Pagkamabination Diha sa Mapintas nga Kalibotan

USA ka tawo sa Burundi ang gimalarya. Kinahanglang madala dayon siya sa ospital. Apan unsaon man? Walay sakyanan nga makahatod niya. Duha ka suod niyang higala ang mitabang. Ilang gisakay siya sa bisikleta ug gitulod kini sulod sa lima ka hagong mga oras latas sa kabukiran. Dayon gipasakay siyag bus nga maghatod niya sa kinadul-ang ospital. Pipila ka adlaw sa ulahi, miarang-arang na siya.

Sa laing dapit sa kalibotan, human sa Bagyong Katrina nga mipayhag sa pipila ka dapit sa Tinipong Bansa niadtong Agosto 2005, ang usa ka grupo sa mga boluntaryo nakakitag balay nga naguba kay natumbahan sa mga kahoy. Bisag dili gayod sila kaila sa tagbalay, ilang gigugol ang tibuok adlaw aron makuha ang natumbang mga kahoy ginamit ang mga chain saw. “Mapasalamaton kaayo ako niining mga tawhana,” matod sa tagbalay.

Ang hinobrang mga taho sa radyo ug telebisyon kasagarang nagpasiugda sa makalilisang ug mapintas nga mga buhat. Ang mga buhat sa pagkamabination ug kalulot sagad nahawngan niining mga balitaa. Apan wala kini makausab sa kamatuoran nga ang mga tawo bisan asa nanginahanglan gayod ug gugma, pagmahal, ug simpatiya. Nangandoy gayod kita ug pagkamabination! Kining mga pagbatia kasagarang ipakita panahon sa Pasko, dihang ang mga tawo mosulti o moawit bahin sa ‘pakigdait ug maayong kabubut-on ngadto sa mga tawo.’—Lucas 2:14, King James Version.

Lisod tingaling ipakita ang pagkamabination diha sa usa ka kalibotan nga morag naglabi ang pagkadili-mahigalaon ug pagkadili-maabiabihon. Ang kasagarang tinamdan sa mga tawo mao nga ang kabangis ug kawalay-pagbati maoy makahatag ug kalamposan ug kadaogan. Daghan ang nagkinabuhi pinasukad sa prinsipyo nga mas maalamon pang magmapintason kay sa magmabination. Dali ra gayong mapugngan ang pagkamabination tungod sa kahakog ug hinobrang pagtamod sa kaugalingon.

Ingong resulta, daghan ang nag-una sa ilang kaugalingon nga wala magtagad sa pagbati o kaayohan sa uban. Ang sikat nga mga magdudula ug mga artista sa pelikula sagad gipaila ingong “tinuod nga mga lalaki,” isog ug dili mabination. Ingon usab nianag batasan ang pipila ka magmamando sa gobyerno.

Busa, makapangutana kita: Nganong angay kitang magmabination? Mapuslanon ba kini? Ug unsay makatabang kanato sa pagpasundayag niini? Hisgotan sa sunod artikulo kining mga pangutanaha.

[Kahon sa panid 3]

•Kahuyangan ba ang pagpasundayag ug pagkamabination?

•May kaayohan bang ikahatag ang pagkamabination?

•Sa unsang praktikal nga mga paagi nga imong ikapasundayag ang pagkamabination?