Mga Magmamantala sa Gingharian Nagtaho

“Nakadungog” Sila sa Mensahe sa Gingharian sa Brazil

ARON ikamantala ang maayong balita sa Gingharian sa mga tawong bungol, daghang Saksi ni Jehova sa Brazil nagtuon ug Brazilian Sign Language bisan pag kini malisod. Ekselente ang mga resulta sa ilang paningkamot, sumala sa gipakita sa mosunod nga mga eksperyensiya.

Si Eva,a usa ka bungol nga taga São Paulo, nagsugod pagtuon ug sign language human nga siya ug ang iyang tulo ka anak nakigpuyo sa usa ka bungol nga lalaki. Sa shopping mall, si Eva ug ang iyang trato nakahimamat ug usa ka grupo sa bungol nga mga Saksi ug gidapit sila sa pagtambong sa tigom sa Kingdom Hall. Misugot sila, sa paghunahuna nga kadto maoy usa ka sosyal nga okasyon.

Tungod sa iyang limitadong kahibalo sa sign language, diyutay ra kaayo ang nasabtan ni Eva sa tigom. Human niana, gidapit siya sa pipila ka Saksi aron mamainit sa ilang balay. Ginamit ang mga hulagway sa brosyur nga Tagamtama ang Kinabuhi sa Yuta sa Walay Kataposan!, gisaysay nila ang saad sa Diyos bahin sa umaabot nga paraiso sa yuta. Nakaangay si Eva sa iyang nakat-onan ug misugod siya pagtambong sa mga tigom nga makanunayon.

Wala madugay, gibiyaan ni Eva ang iyang trato aron magkinabuhi sumala sa mga sukdanan sa Bibliya. Bisan pa sa mapintasong pagsupak sa iyang pamilya, nagpadayon siya pag-uswag sa espirituwal ug nabawtismohan sa 1995. Unom ka bulan sa ulahi, si Eva nag-alagad ingong payunir, o bug-os panahong magmamantala sa Gingharian. Sukad niadto nakatabang na siya ug upat ka tawong bungol nga nagpahinungod ug nagpabawtismo.

Nahimugso nga bungol si Carlos. Gikan pa sa pagkabata nalangkit na siya sa droga, imoralidad, ug pagpangawat. Kay gihulga sa karibal nga mga membro sa gang, mikalagiw siya ngadto sa São Paulo ug nagpuyo uban kang João sa mubong panahon. Sama kang Carlos, si João bungol ug nagkinabuhi usab nga imoral.

Pipila ka tuig sa ulahi, si Carlos nakakat-on sa mensahe sa Gingharian, nga nagpalihok niya sa paghinlo sa iyang kinabuhi ug sa pagpalegal sa iyang kaminyoon. Human makab-ot ang Kasulatanhong mga kinahanglanon, si Carlos gibawtismohan ingong simbolo sa iyang pagpahinungod kang Jehova. Sa kasamtangan, walay kalibotan si Carlos nga si João nagtuon na usab diay bahin sa maayong balita, ug siya nagbag-o usab sa iyang kinabuhi. Sa pagkahibalo nga si Jehova supak sa paggamit ug mga imahen, gipanglabay ni João ang tanan niyang natigom nga mga imahen. Human biyai ang iyang kanhing pagkinabuhi, si João nagpabawtismo usab.

Pagkadako sa kalipay ni Carlos ug ni João sa dihang nagkita sila sa Kingdom Hall ug nakita ang mga kausaban nga ilang nahimo! Karon silang duha maoy responsable nga mga ulo sa pamilya ug nag-alagad ingon nga masibotong mga magwawali sa Gingharian.

Sa Brazil, adunay 30 ka kongregasyon ug 154 ka grupo sa sign language, nga may kapin sa 2,500 ka magmamantala, nga 1,500 niini ang bungol. Sa 2001 nga “Mga Magtutudlo sa Pulong sa Diyos” nga Distritong Kombensiyon sa Brazil alang sa mga tawong bungol, kapin sa 3,000 ang mitambong, ug 36 ang nabawtismohan. Sa panalangin ni Jehova, hinaot nga daghan pang mga tawong bungol ang modawat sa mensahe sa Gingharian.

[Footnote]