Mga Pangutana Gikan sa mga Magbabasa
Ang Isaias kapitulo 53 naundan sa iladong tagna bahin sa Mesiyas. Ang bersikulo 10 nag-ingon: “Si Jehova may kahimuot sa pagdugmok kaniya; siya naghimo kaniyang masakiton.” Unsay gipasabot niini?
Daling masabtan kon nganong ang usa ka pangutana mahimong motungha bahin sa Isaias 53:10. Ang matuod nga mga Kristohanon wala maghunahuna nga ang atong mabination ug malumo nga Diyos may kahimuot sa pagdugmok o paghimo kang bisan kinsa nga masakiton. Ang Bibliya naghatag kanato ug pasikaranan sa pagsalig nga ang Diyos dili malipay sa pagsakit sa inosente. (Deuteronomio 32:4; Jeremias 7:30, 31) Latas sa kasiglohan si Jehova tingali nagtugot usahay sa pag-antos tungod sa mga hinungdan nga uyon sa iyang kaalam ug gugma. Apan tinong siya wala magpahinabo nga mag-antos ang iyang hinigugmang Anak, si Jesus. Busa, unsa ba gayod ang gipasabot niining tekstoha?
Aw, kita matabangan sa pagsabot sa kahulogan kon atong tagdon ang tibuok nga bersikulo, nga matikdan ang duha ka paggamit sa pulong nga “kahimuot.” Ang Isaias 53:10 mabasa: “Si Jehova may kahimuot sa pagdugmok kaniya; siya naghimo kaniyang masakiton. Kon imong himoon ang iyang kalag nga usa ka halad sa pagkasad-an, iyang makita ang iyang kaliwat, iyang mapalugwayan ang iyang mga adlaw, ug diha sa iyang kamot molampos ang gikahimut-an ni Jehova.”
Ang kinatibuk-ang mensahe sa Bibliya nagpaila nga ang “gikahimut-an ni Jehova,” nga gihisgotan sa kataposan sa bersikulo, nagtumong sa pagpatuman sa iyang katuyoan pinaagi sa Gingharian. Ang pagbuhat ni Jehova niini magbindikar sa iyang pagkasoberano ug magpaposible nga mawagtang ang napanunod nga sala gikan sa masinugtanong katawhan—ang atong mga sala. (1 Cronicas 29:11; Salmo 83:18; Buhat 4:24; Hebreohanon 2:14, 15; 1 Juan 3:8) Ang yawi niining tanan mao nga ang Anak sa Diyos kinahanglang mahimong tawo ug motagana sa halad lukat. Sumala sa atong nahibaloan, ngadtongadto si Jesus nag-antos gayod. Ang Bibliya nag-ingon kanato nga siya “nakakat-on sa pagkamasinugtanon gikan sa mga butang nga iyang giantos.” Busa si Jesus nakabenepisyo gayod sa maong pag-antos.—Hebreohanon 5:7-9.
Si Jesus nahibalong daan nga ang hamiling dalan nga iyang subayon maglangkit ug pipila ka kasakit. Dayag kana sa iyang mga pulong sa Juan 12:23, 24, diin atong mabasa: “Ang takna miabot na aron ang Anak sa tawo pagahimayaon. Sa pagkamatuod gayod ako magaingon kaninyo, Gawas kon ang usa ka lugas nga trigo mahulog sa yuta ug mamatay, kini magapabilin nga usa lamang ka lugas; apan kon kini mamatay, niana kini mamunga ug daghang bunga.” Oo, nahibalo si Jesus nga kinahanglang padayon niyang huptan ang iyang integridad bisan hangtod sa kamatayon. Ang asoy nagpadayon: ‘“Karon ang akong kalag nasamok, ug unsay akong igaingon? Amahan, luwasa ako gikan niini nga takna. Bisan pa man, mao kini kon nganong ako nahiabot niining taknaa. Amahan, himayaa ang imong ngalan.” Niana usa ka tingog migula gikan sa langit: “Gihimaya ko na kini ug pagahimayaon ko kini pag-usab.”’—Juan 12:27, 28; Mateo 26:38, 39.
Niini nga konteksto nga atong masabtan ang Isaias 53:10. Si Jehova nahibalo gayod nga ang maagoman sa iyang Anak mag-apil sa pagkadugmok sa mahulagwayong paagi. Apan kay anaa sa hunahuna ang mahimayaon ug dakong kaayohan nga moresulta, si Jehova may kahimuot kon unsa unyay maagoman ni Jesus. Nianang diwaa si Jehova “may kahimuot sa pagdugmok,” sa Mesiyas. Ug si Jesus usab may kahimuot sa kon unsay iyang mapalampos ug palamposon. Sa pagkamatuod, sumala sa paniklop sa Isaias 53:10, ‘diha sa iyang kamot milampos gayod ang gikahimut-an ni Jehova.’