Usa ka Tagoanang Dapit Batok sa Hangin

SA IBABAW sa kabukiran sa alpino sa Uropa, imong makaplagan nga nagtubo didto ang usa ka lig-ong kahoykahoy nga gitawag ug rosas sa alpino. Kining gamay nga rosas sa alpino sagad motubo nga magdasok pag-ayo nga halos tapot sa yuta aron dili daling maluka sa makusog nga paghuros sa hangin diha sa kabukiran. Ang way-hunong nga paghuros sa hangin nagpameligro sa kinabuhi sa mga tanom sa alpino pinaagi sa pagpaus-os sa temperatura niini, nga makapauga sa hangin ug sa yuta, ug makaluka niini.

Ang rosas sa alpino sagad nga dili maapektohan sa mga kadaot nga ipahinabo sa hangin pinaagi sa pagtubo diha sa mga likiliki sa mga bato. Bisan tuod wala kaayoy yuta niining mga dapita, ang mga likiliki sa bato nagsilbing salipod batok sa hangin ug tungod niini dili daling moalisngaw ang tubig gikan sa tanom. Tungod kay dili kaayo kini kita sa dakong bahin sa tuig, sa ting-init kining mga rosas sa alpino nagpatahom sa kabukiran pinaagi sa hayag nga pulang mga bulak.

Ang manalagnang si Isaias nag-ingon nga magtudlo ang Diyos ug “mga prinsipe,” ug ang matag usa magsilbing “usa ka tagoanang dapit gikan sa hangin.” (Isaias 32:1, 2) Ilalom sa pagtultol sa Hari, si Kristo Jesus, kining espirituwal nga mga prinsipe, o mga magtatan-aw, mahisama sa dili-matarog nga mga bato, malig-on panahon sa kapit-os o kasakit. Sila mahimong kasaligang salipdanan panahon sa kalisdanan ug motabang sa mga kabos sa pagpanalipod sa ilang mga pondo sa espirituwal nga tubig gikan sa Pulong sa Diyos.

Ang mga hangin sa paglutos, pagkaluya, o balatian mahimong mohampak sa usa ka Kristohanon, nga makapahuyang sa iyang pagtuo kon siya walay panalipod. Ang Kristohanong mga ansiyano makataganag panalipod pinaagi sa pagpamatig maayo sa iyang problema, pagtanyag ug binase-sa-Bibliyang tambag, ug paghatag ug pagdasig o praktikal nga tabang. Sama sa ilang tinudlong Hari, si Kristo Jesus, buot nilang motabang niadtong “nagkatibuagsa.” (Mateo 9:36) Ug tinguha nilang mobulig sa uban nga nakaagom ug kadaot tungod sa mga hangin sa bakak nga pagtulon-an. (Efeso 4:14) Ang maong tabang sa hustong panahon mahinungdanon.

“Nakasinati akog masakit nga yugto sa akong kinabuhi sa dihang pipila sa akong suod nga mga higala mibiya sa kamatuoran ug, sa samang panahon, ang akong amahan nag-antos sa pagdugo sa utok,” matod ni Miriam. “Sa pagsulay nga mabuntog ang akong kahigwaos, nagsugod ako sa pagpakigdeyt sa akong trato nga tagagawas. Wala madugay human niadto, kay mibating di-takos, gisultihan ko ang mga ansiyano sa kongregasyon nga nakahukom na ako sa pagbiya sa kamatuoran, sanglit naseguro ko nga dili na ako mahimong higugmaon ni Jehova.

“Niining kritikal nga gutlo, usa ka mabination nga ansiyano nagpahinumdom kanako sa katuigan nga ako nag-alagad ingong regular payunir nga ministro. Iya kong giingnan nga nakadayeg gayod siya sa akong pagkamatinumanon kaniadto, ug maluloton siyang naghangyo nga tugotan nako ang mga ansiyano nga motabang kanako, sa pagpasalig kanako sa gugma ni Jehova. Ang ilang mahigugmaong interes niadtong hinungdanong panahon nahisama sa ‘usa ka tagoanang dapit’ alang kanako panahon sa espirituwal nga bagyo nga mihuros sa akong palibot. Sulod sa usa ka bulan, gibulagan ko ang akong trato, ug ako padayong nagalakaw diha sa dalan sa kamatuoran sukad niadto.”

Ang mga ansiyano mobating nagantihan sa dihang makita nilang ang mga isigka-Kristohanon mouswag sa espirituwal nga paagi, ang tanan tungod sa panalipod nga gihatag kanila sa hustong panahon. Ug kining ‘mga tagoanang dapit’ naghatag kanato ug pasiunang pagtagamtam sa dagayang espirituwal nga tabang nga atong tagamtamon panahon sa Milenyal nga Pagmando ni Kristo.