Maayong mga Panig-ingnan—Ikaw ba Nakabatog Kaayohan Gikan Kanila?

“KAMO nahimong panig-ingnan sa tanang magtutuo sa Macedonia ug sa Acaya.” Gisulat ni apostol Pablo kining mga pulonga ngadto sa matinumanong mga Kristohanon nga nagpuyo sa Tesalonica. Ang panig-ingnan nga ilang gipakita alang sa mga isigkamagtutuo tinuod gayod nga dalayegon. Apan, ang mga taga-Tesalonica misanong lamang sa panig-ingnan nga gipakita ni Pablo ug sa iyang mga kauban. Si Pablo miingon: “Ang maayong balita nga among giwali wala makaplagi taliwala kaninyo uban ang mga sulti lamang apan usab uban ang gahom ug uban ang balaang espiritu ug hugot nga pagtuo, ingon gayod sa inyong nahibaloan kon unsang matanga sa mga tawo nangahimo kami nganha kaninyo tungod ug alang kaninyo; ug kamo nahimong mga tigsundog kanamo.”—1 Tesalonica 1:5-7.

Oo, si Pablo nagbuhat ug labaw pa kay sa pagwali. Ang iya mismong kinabuhi maoy usa ka wali—usa ka panig-ingnan sa pagtuo, paglahutay, ug pagsakripisyo sa kaugalingon. Tungod niini, si Pablo ug ang iyang mga kauban nahimong gamhanang impluwensiya diha sa kinabuhi sa mga taga-Tesalonica, nga nagpalihok kanila sa pagdawat sa kamatuoran “ilalom sa daghang kasakitan.” Apan, dili lamang si Pablo ug ang iyang mga isigkamagbubuhat ang bugtong positibong impluwensiya niadtong maong mga magtutuo. Ang panig-ingnan sa uban nga milahutay sa kasakitan nakapadasig usab. Si Pablo misulat ngadto sa mga taga-Tesalonica: “Kamo nahimong mga tigsundog, mga igsoon, sa mga kongregasyon sa Diyos nga anaa sa Judea kahiusa kang Kristo Jesus, tungod kay kamo usab sugod nga nag-antos diha sa mga kamot sa inyong kaugalingong mga katagilungsod sa samang mga butang nga ginaantos usab nila diha sa mga kamot sa mga Judio.”—1 Tesalonica 2:14.

Kristo Jesus—Ang Pangunang Sulondan

Bisan tuod si Pablo mismo nagpakitag panig-ingnan nga takos sundogon, iya gayod nga gipunting si Jesu-Kristo ingong ang pangunang panig-ingnan nga kinahanglang sundon sa mga Kristohanon. (1 Tesalonica 1:6) Si Kristo mao ang atong pangunang Sulondan kaniadto ug karon. Si apostol Pedro misulat: “Niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.”—1 Pedro 2:21.

Apan, natapos na ni Jesus ang iyang kinabuhi ingong usa ka tawo halos 2,000 ka tuig kanhi. Karon siya “nagpuyo sa kahayag nga dili-maduol” ingong dili-mamatay nga espiritung linalang. Ingong espiritung linalang, “walay usa sa mga tawo nga nakakita o makakita” kaniya. (1 Timoteo 6:16) Nan, sa unsang paagi kita makasundog kaniya? Usa ka paagi mao ang pagtuon sa upat ka asoy sa Bibliya bahin sa kinabuhi ni Jesus. Ang mga Ebanghelyo naghatag ug katin-awan sa iyang pagkatawo, dalan sa kinabuhi, ug “tinamdan sa pangisip.” (Filipos 2:5-8) Mabatonan ang dugang pagsabot pinaagi sa pagtuon ug maayo sa librong Ang Labing Bantogang Tawo nga Nabuhi Sukad, nga naghisgot sa daghang detalye ug sunodsunod nga mga panghitabo sa kinabuhi ni Jesus.a

Ang nagsakripisyo-sa-kaugalingon nga panig-ingnan ni Jesus may gamhanang epekto kang apostol Pablo. Iyang gisultihan ang mga Kristohanon sa Corinto: ‘Alang kanako ikalipay ko gayod nga magsakripisyo ug mahago sa bug-os alang sa inyong mga kalag.’ (2 Corinto 12:15) Pagkasama gayod kang Kristo nga tinamdan! Samtang kita mamalandong sa hingpit nga panig-ingnan ni Kristo, kita usab kinahanglang mapalihok sa pagsundog kaniya sa atong dalan sa kinabuhi.

Pananglitan, si Jesus nagtudlo kanato nga kita kinahanglang mosalig sa saad sa Diyos sa pagtagana sa materyal. Apan labaw pa niana ang iyang gihimo. Siya nagpasundayag sa maong pagtuo ug pagsalig kang Jehova sa adlaw-adlaw. Siya miingon: “Ang mga zora may mga lungib ug ang mga langgam sa langit may mga batoganan, apan ang Anak sa tawo walay bisan diin nga kapahilunaan sa iyang ulo.” (Mateo 6:25; 8:20) Ang materyal nga mga kabalaka mao ba ang naglabi sa imong panghunahuna ug mga lihok? O ang imong kinabuhi naghatag bag pamatuod nga imong giuna pagpangita ang Gingharian? Ug komosta ang imong tinamdan sa pag-alagad kang Jehova? Kana ba sama nianang sa atong Sulondan, si Jesus? Ang Bibliya nagpakita nga si Jesus wala lamang magsangyaw bahin sa kasibot kondili nagpasundayag ug mainitong kasibot sa daghang higayon. (Juan 2:14-17) Dugang pa, pagkamaayong panig-ingnan ang gipakita ni Jesus kon mahitungod sa gugma! Gani, iyang gisakripisyo ang iya mismong kinabuhi alang sa iyang mga tinun-an! (Juan 15:13) Ikaw ba nagsundog kang Jesus pinaagi sa pagpakitag gugma sa imong Kristohanong mga igsoon? O ikaw ba nagtugot sa mga pagkadili-hingpit sa uban sa pagbalda sa imong gugma kanila?

Sa atong pagpaningkamot nga masunod ang panig-ingnan ni Kristo, kita sagad nga masayop. Apan tino nga nahimuot si Jehova sa atong mga paningkamot nga “isul-ob ang Ginoong Jesu-Kristo.”—Roma 13:14.

‘Mga Panig-ingnan Nganha sa Panon’

Aduna bay mga indibiduwal diha sa kongregasyon karon nga magsilbing mga panig-ingnan nato? Aduna gayod! Ang mga igsoong lalaki nga may tinudlong mga posisyon sa kaakohan ilabinang kinahanglan nga magpakitag panig-ingnan. Gisultihan ni Pablo si Tito, kinsa nag-alagad sa mga kongregasyon sa Creta ug kinsa nagtudlog mga magtatan-aw, nga ang matag tinudlo nga ansiyano kinahanglang usa ka ‘tawo nga walay ikasumbong.’ (Tito 1:5, 6) Si apostol Pedro nagtambag usab sa “mga ansiyano” nga mahimong ‘mga panig-ingnan nganha sa panon.’ (1 Pedro 5:1-3) Ug komosta kadtong nag-alagad ingong mga ministeryal nga mga alagad? Sila kinahanglan usab nga mahimong “mga tawo nga nagaalagad sa maayong paagi.”—1 Timoteo 3:13.

Tinuod, dili realistikanhon nga dahomong ang matag ansiyano o ministeryal nga alagad mahimong batid kaayo sa tanang bahin sa Kristohanong ministeryo. Gisultihan ni Pablo ang mga Kristohanon sa Roma: “Kita may mga gasa nga nagkalahi sumala sa dili-takos nga kalulot nga gihatag kanato.” (Roma 12:6) Ang lainlaing mga igsoong lalaki batid sa lainlaing mga buluhaton. Dili rasonableng dahomon nga ang mga ansiyano mohimo sa tanang butang sa hingpit nga paagi. “Kitang tanan mangapandol man sa makadaghan,” nag-ingon ang Bibliya sa Santiago 3:2. “Kon may dili mapandol diha sa pulong, kini siya usa ka tawong hingpit, nga makahimo usab sa pagrenda sa iyang tibuok lawas.” Apan, bisan pa sa ilang mga pagkadili-hingpit, ang mga ansiyano, sama ni Timoteo, puwede gihapon nga “mahimong [mga] panig-ingnan ngadto sa mga matinuohon diha sa pamulong, sa panggawi, sa gugma, sa pagtuo, sa kaputli.” (1 Timoteo 4:12) Kon buhaton kini sa mga ansiyano, kadtong anaa sa panon daling mopadapat sa tambag sa Hebreohanon 13:7: “Hinumdomi silang mga nagapanguna taliwala kaninyo, . . . ug sa mamalandong kamo kon unsay gisangpotan sa ilang panggawi sundoga ang ilang pagtuo.”

Ubang Modernong-Adlaw nga mga Panig-ingnan

Sa milabayng pipila ka dekada, daghan kaayong uban pa ang nagpakita sa ilang kaugalingon ingong maayong mga panig-ingnan. Unsay ikaingon bahin sa linibong nagsakripisyo-sa-kaugalingon nga mga misyonaryo nga “nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta” aron sa pagtuman sa Kristohanong buluhaton diha sa langyawng teritoryo? (Mateo 19:29) Tagda usab ang nagapanaw nga mga magtatan-aw ug ang ilang mga asawa, ang mga lalaki ug mga babaye nga nag-alagad ingong mga boluntaryo diha sa mga buhatan sa Watch Tower Society, ug ang mga payunir nga nag-alagad sa mga kongregasyon. Ang maong mga panig-ingnan makapalihok ba sa uban? Usa ka Kristohanong ebanghelisador sa Asia nahinumdom sa misyonaryo gikan sa ikawalong klase sa Watchtower Bible School of Gilead. Siya miingon nga kining matinumanong igsoong lalaki “andam nga mosagubang sa nagdagsang nga mga lamok ug sa dili-maayong klima. . . . Labaw pang dalayegon mao ang iyang katakos sa paghimog mga presentasyon sa Ininsek ug Malay nga mga pinulongan bisan tuod siya taga-Inglaterra.” Ang epekto niining maayong panig-ingnan? Ang igsoong lalaki miingon: “Ang iyang kakalma ug kompiyansa nakainspirar nako sa pagpangandoy nga mahimong misyonaryo inigkadako nako.” Dili ikatingala, kining igsoong lalaki nahimo gayong misyonaryo.

Ang Watch Tower Publications Index adunay listahan sa daghang sugilanon sa kinabuhi nga migula diha sa mga magasing Bantayanang Torre ug Pagmata! Kining maong mga sugilanon naghisgot bahin sa mga tawong nagsalikway sa kalibotanong mga karera ug mga tumong, nagbuntog sa mga kahuyangan, naghimog dagkong mga kausaban sa personalidad, naghupot ug positibong panggawi atubangan sa kalisdanan, ug nagpakitag kakugi, pagkamalahutayon, pagkamaunongon, pagpaubos, ug espiritu sa pagsakripisyo sa kaugalingon. Usa ka magbabasa misulat mahitungod niining maong mga asoy: “Naghimo kini nako nga mas mapaubsanon ug mapasalamaton nga Kristohanon samtang akong gibasa ang naagoman sa uban, ug nagtabang kini nako nga dili maghunahunag sobra bahin sa akong kaugalingon o mahimong hakog.”

Dugang pa, ayawg kalimti ang maayong mga panig-ingnan diha sa imo mismong kongregasyon: mga ulo sa pamilya nga kanunayng nag-atiman sa materyal ug espirituwal nga mga panginahanglan sa ilang mga pamilya; mga igsoong babaye—lakip sa nag-inusarang mga inahan—nga nag-atubang sa mga kabug-at sa pagmatutog anak samtang aktibo gihapong nakigbahin sa ministeryo; mga edaran ug masakiton nga nagpadayong matinumanon bisan pa sa nagkahuyang ug dili-maayo nga panglawas. Wala ka ba matandog sa maong mga panig-ingnan?

Tinuod, ang kalibotan puno sa daotang mga panig-ingnan. (2 Timoteo 3:13) Bisan pa niana, tagda ang awhag ni Pablo sa mga Kristohanon nga nagpuyo sa Judea. Human mabatbat ang sulondang panggawi sa daghang karaang mga lalaki ug babaye sa pagtuo, si apostol Pablo nagdasig kanila: “Busa, tungod kay kita aduna may ingon gayod kadakong panganod sa mga saksi nga nagalibot kanato, . . . atong daganon nga may pag-agwanta ang lumba nga gibutang atubangan kanato, samtang kita nagatutok sa Pangulong Ahente ug Maghihingpit sa atong pagtuo, si Jesus.” (Hebreohanon 12:1, 2) Ang mga Kristohanon karon gilibotan usab sa ‘dakong panganod’ sa maayong mga panig-ingnan—sa karaan ug modernong-adlaw. Ikaw ba nakabaton gayod ug kaayohan gikan kanila? Ikaw makahimo niini kon ikaw determinadong mahimong “tigsundog, dili sa kon unsay daotan, kundili sa kon unsay maayo.”—3 Juan 11.

[Footnote]

[Blurb sa panid 20]

Dili realistikanhon nga dahomong ang matag ansiyano o ministeryal nga alagad mahimong batid kaayo sa tanang bahin sa Kristohanong ministeryo

[Mga hulagway sa panid 21]

Ang mga ansiyano kinahanglang mahimong “mga panig-ingnan alang sa panon”