Unsang Matanga sa Edukasyon ang Makapalampos sa Imong Kinabuhi?

GIBATI mo na ba sukad nga nabug-atan ka pag-ayo sa mga problema nga mora kag gisuyop sa lilo? Hunahunaa lang kon unsa ka dakong pag-antos ang mahimong moresulta kon masayop ka sa pagsulbad sa usa o kapin pa nianang mga problemaha! Walay usa kanato nga natawo nga may katakos sa pagsulbad nga malamposon sa tanang problema, nga makahimog maayong mga desisyon sa tanang panahon. Mao kanay hinungdan kon nganong gikinahanglan ang edukasyon. Asa ka man makakuha ug edukasyon nga mag-andam kanimo sa pagsagubang sa mga problema sa kinabuhi?

Daghang tawo, bata ug tigulang, ang nag-ingon nga hinungdanon ang edukasyon sa eskuylahan. Ang ubang mga eksperto miingon pa gani nga sila “hugot nga nagtuo nga ikaw dili gayod makakita ug [desente] nga trabaho kon dili ka makagraduwar sa kolehiyo.” Bisan pa niana, adunay pipila ka kinahanglanon sa tawo nga dili matagbaw pinaagi lamang sa materyal nga mga kalamposan. Pananglitan, motabang ba kanimo ang hataas nga edukasyon sa pagkahimong maayong ginikanan, kapikas, o higala? Sa pagkatinuod, ang mga tawo nga gidayeg tungod sa ilang mga kalamposan sa eskuylahan mahimong makaugmad ug dili-maayong mga kinaiya, mapakyas sa ilang pamilyahanong kinabuhi, o maghikog pa gani.

Ang uban modangop sa relihiyon alang sa giya, ingong usa ka tuboran sa edukasyon, apan nahigawad tungod kay sila wala makadawat ug praktikal nga tabang sa pag-atubang sa mga kalisdanan sa kinabuhi. Sa pag-ilustrar niini, si Emiliaa nga taga-Mexico nag-ingon: “Napulog-lima ka tuig kanhi akong gibati nga ang akong bana ug ako dili na maayong mag-ipon pa sa pagpuyo. Magsige mig lalis. Dili nako siya mapahunong sa pag-inom. Subsob akong mapugos sa pagbiya sa among gagmayng mga anak samtang ako mangita sa akong bana. Ako naluya na sa emosyonal nga paagi. Sa ubay-ubayng higayon ako moadto sa simbahan sa tinguha nga matabangan ako sa pagpangitag kasulbaran sa akong problema. Bisan tuod ang Bibliya gigamit usahay, ako wala gayod makadungog ug bisan unsang tambag nga espesipikong naghisgot sa akong kahimtang; wala say miduol sa pagsulti kanako kon unsay angayng buhaton. Ang paglingkod diha sa simbahan sa makadiyot ug pagsubli sa pipila ka pag-ampo wala makatagbaw kanako.” Ang uban nahigawad tingali sa dihang nakita nila nga ang ilang espirituwal nga mga lider wala magpakitag maayong panig-ingnan. Tungod niini, daghan ang nawad-ag pagsalig sa relihiyon ingong tuboran sa pagbansay o edukasyon aron magmalamposon sa ilang kinabuhi.

Busa, makapangutana ka tingali sa imong kaugalingon, ‘Unsang matanga sa edukasyon ang angay nakong kuhaon aron magmalamposon ang akong kinabuhi? Aduna bay tubag ang matuod nga Kristiyanidad niining hinungdanong pangutana? Kini pagahisgotan sa sunod nga artikulo.

[Footnote]