Si Jehova Nagahatag ug “Balaang Espiritu Niadtong Nagapangayo Kaniya”
“Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—LUCAS 11:13.
1. Kanus-a nga ilabinang gikinahanglan nato ang tabang sa balaang espiritu?
‘DILI ko makasagubang niini kon ako ra. Pinaagi lamang sa tabang sa balaang espiritu nga makalahutay ako niini nga pagsulay!’ Nasulti mo na ba sukad kanang kinasingkasing nga mga pahayag? Kadaghanang Kristohanon nakasulti na niana. Tingali nakasulti ka niana human nimo mahibaloi nga nataptan ka ug grabeng sakit. O tingali sa panahon nga namatay ang imong kapikas sa kinabuhi sa dugay nang panahon. O tingali sa dihang ang imong kanhing pagkamangayaon napulihan sa grabeng depresyon. Sa makapasubong mga panahon sa kinabuhi, imo tingaling gibati nga nakalahutay ka lang tungod kay ang balaang espiritu ni Jehova naghatag kanimo ug “gahom nga labaw sa kasarangan.”—2 Corinto 4:7-9; Salmo 40:1, 2.
2. (a) Unsang mga problema ang giatubang sa matuod nga mga Kristohanon? (b) Unsang mga pangutana ang atong tagdon niining artikuloha?
2 Ang matuod nga mga Kristohanon kinahanglang mosagubang sa nagkadakong pagpit-os ug pagsupak gikan sa dili-diyosnon nga kalibotan karon. (1 Juan 5:19) Dugang pa, ang mga sumusunod ni Kristo giatake ni Satanas nga Yawa mismo, kinsa mabangis nga nakiggubat niadtong “nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:12, 17) Busa, masabtan kon nganong gikinahanglan nato karon ang pagpaluyo sa espiritu sa Diyos kay sukad masukad. Unsay atong mahimo aron maseguro nga padayon natong madawat nga madagayaon ang balaang espiritu sa Diyos? Ug nganong makaseguro kita nga si Jehova andam gayong mohatag kanato sa kalig-on nga gikinahanglan panahon sa pagsulay? Atong makaplagan ang mga tubag niining mga pangutanaha diha sa duha sa mga ilustrasyon ni Jesus.
Magpadayon sa Pag-ampo
3, 4. Unsang ilustrasyon ang giasoy ni Jesus, ug sa unsang paagi gipadapat niya kini sa pag-ampo?
3 Usa sa mga tinun-an ni Jesus kas-a mihangyo: “Ginoo, tudloi kami kon unsaon sa pag-ampo.” (Lucas 11:1) Sa pagtubag, gihatagan ni Jesus ang iyang mga tinun-an ug duha ka magkalambigit nga mga ilustrasyon. Ang una bahin sa usa ka tawo nga nag-abiabi ug bisita, ug ang ikaduha bahin sa usa ka amahan nga namati sa hangyo sa iyang anak. Hisgotan nato ang matag usa niining duha ka ilustrasyon.
4 Si Jesus miingon: “Kinsa kaninyo nga adunay usa ka higala ug moadto kaniya sa tungang-gabii ug moingon kaniya, ‘Higala, pabayloa akog tulo ka tinapay, tungod kay ang usa nako ka higala mao pay pag-abot sa usa ka panaw ug wala akoy ikadulot kaniya’? Ug kana siya gikan sa sulod motubag, ‘Hunong na sa pagsamok kanako. Natrangkahan na ang pultahan, ug ang akong mga bata ania na uban kanako sa higdaanan; dili na ako makabangon ug makahatag kanimo ug bisan unsa.’ Sultihan ko kamo, Bisan tuod ug dili siya mobangon ug mohatag kaniyag bisan unsa tungod kay higala niya, tino nga tungod sa iyang maisogon nga pagkamapadayonon siya mobangon ug mohatag kaniya sa mga butang nga iyang gikinahanglan.” Dayon gipatin-aw ni Jesus kon sa unsang paagi kining maong ilustrasyon mapadapat sa pag-ampo, nga nag-ingon: “Busa ako magaingon kaninyo, Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo. Kay ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan.”—Lucas 11:5-10.
5. Unsay gitudlo kanato sa ilustrasyon sa tawong porsigido bahin sa atong tinamdan sa dihang mag-ampo?
5 Kining tataw nga ilustrasyon sa usa ka tawong porsigido nagpakita kon unsay angay natong tinamdan sa dihang kita mag-ampo. Matikdi nga si Jesus miingon nga ang maong tawo nakabaton ra sa iyang gikinahanglan “tungod sa iyang maisogon nga pagkamapadayonon.” (Lucas 11:8) Ang ekspresyong “maisogon nga pagkamapadayonon” kas-a lamang makita diha sa Bibliya. Kini gihubad gikan sa Gregong pulong nga sa literal nagpasabot ug “kawalay-ulaw.” Kasagaran ang kawalay-ulaw giisip nga usa ka dili-maayong taras. Apan, sa dihang ang kawalay-ulaw o pagkamapadayonon gipakita tungod sa maayong katarongan, kini mahimong usa ka dalayegong hiyas. Mao kana ang kahimtang sa tig-abiabi diha sa ilustrasyon. Wala siya maulaw sa pagpadayon sa pagpangayo sa iyang gikinahanglan. Sanglit gigamit ni Jesus kining maong tig-abiabi ingong atong ehemplo, kinahanglang magpadayon usab kita sa pag-ampo. Buot ni Jehova nga kita ‘magpadayon sa pagpangayo, magpadayon sa pagpangita, magpadayon sa pagpanuktok.’ Agig tubag, iyang ‘ihatag ang balaang espiritu niadtong nagapangayo kaniya.’
6. Sa adlaw ni Jesus, unsay panglantaw sa mga tawo sa kostumbre labot sa pagpakitag pagkamaabiabihon?
6 Gipakita ni Jesus kanato dili lamang kon sa unsang paagi kita mag-ampo—uban ang maisogon nga pagkamapadayonon—kondili usab kon nganong angay natong buhaton kana. Aron masabtan pag-ayo ang maong pagtulon-an, angay natong tagdon kon sa unsang paagi kadtong namati sa ilustrasyon ni Jesus bahin sa porsigidong tig-abiabi naglantaw sa kostumbre sa pagpakitag pagkamaabiabihon. Daghang asoy sa Kasulatan ang nagpakita nga sa panahon sa Bibliya, ang pag-atiman sa mga bisita maoy kostumbre nga giisip nga hinungdanon kaayo, ilabina sa mga alagad sa Diyos. (Genesis 18:2-5; Hebreohanon 13:2) Ang pagkapakyas sa pagpakitag pagkamaabiabihon maoy usa ka kaulawan. (Lucas 7:36-38, 44-46) Tungod niana, susihon nato pag-usab ang sugilanon ni Jesus.
7. Nganong ang tig-abiabi sa ilustrasyon ni Jesus wala maulaw sa pagpukaw sa iyang higala?
7 Ang tig-abiabi diha sa ilustrasyon may bisita sa tungang gabii. Gibati sa tig-abiabi nga obligasyon niya ang pagdalit ug pagkaon sa iyang bisita apan ‘wala siyay ikadulot.’ Sa iyang panglantaw, usa kini ka butang nga kinahanglang atimanon dayon niya! Kinahanglang makakuha siyag tinapay, bisan unsa pay mahitabo. Busa midalikyat siya sa usa niya ka higala ug sa kawalay-ulaw nagpukaw kaniya. “Higala, pabayloa akog tulo ka tinapay,” mitawag ang tig-abiabi. Siya nagpadayon sa paghangyo hangtod nga nadawat niya ang iyang gikinahanglan. Sa dihang nabatonan lamang niya ang mga tinapay nga siya nahimong usa ka maayong tig-abiabi.
Kon Mas Daghan ang Gikinahanglan—Mas Daghan ang Pangayoon
8. Unsay magtukmod kanato sa pagpadayon sa pagpangayo ug balaang espiritu diha sa atong mga pag-ampo?
8 Unsay gipakita niining maong ilustrasyon bahin sa katarongan kon nganong magpadayon kita sa pag-ampo? Ang tawo nagpadayon sa pagpangayog tinapay tungod kay iyang gibati nga ang pagkabaton nianang maong mga tinapay kinahanglanon gayod aron mahimo niya ang iyang obligasyon ingong tig-abiabi. (Isaias 58:5-7) Kon walay tinapay dili niya mahimo ang maong obligasyon. Sa samang paagi, tungod kay atong naamgohan nga ang pagkabaton sa espiritu sa Diyos kinahanglanon gayod aron sa pagtuman sa atong ministeryo ingong matuod nga mga Kristohanon, kita magpadayon sa pag-ampo sa Diyos, nga mangayo sa maong espiritu. (Zacarias 4:6) Kon wala kana, kita mapakyas. (Mateo 26:41) Nakita ba nimo ang hinungdanong leksiyon nga atong makat-onan sa maong ilustrasyon? Kon isipon nato ang espiritu sa Diyos ingong usa ka butang nga gikinahanglan gayod nato, mas lagmit nga kita magpadayon sa pagpangayo niana.
9, 10. (a) Iilustrar kon nganong kinahanglan kitang magpadayon sa pagpangayo sa Diyos sa iyang espiritu. (b) Unsang pangutana ang angay natong isukna sa atong kaugalingon, ug ngano?
9 Aron mapadapat kining maong pagtulon-an sa atong presenteng kinabuhi, handurawa nga ang usa ka membro sa imong pamilya nasakit sa tungang gabii. Pukawon ba nimo ang doktor aron magpakitabang kaniya? Dili kon dili grabe ang gimulo sa pasyente. Apan, kon siya giatake sa kasingkasing, dili ka gayod maulaw sa pagtawag sa doktor. Ngano? Tungod kay delikado ang situwasyon sa pasyente. Imong naamgohan nga gikinahanglan gayod ang tabang sa usa ka doktor. Ang dili pagpangayog tabang mahimong moresulta sa kamatayon sa pasyente. Sa samang paagi, ang matuod nga mga Kristohanon kanunayng nag-atubang ug usa ka delikadong situwasyon, ingnon ta. Ang tinuod mao, si Satanas nagasuroysuroy sama sa “usa ka leyon nga nagangulob,” nga naningkamot sa pagtukob kanato. (1 Pedro 5:8) Aron makapabilin kitang buhi sa espirituwal, gikinahanglan gayod ang tabang sa balaang espiritu sa Diyos. Ang dili pagpangayo sa tabang sa Diyos mahimong mosangpot sa kamatayon. Busa, uban ang maisogon nga pagkamapadayonon pangayoon nato sa Diyos ang iyang balaang espiritu. (Efeso 3:14-16) Sa pagbuhat lamang niana nga atong mahuptan ang kusog nga gikinahanglan sa ‘paglahutay hangtod sa kataposan.’—Mateo 10:22; 24:13.
10 Busa hinungdanon nga kita mamalandong usahay ug pangutan-on ang atong kaugalingon, ‘Unsa ba gayod ako ka mapadayonon sa akong mga pag-ampo?’ Hinumdomi, kon bug-os natong maamgohan nga atong gikinahanglan ang tabang sa Diyos, ang atong pagpangayo ug balaang espiritu diha sa atong mga pag-ampo mahimong mas mapadayonon.
Unsay Nagtukmod Kanato sa Pag-ampo nga Masaligon?
11. Sa unsang paagi gipadapat ni Jesus ang ilustrasyon sa usa ka amahan ug sa anak niini diha sa pag-ampo?
11 Ang ilustrasyon ni Jesus bahin sa porsigidong tig-abiabi nagpasiugda sa tinamdan sa usa nga nag-ampo—ang may pagtuo. Ang sunod nga ilustrasyon nagpasiugda sa tinamdan sa usa nga magpatalinghog sa mga pag-ampo—si Jehova nga Diyos. Si Jesus nangutana: “Sa pagkatinuod, kinsang amahana taliwala kaninyo nga, kon ang iyang anak mangayog isda, tingali maghatag kaniyag serpente inay isda? O kon siya usab mangayog itlog, hatagan siyag tanga?” Dayon gipadapat kana ni Jesus, nga nag-ingon: “Busa, kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:11-13.
12. Sa unsang paagi ang ilustrasyon bahin sa amahan nga namati sa hangyo sa iyang anak nagpasiugda sa pagkaandam ni Jehova nga mosanong sa atong mga pag-ampo?
12 Pinaagi niining panig-ingnan sa usa ka amahan nga misanong sa panginahanglan sa iyang anak, gipadayag ni Jesus kon unsay pagbati ni Jehova niadtong modangop kaniya pinaagi sa pag-ampo. (Lucas 10:22) Una, matikdi ang kalainan sa duha ka ilustrasyon. Dili sama sa lalaki sa unang ilustrasyon nga nagpanuko sa pagsanong sa pakitabang, si Jehova sama sa usa ka mahingawaong tawhanong ginikanan, nga andam mosanong sa hangyo sa iyang anak. (Salmo 50:15) Gipadayag pa ni Jesus ang pagkaandam ni Jehova nga motabang kanato pinaagi sa paghisgot una sa tinamdan sa usa ka tawhanong amahan ug dayon nianang sa atong langitnong Amahan. Siya miingon nga kon ang usa ka tawhanong amahan, bisan tuod “daotan” tungod sa napanunod nga pagkamakasasala, mohatag ug maayong gasa ngadto sa iyang anak, labi na gayod nga madahom nato nga ang atong langitnong Amahan, nga manggihatagon, mohatag sa balaang espiritu ngadto sa iyang pamilya sa mga magsisimba!—Santiago 1:17.
13. Sa unsa kita makaseguro sa dihang moampo kita kang Jehova?
13 Unsang pagtulon-an ang atong mapupo? Makasalig kita nga sa dihang pangayoon nato sa atong langitnong Amahan ang balaang espiritu, siya andam gayong mohatag sa atong gipangayo. (1 Juan 5:14) Sa dihang kita magbalikbalik pagduol kaniya pinaagi sa pag-ampo, si Jehova dili gayod moingon: “Hunong na sa pagsamok kanako. Natrangkahan na ang pultahan.” (Lucas 11:7) Sa kasukwahi, si Jesus miingon: “Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo.” (Lucas 11:9, 10) Oo, si Jehova ‘motubag kanato sa adlaw nga kita motawag.’—Salmo 20:9; 145:18.
14. (a) Unsang sayop nga ideya ang naghasol sa pipila nga nagsagubang ug mga pagsulay? (b) Sa dihang nagsagubang ug mga pagsulay, nganong makaampo kita kang Jehova nga masaligon?
14 Ang ilustrasyon ni Jesus bahin sa mahingawaong amahan nagpasiugda usab nga ang pagkamaayo ni Jehova mas labaw gayod kay sa pagkamaayo nga gipakita ni bisan kinsang tawhanong ginikanan. Busa, walay mausa kanato ang angayng mobati nga ang mga pagsulay nga atong gisagubang maoy tungod sa kasuko sa Diyos kanato. Ang atong pangunang kaaway nga si Satanas mao ang gustong maghunahuna kita niana. (Job 4:1, 7, 8; Juan 8:44) Walay Kasulatanhong pasikaranan nianang mahukmanon-sa-kaugalingon nga mga hunahuna. Si Jehova dili mosulay kanato “sa daotang mga butang.” (Santiago 1:13) Dili niya kita hatagan ug samag-serpente o samag-tanga nga pagsulay. Ang atong langitnong Amahan naghatag ug “maayong mga butang niadtong nagapangayo kaniya.” (Mateo 7:11; Lucas 11:13) Sa pagkatinuod, kon mas masabtan nato ang pagkamaayo ni Jehova ug ang iyang pagkaandam nga motabang kanato, mas matukmod kita sa pag-ampo nga masaligon. Kon buhaton nato kana, kita usab makapahayag ug pagbati nga sama nianang sa salmista nga misulat: “Sa pagkamatuod ang Diyos nagpatalinghog; siya nagpatalinghog sa tingog sa akong pag-ampo.”—Salmo 10:17; 66:19.
Kon sa Unsang Paagi ang Balaang Espiritu Atong Magtatabang
15. (a) Unsay gisaad ni Jesus mahitungod sa balaang espiritu? (b) Unsa ang usa ka paagi nga ang balaang espiritu motabang kanato?
15 Sa hapit na siyang mamatay, gisubli ni Jesus ang pasalig nga iyang gihatag diha sa iyang mga ilustrasyon. Naghisgot bahin sa balaang espiritu, giingnan niya ang iyang mga apostoles: “Hangyoon ko ang Amahan ug hatagan kamo niya ug laing magtatabang nga magauban kaninyo hangtod sa kahangtoran.” (Juan 14:16) Busa si Jesus nagsaad nga ang magtatabang, o ang balaang espiritu, magauban sa iyang mga sumusunod sa umaabot nga mga panahon, lakip na sa atong adlaw. Unsa ang usa ka hinungdanong paagi nga kita nakatagamtam karon sa maong tabang? Ang balaang espiritu motabang kanato sa paglahutay sa lainlaing mga pagsulay. Sa unsang paagi? Si apostol Pablo, nga nakasagubang usab ug mga pagsulay, naghubit diha sa usa ka sulat ngadto sa mga Kristohanon sa Corinto kon sa unsang paagi ang espiritu sa Diyos mitabang kaniya. Hisgotan nato sa makadiyot ang iyang gisulat.
16. Sa unsang paagi ang atong kahimtang susama tingali nianang kang Pablo?
16 Una, si Pablo madayganong miingon sa iyang mga isigkamagtutuo nga siya nakigbisog sa usa ka “tunok sa unod,” o usa ka matang sa pagsulay. Dayon miingon siya: “Tulo ka higayon ako nangaliyupo sa Ginoo [Jehova] nga unta kini mobiya kanako.” (2 Corinto 12:7, 8) Bisan tuod mihangyo si Pablo nga kuhaon sa Diyos ang maong pagsulay, kini nagpabilin. Tingali nag-atubang ka usab ug susamang kahimtang karon. Sama kang Pablo, nag-ampo ka tingali nga mapadayonon ug masaligon, nga naghangyo kang Jehova nga kuhaon ang usa ka pagsulay. Apan, bisan pa sa imong padayong paghangyo nagsagubang ka gihapon sa maong problema. Nagpasabot ba kana nga wala tubaga ni Jehova ang imong mga pag-ampo ug wala ka tabangi sa iyang espiritu? Wala gayod! (Salmo 10:1, 17) Matikdi ang sunod nga gisulti ni apostol Pablo.
17. Sa unsang paagi gitubag ni Jehova ang mga pag-ampo ni Pablo?
17 Ingong tubag sa mga pag-ampo ni Pablo giingnan siya sa Diyos: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.” Si Pablo miingon: “Busa, sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako.” (2 Corinto 12:9; Salmo 147:5) Busa, naeksperyensiyahan ni Pablo nga pinaagi kang Kristo, ang gamhanang panalipod sa Diyos gibuklad ibabaw kaniya samag usa ka tolda. Sa pagkakaron, si Jehova nagatubag sa atong mga pag-ampo sa samang paagi. Iyang gibuklad ang iyang panalipod samag usa ka tolda ibabaw sa iyang mga alagad.
18. Nganong makaantos man kita sa mga pagsulay?
18 Siyempre, ang usa ka tolda dili makapugong sa pagbundak sa ulan o sa paghuros sa hangin, apan kini nagtaganag igong proteksiyon batok nianang maong mga elemento. Sa samang paagi, ang tolda nga gitagana pinaagi sa “gahom ni Kristo” dili mosanta sa mga pagsulay o mga kalisdanan nga modangat kanato. Bisan pa niana, kini maghatag ug espirituwal nga panalipod batok sa makadaot nga mga elemento niining kalibotana ug sa mga pag-atake sa magmamando niini, si Satanas. (Pinadayag 7:9, 15, 16) Busa, bisan pag nagsagubang ka ug pagsulay nga dili ‘mobiya kanimo,’ makaseguro ka nga si Jehova nahibalo sa imong pagpakigbisog ug siya misanong sa “tingog sa imong pagtuaw.” (Isaias 30:19; 2 Corinto 1:3, 4) Si Pablo misulat: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13; Filipos 4:6, 7.
19. Unsay determinado nimong buhaton, ug ngano?
19 Ibutang ta, ang presenteng “kataposang mga adlaw” niining dili-diyosnong kalibotan gitiman-an sa “makuyaw nga mga panahong lisod sagubangon.” (2 Timoteo 3:1) Bisan pa niana, alang sa mga alagad sa Diyos, kini maoy mga panahon nga dili imposibleng masagubang. Ngano? Tungod sa pagpaluyo ug panalipod sa balaang espiritu sa Diyos, nga kinabubut-on ug madagayaong gihatag ni Jehova sa tanan nga nangayo kaniya niana nga mapadayonon ug masaligon. Hinaot nga magmadeterminado kita sa pagpadayon sa pagpangayo ug balaang espiritu sa adlaw-adlaw pinaagi sa pag-ampo.—Salmo 34:6; 1 Juan 5:14, 15.
Unsay Imong Tubag?
• Unsay kinahanglan natong buhaton aron makadawat sa balaang espiritu sa Diyos?
• Nganong makasalig kita nga si Jehova motubag sa atong pag-ampo sa pagpangayo ug balaang espiritu?
• Sa unsang paagi ang balaang espiritu motabang kanato sa pag-antos sa mga pagsulay?
[Hulagway sa panid 21]
Unsay atong makat-onan gikan sa ilustrasyon ni Jesus bahin sa porsigidong tig-abiabi?
[Hulagway sa panid 22]
Mapadayonon ka bang nag-ampo alang sa balaang espiritu sa Diyos?
[Hulagway sa panid 23]
Unsay atong makat-onan bahin kang Jehova gikan sa ilustrasyon sa usa ka mahingawaong amahan?