, ang pagkamakasasala tingali napasundayag pinaagi sa grabe, makakurat nga mga sala. Apan bisan pag dili ka sad-an nga sama niana nga tinuyo, tino nga dihay daghang higayon ug mga paagi nga wala ka makaabot sa sukdanan sa Diyos—ikaw nakasala. Dili ba tinuod?
5. Alang sa unsa nga kita angay magmapasalamaton sa Diyos?
5 Busa, ang imong kahimtang tingali parehas nianang gihubit ni apostol Pablo: “Bisan ug kamo patay diha sa inyong mga kalapasan ug diha sa kahimtang nga dili-tinuli sa inyong unod, ang Diyos nagbuhi kaninyo nga tingob uban kaniya [Jesus]. Siya malulotong nagpasaylo kanato sa tanan natong kalapasan.” (Colosas 2:13; Efeso 2:1-3) Matikdi ang mga pulong “nagpasaylo kanato sa tanan natong kalapasan.” Daghan kaayo ang nalangkit niana. Ang matag usa kanato adunay maayong katarongan sa pagpangaliyupo sama kang David: “Tungod sa imong ngalan, Oh Jehova, pasayloa ang akong sala, kay kini hilabihan ka dako.”—Salmo 25:11.
6. Unsay atong matino labot kang Jehova ug sa pagpasaylo?
6 Sa unsang paagi ikaw—o si bisan kinsa kanato—mapasaylo? Ang basehanan mao nga si Jehova nga Diyos mapinasayloon. Kana maoy kinaiyahan sa iyang personalidad. (Exodo 34:6, 7; Salmo 86:5) Masabot, ang Diyos nagdahom nga kita modangop kaniya diha sa pag-ampo ug mangayo sa iyang pasaylo, mohangyo nga iya kitang pasayloon. (2 Cronicas 6:21; Salmo 103:3, 10, 14) Ug siya nakahikay ug legal nga basehanan sa pagpaabot sa maong pasaylo—ang halad lukat ni Jesus.—Roma 3:24; 1 Pedro 1:18, 19; 1 Juan 4:9, 14.
7. Sa unsang paagi angay nimong sundogon si Jehova?
7 Imong makita ang pagkaandam sa Diyos nga mopasaylo ingong sumbanan kon sa unsang paagi angay nimong pagatagdon ang ubang mga tawo. Gipasiugda kini ni Pablo, nga nagsulat: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” (Efeso 4:32) Walay duhaduha nga ang punto ni Pablo nalangkit sa atong pagkakat-on gikan sa panig-ingnan sa Diyos, tungod kay ang sunod nga bersikulo nagpadayon: “Busa, pagkahimong mga tigsundog sa Diyos, ingon nga hinigugmang mga anak.” (Efeso 5:1) Nakita ba nimo ang koneksiyon? Si Jehova nga Diyos nagpasaylo kanimo, busa—si Pablo kusganong nangatarongan—ikaw angay nga mosundog Kaniya ug “magmabination uban ang kalumo, bukas nga magapasaylo” sa uban. Apan pangutan-a ang imong kaugalingon, ‘Gihimo ba nako kana? Kon dili nako kini kinaiya, ako ba naningkamot nga mahimong ingon, nga tinuod gayod nga nakigbisog sa pagsundog sa Diyos sa pagkahimong mapinasayloon?’
Kita Kinahanglang Makigbisog sa Pagkahimong Mapinasayloon
8. Unsa ang angay natong ilhon kon bahin sa kalangkoban sa atong kongregasyon?
8 Maayo gayod hunahunaon nga diha sa Kristohanong kongregasyon, dunay pipila ka higayon nga kinahanglan natong ipakita ang diyosnong dalan sa pagpasaylo. Ang bali mao ang tinuod. Ingnon ta, ang atong Kristohanong mga igsoong lalaki ug babaye naningkamot sa pagsundog sa sumbanan ni Jesus sa gugma. (Juan 13:35; 15:12, 13; Galacia 6:2) Sila dugay nang naningkamot, ug nagpadayon sa pagpaningkamot, sa pagtalikod sa mga paagi sa paghunahuna, pagsulti, ug paglihok nga maoy naandan niining daotang kalibotan. Sila buot gayod nga magpasundayag sa bag-ong personalidad. (Colosas 3:9, 10) Bisan pa, dili nato ikasalikway ang kamatuoran nga ang tibuok-kalibotan nga kongregasyon, ug matag usa ka lokal nga kongregasyon, gilangkoban sa mga tawong dili-hingpit. Tanantanan, sila mas maayo kay sa ilang kahimtang kaniadto, bisan pa niana sila dili gihapon hingpit.
9, 10. Nganong dili kita angay mahibulong kon may problemang motungha taliwala sa mga igsoon?
9 Diha sa Bibliya, ang Diyos tinuyong nagsulti kanato nga kita makalaom ug dili-kahingpitan diha sa kongregasyon, taliwala sa atong mga brader ug sister. Palandonga, pananglitan, ang mga pulong ni Pablo nga narekord diha sa Colosas 3:13: “Padayon nga mag-inantosay sa usag usa ug bukas nga magpinasayloay sa usag usa kon ang usa may hinungdan sa pagreklamo batok sa lain. Maingon gayod nga si Jehova bukas nga nagpasaylo kaninyo, buhata usab ninyo ang ingon.”
10 Labawng hinungdanon, ang Bibliya dinhi nagpahinumdom kanato sa koneksiyon tali sa pagpasaylo sa Diyos kanato ug sa atong obligasyon ug panginahanglan nga magmapinasayloon sa uban. Nganong problema man kini? Tungod kay si Pablo midawat nga basin adunay tawo nga “may hinungdan sa pagreklamo batok sa lain.” Siya nahibalo nga mahitabo kining butanga. Seguradong nahitabo kini sa unang siglo, bisan taliwala sa “mga balaan” nga mga Kristohanon, nga may ‘paglaom nga gigahin alang kanila didto sa mga langit.’ (Colosas 1:2, 5) Busa mahunahuna ba nato nga lahi karon sanglit ang kadaghanan sa tinuod nga mga Kristohanon walay pamatuod sa espiritu nga sila maoy “mga pinili sa Diyos, balaan ug hinigugma”? (Colosas 3:12) Busa, dili kita angay moingon nga aduna gayoy dakong sayop kon diha sa atong kongregasyon dunay mga hinungdan sa pagreklamo—mga kahiubos tungod sa tinuod o ginaingong mga sayop.
11. Bahin sa unsa nga kita gipasidan-an sa tinun-ang si Santiago?
11 Ang mga pulong sa igsoon ni Jesus sa inahan nga si Santiago nagpakita usab nga angay natong dahomon nga tingali makaatubang kita usahay ug mga kahimtang nga kinahanglang pasayloon nato ang atong mga igsoon. “Kinsa ang maalamon ug masinaboton taliwala kaninyo? Ipakita niya gikan sa iyang maayong panggawi ang iyang mga buhat uban ang kalumo nga iya sa kaalam. Apan kon kamo adunay mapait nga pangabugho ug pagkamatigion diha sa inyong mga kasingkasing, ayaw pagpanghambog ug pagpamakak batok sa kamatuoran.” (Santiago 3:13, 14) “Mapait nga pangabugho ug pagkamatigion” diha sa mga kasingkasing sa tinuod nga mga Kristohanon? Oo, ang mga pulong ni Santiago klarong nagsugyot nga kana mitungha sa unang-siglong kongregasyon ug motungha usab kana karon.
12. Unsang problema ang mitungha sa karaang kongregasyon sa Filipos?
12 Usa ka tinuod nga pananglitan nalangkit sa duha ka dinihogang mga Kristohanon nga may maayog dungog nga nagkugi uban kang Pablo. Ikaw tingali mahinumdom nga nakabasa bahin kang Euodia ug Sintique, mga membro sa kongregasyon sa Filipos. Bisag wala hisgoti ang detalye, ang Filipos 4:2, 3 nagpakita nga silang duha may problema. Kini ba nagsugod sa wala hunahunaa, masakit nga komento, gihunahunaang pag-insulto sa usa ka paryente, o usa ka pasundayag sa maindigong kasina? Bisan unsa may nakaingon niini, midako kini nga si Pablo nakadungog niini sa halayong Roma. Tingali kining duha ka espirituwal nga mga igsoong babaye wala na magtingganay, nga tungod niini sila nagpalayo sa usag usa diha sa mga tigom o nagsultig masakit bahin sa usag usa ngadto sa ilang mga higala.
13. Unsa malagmit ang nakasulbad sa problema ni Euodia and Sintique, nga naghatag ug unsang pagtulon-an alang kanato?
13 Pamilyar bang pamation ang bisan hain niana, sama sa nahitabo tali sa pipila diha sa imong kongregasyon o usa ka kahimtang nga ikaw nalangkit? Usa ka problema nga susama niana tingali nahitabo bisan karon sa usa ka sukod. Unsay atong mahimo? Sa karaang kaso, giagda ni Pablo kadtong duha ka dedikadong mga igsoong babaye nga “magbaton ug samang kaisipan diha sa Ginoo.” Silang duha tingali miuyon sa paghisgot sa problema, sa pagsulbad sa panagbingkil, sa pagsulti sa ilang pagkaandam nga mopasaylo, ug unya aktuwal nga sundogon ang mapinasayloong tinamdan ni Jehova. Walay laing mahunahuna gawas nga si Euodia ug Sintique milampos, ug kita usab mahimong molampos. Ang maong mapinasayloong tinamdan mahimong ipadapat karon nga malamposon.
Pakig-uli—Pagpasaylo
14. Nganong posible gayod ug labing maayo nga ipalabay na lang ang personal nga panagbingkil?
14 Unsa gayoy gikinahanglan sa pagpasaylo kon ikaw dunay problema sa laing Kristohanon? Sa pagkatinuod, walay usa ka yanong paagi, apan ang Bibliya nagtanyag ug makatabang nga mga panig-ingnan ug realistikong tambag. Ang pangunang rekomendasyon—bisag dili sayon nga dawaton ug ipadapat—mao ang yanong pagkalimot sa panagbingkil, ipalabay na lang kini. Kasagaran kon motungha ang problema, sama sa nahitabo kang Euodia ug Sintique, ang tagsatagsa mobati nga kadtong usa ang sayop o mao gayod ang sad-an. Busa sa kahimtang nga sama niini, maghunahuna tingali ka nga ang maong Kristohanon mao gayod ang mabasol o nakahimog mas dakong kadaot. Bisan pa niana, ikaw ba makahimo sa pagtapos sa panagbingkil pinaagi sa pagpasaylo? Sayra nga kon, ug kini maoy dakong kon, kadtong usa nga Kristohanon mao gayod ang sad-an, ikaw ang anaa sa dakong posisyon sa pagpalabay na lang sa panagbingkil ingong napasaylo ug natapos na.
15, 16. (a) Sa unsang paagi gihubit ni Miqueas si Jehova? (b) Unsay kahulogan sa ‘pagpalabay [sa Diyos] sa kalapasan’?
15 Dili nato wad-on sa panan-aw ang Diyos ingong atong panig-ingnan sa pagpasaylo. (Efeso 4:32–5:1) Mahitungod sa Iyang sumbanan sa pagpalabay sa mga kasaypanan, ang manalagnang Miqueas nagsulat: “Kinsa ba ang usa ka Diyos nga sama kanimo, ang usa nga nagapasaylo sa kasaypanan ug nagapalabay sa kalapasan sa nahibilin sa iyang panulondon? Siya dili magpabilin sa iyang kasuko sa walay kataposan, kay siya nahimuot sa mahigugmaong-kalulot.”—Miqueas 7:18.
16 Pinaagi sa paghubit kang Jehova ingong usa nga “nagapalabay sa kalapasan,” ang Bibliya wala mag-ingon nga siya walay katakos sa paghinumdom sa mga sayop, nga dunay usa ka matang sa sakit sa pagkalimot nga mapilion. Tagda ang mga kaso ni Samson ug David, diin ang duha nakahimog dagkong mga sayop. Ang Diyos nahinumdom niadtong mga salaa bisan dugay nang nahitabo; bisan kita nahibalo sa uban nilang mga sala tungod kay gipasulat kini ni Jehova diha sa Bibliya. Bisan pa, ang atong mapinasayloong Diyos nagpakitag kaluoy niining duha, nga naghimo kanila ingong atong panig-ingnan sa pagtuo nga pagasundogon.—Hebreohanon 11:32; 12:1.
17. (a) Unsang mga paagi ang makatabang kanato sa pagpalabay sa mga sayop, o kasal-anan, sa uban? (b) Kon kita maningkamot sa paghimo niana, sa unsang paagi kita nagasundog kang Jehova? (Tan-awa ang potnot.)
17 Oo, si Jehova nakahimo sa ‘pagpalabay’a sa mga kalapasan, ingon sa masubsob nga gipangaliyupo ni David kaniya. (2 Samuel 12:13; 24:10) Kita ba makasundog sa Diyos niining bahina, nga andam mopalabay sa mga pag-insulto ug kasal-anan nga nahimo sa atong kaubang mga alagad ingong dili-hingpit nga mga tawo? Handurawa ang imong kaugalingon nga nagsakay sa ayroplanong jet nga nagsugod sa paglupad diha sa landiganan. Sa mitan-aw sa ubos, imong nakita duol sa landiganan ang usa ka kaila nga walay tahod nga nanghiwi samag bata. Nahibalo ka nga siya nasuko ug tingali ikaw ang anaa sa iyang hunahuna. O kaha wala gayod siya maghunahuna kanimo. Bisan pa, samtang miliyok ang ayroplano aron makasaka, miagi ka ibabaw sa babaye, nga karon daw usa na lamang ka patak. Sa usa ka oras gatosgatos ka kilometros na ang imong kalayoon, ug ang iyang makalagot nga panghiwi nakalimtan na nimo. Sa susama, daghang higayon nga kita matabangan sa pagpasaylo kon kita maningkamot nga mahisama kang Jehova ug maalamong magpalabay sa sala. (Proverbio 19:11) Dili ba ang pagkasilo daw gamay na kaayo napulo ka tuig gikan karon o duha ka gatos ka tuig ngadto sa Milenyo? Nganong dili na lang kini ipalabay?
18. Kon kita daw dili makapalabay sa sala, unsang tambag ang atong ikapadapat?
18 Apan, usahay, ikaw tingali nakaampo sa maong butang ug misulay sa pagpasaylo, apan mibati nga dili ka makapasaylo. Nan unsa? Si Jesus nag-awhag sa pagduol sa maong tawo ug maningkamot nga masulbad ang panagbingkil nga kamokamo ra aron motunhay ang kalinaw. “Nan, kon ikaw magdala sa imong gasa sa halaran ug didto mahinumdom ka nga ang imong igsoon may unsa mang butang batok kanimo, biyai ang imong gasa atubangan sa halaran, ug lakaw; pakigdait una sa imong igsoon, ug unya, sa makabalik ka na, itanyag ang imong gasa.”—Mateo 5:23, 24.
19. Unsang tinamdan ang angay natong huptan ug unsang tinamdan ang angay natong likayan samtang makig-uli kita sa atong igsoon?
19 Labawng hinungdanon, si Jesus wala moingon nga adtoa ang imong igsoon aron sa pagkombinsir kaniya nga ikaw ang husto ug nga siya ang sayop. Tingali, siya ang sayop. Dakog kalagmitan nga adunay sayop ang matag usa. Bisan hain niini, ang tumong sa panagsultihay angay nga dili kay paangkonon ang maong tawo sa pagdawat sa sayop, padungoon siya, ingnon ta. Kon mao kanay imong paagi sa pagpakigsulti, seguradong dili gayod kini molampos. Sa magsultihanay dili kinahanglang balikon pa ang tanang detalye labot sa tinuod ug gihunahunang sala. Sa madayag diha sa kalmadong pagsultihanay inubanan sa espiritu sa Kristohanong gugma nga ang makasubong di-pagsinabtanay maoy nakaingon sa problema, paningkamoti ninyong duha nga kana masulbad. Apan bisan kon dili mosangpot ang panagsultihanay ug bug-os nga panag-uliay, hinungdanon ba gayod kana? Dili ba mas maayo nga kamo sa labing menos magkauyon nga kamong duha tim-os nga nagtinguha sa pag-alagad sa atong mapinasayloong Diyos? Kon inyong atubangon kanang kamatuorana, mas masayon alang sa matag usa ang pag-ingon sa kinasingkasing, “Pasayloa ako nga sa atong pagkadili-hingpit kita nagkabingkil. Palihog, ato na lang kining ipalabay.”
20. Unsay atong makat-onan gikan sa panig-ingnan sa mga apostoles?
20 Hinumdomi nga ang mga apostoles nagkabingkil usab, sama sa dihang ang pipila kanila nagtinguha nga makabaton ug mas dakong dungog. (Marcos 10:35-39; Lucas 9:46; 22:24-26) Kadto nakapatunghag tensiyon, tingali sakit nga mga buut, o grabe pa nga pagkasilo. Apan nakahimo sila sa pagpalabay niini nga mga panagbingkil ug nagtambayayong sa pag-alagad. Ang usa kanila sa ulahi nagsulat: “Siya nga buot mahigugma sa kinabuhi ug makakitag maayong mga adlaw, papugngi kaniya ang iyang dila gikan sa kon unsay daotan ug ang [iyang] mga ngabil sa pagsultig limbong, apan pabiyai kaniya ang daotan ug ipabuhat ang maayo; ipapangita kaniya ang pakigdait ug pangagpason kini.”—1 Pedro 3:10, 11.
21. Unsang maayong tambag ang gihatag ni Jesus bahin sa pagpasaylo?
21 Atong gihisgotan sa sinugdan ang usa ka hugna sa siklo: gipasaylo sa Diyos ang daghang sala nga atong nahimo sa nangagi, busa angay natong sundogon siya ug magpasaylo sa atong mga igsoon. (Salmo 103:12; Isaias 43:25) Apan adunay laing hugna niini nga siklo. Human ihatag ang sulondang pag-ampo, si Jesus nag-ingon: “Kon inyong pasayloon ang mga tawo sa ilang kalapasan, ang inyong langitnong Amahan mopasaylo usab kaninyo.” Sa milabay ang usa ka tuig, iyang gisubli ang diwa, nga nanudlo sa iyang mga tinun-an sa pag-ampo: “Pasayloa kami sa among mga sala, kay kami usab sa among kaugalingon nagapasaylo sa matag usa nga utangan kanamo.” (Mateo 6:12, 14; Lucas 11:4) Dayon, mga adlaw sa hapit na siyang mamatay, si Jesus midugang: “Sa magbarog kamo nga mag-ampo, ipasaylo ang bisan unsa nga inyong gihuptan batok kang bisan kinsa; aron nga ang inyong Amahan nga anaa sa mga langit mopasaylo usab kaninyo sa inyong mga kalapasan.”—Marcos 11:25.
22, 23. Sa unsang paagi ang atong pagkaandam mopasaylo makaapektar sa atong palaaboton?
22 Oo, ang atong palaaboton aron padayon nga makadawat sa kapasayloan sa Diyos sa dakong sukod nagadepende sa atong pagkaandam mopasaylo sa atong mga igsoon. Kon may motunghang personal nga problema tali sa mga Kristohanon, pangutan-a ang imong kaugalingon, ‘Dili ba ang pagbaton sa pasaylo sa Diyos mas importante kay sa akong pagpamatuod nga ang igsoong lalaki o igsoong babaye maoy nakaingon sa gamayng insulto, gamayng sala, o pasundayag sa tawhanong pagkadili-hingpit?’ Ikaw nahibalo sa tubag.
23 Apan, komosta kon ang butang mas grabe kay sa gamayng personal nga sala o problema? Ug kanus-a ikapadapat ang tambag ni Jesus nga nasulat sa Mateo 18:15-18? Atong sunod nga hisgotan kining mga butanga.
[Footnote]
a Ang usa ka eskolar nag-ingon nga ang Hebreohanong pasumbingay nga gigamit sa Miqueas 7:18 “gikuha gikan sa batasan sa usa ka pumapanaw kinsa moagi nga wala makamatikod sa usa ka butang nga dili niya gustong hatagag pagtagad. Ang ideya nga gipasabot niini dili, nga ang Diyos dili makamatikod ug sala, o nga gilantaw niya kini nga gamay kaayo o walay hinungdan, kondili wala niya tan-awa kini sa partikular nga mga kahimtang may kalabotan sa pagsilot; nga dili siya mosilot, kondili mopasaylo.”—Maghuhukom 3:26; 1 Samuel 16:8.
Nahinumdom Ka Ba?
◻ Sa unsang paagi si Jehova naghatag kanato ug sumbanan nga pagasundogon kon bahin sa pagpasaylo?
◻ Unsa ang kinahanglan natong hinumdoman bahin niadtong kauban nato sa kongregasyon?
◻ Sa kadaghanang kaso, unsa ang angay natong himoon bahin sa mga pag-insulto o kasal-anan?
◻ Kon gikinahanglan, unsay atong mahimo sa pagpakig-uli sa atong igsoon?
[Hulagway sa panid 15]
Kon magkabingkil uban sa usa ka Kristohanon, paningkamot sa pagpalabay niini; sa molabay ang panahon ang panagbingkil anam-anam nga mahimong walay hinungdan