Mga Magmamantala sa Gingharian Nagtaho
Makapalipayng mga Resulta sa Pagkamapailobon ug Pagkamalahutayon
GITAGNA ni Jesu-Kristo nga sa kataposang mga adlaw “mobugnaw ang gugma sa kadaghanan.” Tungod niini, diha sa daghang bahin sa kalibotan karon, ang mga tawo sa katibuk-an dili matinagdanon sa maayong balita sa Gingharian. Ang uban matinamayon pa gani sa relihiyon.—Mateo 24:12, 14.
Bisan pa niana, uban sa pagtuo ug pailob, ang mga magmamantala sa Gingharian malamposong nagsagubang niining problemaha, sama sa gipakita sa mosunod nga kasinatian gikan sa Republika sa Czech.
Dihay duha ka Saksi nga nakig-estorya sa usa ka babaye samtang sirado ang iyang pultahan. Pagkataudtaod, giablihag diyutay ang pultahan, ug dihay kamot nga migulho ug mikawhat sa mga magasing Bantayanang Torre ug Pagmata! nga gitanyag sa mga Saksi. Dihay tingog nga miingon ug “salamat,” ug gisira ang pultahan. “Angay ba kaming mobalik sa pagduaw?” ang mga Saksi naghunahuna. Ang usa kanila, nga usa ka payunir, o bug-os-panahong ministro, mihukom sa pagbalik, apan mao ra gihapon ang nahitabo, ug nagpadayon kini sulod sa usa ka tuig.
Kay nakadesisyon nga kinahanglang usbon niya ang iyang paagi, ang payunir miampo kang Jehova alang sa tabang. Sa sunod higayon nga iyang gitanyag ang mga magasin, siya mahigalaong nangutana sa babaye: “Komosta ka? Nalingaw ka ba sa pagbasa sa mga magasin?” Sa sinugdanan, walay tubag, apan human sa pipila pa ka pagduaw, ang babaye anam-anam nga nahimong mahigalaon. Dihay higayon nga iyang giablihag dako ang pultahan, apan makadiyot lang silang nagsultihanay.
Tungod kay nagpanuko ang babaye sa pagpakig-estorya diha sa pultahan, ang payunir nakahukom sa pagsulat kaniya sa pagpatin-aw sa katuyoan sa iyang mga pagduaw ug sa pagtanyag ug pagtuon sa Bibliya diha sa balay. Sa kataposan, human sa usa ka tuig ug tunga nga mapailobong pagpaningkamot, ang payunir nakasugod ug usa ka pagtuon sa Bibliya uban sa tagbalay. Siya natingala apan nadasig sa dihang gisultihan siya sa babaye sa ulahi: “Nagsugod ako sa pagtuo ug Diyos sukad nga gidad-an mo ako ug mga magasin.”
Sa pagkatinuod, ang pagkamapailobon ug pagkamalahutayon makahatag ug makapalipayng mga resulta diha sa buluhatong pagsangyaw sa Gingharian ug sa paghimog tinun-an.—Mateo 28:19, 20.