Ang Mabangis nga Kalibotan Karon

SI María 64 anyos ug nag-inusara sa pagpuyo. Nakaplagan siyang patay diha sa iyang balay kay gikulata ug gituok pinaagig kable.

Gikulata sa masuk-anong panon sa mga tawo ang tulo ka polis, nga nag-akusar nga gikidnap sa mga polis ang duha ka batan-on. Gibuboan nilag gasolina ang duha sa mga polis, gisilaban kini, ug gilamoy kini sa kalayo. Ang ikatulo nakatigayon sa pag-ikyas.

Ang tawag sa telepono sa usa ka tawo nga wala magpaila mitultol ngadto sa makapakurat nga kaplag. Ang patayng lawas sa upat ka lalaking bakasyonista nakalotan diha sa usa ka tanaman. Sila gitaptapan, ug ang ilang mga kamot gigapos. Nasayran pinaagi sa awtopsiya nga sila gilubong nga buhi.

Kining linuog nga mga buhat dili mga esena gikan sa mabangis ug mapintas nga makahahadlok nga mga salida. Kining maong mga taho pulos tinuod nga mga sugilanon nga di pa dugayng nahimong ulohang-balita diha sa usa ka nasod sa Latin Amerika. Apan, kanang nasora dili lang maoy nakasinatig kabangisan niining kalibotan karon.

Ang mabangis nga mga buhat kaylap na kaayo. Ang mga pagpamomba, terorismo, pagbuno, pag-atake, pagpamusil, ug pagpanglugos maoy tipik lamang nianang mabangis nga mga buhat. Sa makadaghan, ang media nagpresentar ug tataw nga mga balita bahin sa linuog nga mga buhat, ug daghang tawo ang dili na makurat nga makakita o makadungog sa maong kabangisan.

Makapangutana ka tingali: ‘Unsay nagakahitabo sa kalibotan karon? Nawala na ba ang paghunahuna sa pagbati sa uban ug ang pagtahod sa kinabuhi?’ Nganong ingon man niini ang kalibotan?

Karon tagda si Harry, usa ka 69-anyos nga lalaking may kanser. Ang iyang asawa nag-antos sa multiple sclerosis (usa ka sakit nga moresulta sa paralisis), apan ginatabangan sila sa ilang mga silingan ug mga higala. “Ambot mag-unsa na lang mi kon wala kining mga tawhana nga nagtabang kanamo,” matod ni Harry. Sa Canada, diin siya nagpuyo, gipadayag sa usa ka pagtuon nga kapin sa 50 porsiyento sa mga tawo nga tig-atiman sa mga tigulang adunay ginatabangan nga tigulang nga dili nila paryente. Sa walay duhaduha, may kaila kang ordinaryo nga mga tawo nga kanunayng nagpakitag kalulot ug pagkamahigalaon. Oo, ang mga tawo adunay katakos sa pagpakitag pagkamabination ug kalulot inay mahimong bangis.

Nan, nganong daghan mang linuog nga mga buhat? Unsay nagtukmod sa mga tawo nga magmabangison? Mausab ba kadtong mga tawo nga mabangisong nagtratar sa uban? Matapos ba gayod ang kabangisan? Kon mao, sa unsang paagi ug kanus-a?

[Picture Credit Line sa panid 3]

Train: CORDON PRESS