Nakadawat ug Makatandog-sa-Kasingkasing nga Pagtudlo ang mga Graduwado sa Gilead

SA SEPTIYEMBRE 9, 2006, ang graduwasyon sa ika-121ng klase sa Watchtower Bible School of Gilead gipahigayon sa Watchtower Educational Center sa Patterson, New York. Kadto maoy makapadasig nga programa.

Si Geoffrey Jackson, usa ka membro sa Nagamandong Lawas sa mga Saksi ni Jehova, nagbukas sa programa pinaagi sa pag-abiabi sa 56 ka graduwado ug sa 6,366 ka tumatambong gikan sa lainlaing nasod. Iyang gikonsiderar ang Salmo 86:11, nga nagkanayon: “Oh Jehova, tudloi ako mahitungod sa imong dalan. Ako magalakaw sa imong kamatuoran. Bug-osa ang akong kasingkasing sa pagkahadlok sa imong ngalan.” Si Brader Jackson naghisgot sa tulo ka butang nga gipasiugda nianang tekstoha. Siya miingon: “Sa unang tudling pulong gipasiugda ang pagtudlo; sa ikaduha, ang pagpadapat; ug sa ikatulo, ang panukmod. Kining tulo ka butang hinungdanon ilabina kaninyong mga misyonaryo sa dihang kamo moadto na sa inyong mga teritoryo.” Dayon iyang gihisgotan ang sunodsunod nga mga pakigpulong ug mga interbiyo nga nagpasiugda nianang tulo ka butang.

Makapadasig nga mga Pagtudlo

Si William Malenfant, usa sa mga kawani sa hedkuwarter, naghisgot sa temang “Ang Kinamaayohang Kinabuhi nga Mabatonan.” Iyang gipasiugda ang panig-ingnan ni Maria, nga igsoon ni Marta. Sa usa ka higayon nga miduaw si Jesus sa ilang balay, gipili ni Maria nga molingkod sa tiilan ni Jesus aron maminaw kaniya, nga naghimo niana nga iyang prioridad. Giingnan ni Jesus si Marta: “Gipili ni Maria ang maayong bahin, ug dili kini pagakuhaon gikan kaniya.” (Lucas 10:38-42) “Hunahunaa ra kana,” matod pa sa mamumulong. “Mahinumdoman ni Maria hangtod sa hangtod nga siya milingkod sa tiilan ni Jesus ug personal nga nakadungog sa kahibulongang espirituwal nga mga kamatuoran—tungod kay mihimo siyag maayong pagpili.” Human pahalipayi ang mga graduwado tungod sa ilang maayong espirituwal nga mga pagpili, siya miingon: “Ang inyong mga pagpili nag-agak kaninyo sa kinamaayohang kinabuhi nga mabatonan.”

Human niana, si Anthony Morris, usa ka membro sa Nagamandong Lawas, nagtagik sa temang “Isul-ob ang Ginoong Jesu-Kristo,” pinasukad sa Roma 13:14. Sa unsang paagi mabuhat nato kini? Gipasiugda ni Brader Morris ang potnot niining tekstoha diha sa Reference Bible, nga nag-ingon: “Sundoga ang mga kinaiya sa Ginoo.” Busa kini nagpasabot nga sundogon ang panig-ingnan ug panghunahuna ni Jesus. “Ang mga tawo gustong makig-uban kang Jesus,” miingon ang mamumulong, “tungod kay duna siyay tiunay nga interes kanila, ug ila kanang namatikdan.” Dayon gihisgotan sa mamumulong kon sa unsang paagi ang mga estudyante nakabaton ug daghang kahibalo sa ilang pagtuon sa Gilead “aron . . . masabtan . . . ang gilapdon ug gitas-on ug gihabogon ug giladmon” sa kamatuoran, sumala sa giingon sa Efeso 3:18. Apan gipahinumdoman niya sila sa bersikulo 19, nga nag-ingon: “Ug aron mahibaloan ang gugma ni Kristo nga nagalabaw sa kahibalo.” Si Brader Morris nag-awhag sa mga estudyante: “Samtang kamo magpadayon sa inyong personal nga pagtuon, palandonga kon sa unsang paagi inyong masundog ang mahigugmaong kalulot ni Kristo ug ‘masul-ob gayod ang Ginoong Jesu-Kristo.’”

Ang Kataposang Tambag sa mga Instruktor sa Gilead

Ang sunod nga pakigpulong gihatag sa usa ka instruktor sa Gilead, si Wallace Liverance, nga ang tema gipasukad sa Proverbio 4:7. Siya miingon nga bisan tuod hinungdanon ang diyosnong kaalam, angay usab natong ‘batonan ang pagsabot,’ nga naglangkit sa pagkonektar sa tagsa-tagsa ka impormasyon ug dayon hunahunaon kon sa unsang paagi nalambigit ang usag usa aron masabtan ang kahulogan sa usa ka butang. Gipakita sa mamumulong nga ang pagbaton ug pagsabot magdalag kalipay. Pananglitan, sa panahon ni Nehemias, ang mga Levihanon “nagpatin-aw sa balaod” ug ‘nagpasabot’ niana. Dayon, ang mga tawo ‘nagmaya sa hilabihan, kay ilang nasabtan ang mga pulong nga gipahibalo kanila.’ (Nehemias 8:7, 8, 12) Si Brader Liverance mihinapos: “Ang kalipay maoy resulta sa pagkasabot sa Pulong sa Diyos nga giinspirar sa espiritu.”

Ang tema nga “Kinsa ba Gayod ang Inyong Kaaway?” gihisgotan ni Mark Noumair, laing instruktor sa Gilead. Sa gubat, daghang sundalo ang nangamatay tungod kay aksidenteng naigo sa ilang mga kauban. “Komosta man diha sa atong espirituwal nga pagpakiggubat?” siya nangutana. “Kon dili mag-amping, mahimong malibog kita kon kinsa gayod ang atong kaaway ug atong masamdan ang atong mga kauban.” Ang kasina mahimong maoy nakaingon nga malibog ang pipila. Mao kanay hinungdan kon nganong misulay si Haring Saul sa pagpatay kang David, nga iyang isigkamagsisimba, nga mga Filistehanon man unta ang ilang kaaway. (1 Samuel 18:7-9; 23:27, 28) Dayon mipadayon ang mamumulong: “Komosta kon mag-alagad kamo uban sa usa ka misyonaryo nga mas labawg katakos kay kaninyo sa daghang paagi? Inyo bang samdan ang inyong isigkasundalo pinaagi sa pagdaot kaniya, o malinawon ninyong dawaton nga ang uban labaw kaninyo sa lainlaing paagi? Kon mao ray atong bantayan ang mga kahuyangan sa uban, lagmit malibog kita kon kinsa gayod ang atong kaaway. Pakigbugno sa tinuod nga kaaway, si Satanas.”

Makapalipayng mga Kasinatian ug Matulon-anong mga Interbiyo

Ang sunod nga bahin, “Himoa ang Buluhaton sa Usa ka Tig-Ebanghelyo,” gidumala sa usa ka instruktor sa Gilead nga si Lawrence Bowen ug kini naglakip ug mga interbiyo ug mga kasinatian. Iyang gisaysay ang potnot sa 2 Timoteo 4:5 diha sa Reference Bible nga nag-ingon, himoa ang buluhaton “sa usa ka misyonaryo.” Ang mamumulong midugang: “Tukma gayod kini, kay ang pangunang buluhaton sa usa ka misyonaryo nga gibansay sa Gilead mao ang pagpakaylap sa maayong balita, ug mao kanay gihimo niini nga klase bisan asa sila nakakaplag ug mga tawo.” Ang pipila ka makalilipayng mga kasinatian gipasundayag.

Gisundan kana sa duha ka bahin nga gidumala nila ni Michael Burnett ug Scott Shoffner, mga membro sa pamilyang Bethel. Ilang giinterbiyo ang mga membro sa Komite sa Sanga gikan sa Australia, Barbados, Korea, ug Uganda. Ang mga komento sa mga membro sa komite nagbutyag kon unsa ka dako ang pagpaningkamot aron maatiman ang mga panginahanglan sa mga misyonaryo, nga naglakip sa pagtagana kanilag maayong puy-anan ug pag-atiman sa ilang panglawas. Ang mga membro sa komite nagpasiugda nga ang malamposong mga misyonaryo andam nga mopasibo sa lokal nga mga kahimtang.

Usa ka Makapadasig ug Makapalihok nga Panapos

Ang pangunang diskurso sa programa mao ang pakigpulong nga “Kahadloki Ninyo ang Diyos ug Ihatag Kaniya ang Himaya,” nga gipahayag ni John E. Barr, usa ka dugay nang membro sa Nagamandong Lawas. Iyang gihisgotan ang Pinadayag 14:6, 7, nga mabasa: “Nakita ko ang laing manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan, nga sa makusog nga tingog nagaingon: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.’”

Giawhag ni Brader Barr ang mga estudyante nga hinumdoman ang tulo ka butang bahin nianang manulondaa. Una, kinahanglan niyang imantala ang maayong balita nga si Kristo naghari na uban ang bug-os nga awtoridad sa Gingharian. Miingon ang mamumulong: “Kombinsido gayod kita nga siya naentrono niadtong 1914. Busa kinahanglang imantala kining makalilipayng balita sa tibuok yuta.” Ikaduha, ang manulonda miingon: “Kahadloki ninyo ang Diyos.” Gisaysay sa mamumulong nga kinahanglang tabangan sa mga graduwado ang ilang mga estudyante sa Bibliya sa pag-ugmad ug pagtahod sa Diyos aron dili sila makahimog bisan unsang butang nga makapasuko kaniya. Ikatulo, ang manulonda nagsugo: ‘Ihatag sa Diyos ang himaya.’ Ang mga estudyante giawhag: “Ayaw ninyog kalimti nga kita nag-alagad alang sa himaya sa Diyos, dili alang sa atong kaugalingon.” Dayon, sa paghisgot sa ‘takna sa paghukom,’ si Brader Barr miingon: “Duol na kaayo ang panahon nga ipakanaog ang kataposang paghukom. Daghan diha sa atong mga teritoryo ang kinahanglan pang makadungog sa maayong balita sa dili pa ulahi ang tanan.”

Lab-as pa sa ilang mga igdulungog kining mga pulonga sa dihang gitunol ngadto sa 56 ka mga graduwado ang ilang mga diploma ug gipadala sila ngadto sa kinatumyan sa yuta. Ang kasingkasing sa mga graduwado ug sa tanang nanambong natandog gayod sa makapalihok nga tambag nga ilang nadawat nianang makalilipay nga adlaw.

[Kahon sa panid 17]

ESTADISTIKA SA KLASE

Gidaghanon sa mga nasod nga gihawasan: 6

Gidaghanon sa mga nasod nga gipadalhan: 25

Gidaghanon sa mga estudyante: 56

Aberids nga edad: 35.1

Aberids nga katuigan sa kamatuoran: 18.3

Aberids nga katuigan sa bug-os-panahong pag-alagad: 13.9

[Hulagway sa panid 18]

Ika-121 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.