Mga Pangutana Gikan sa mga Magbabasa

Banhawon ba ang bata nga nakuha samtang gisabak o nahimugsong patay?

Ang kaguol niadtong mga namatyan ug bata kay nakuha o nahimugsong patay dili gayod mahanduraw. Grabe kaayo ang bationg kaguol sa ubang mga ginikanan nga namatyan. Usa ka inahan namatyag lima ka anak sa wala pa kini sila matawo. Nalipay siya dihang nakabaton siyag duha ka himsog nga mga anak nga lalaki. Apan dili gayod siya malimot sa kasakit nga iyang gibati dihang namatay ang matag usa sa iyang mga anak. Nahibalo siya kon pila na untay edad sa iyang mga anak nga nakuha o patay nang daan sa pagkahimugso. Makalaom ba ang maong mga Kristohanon nga mabanhaw ang namatay nilang mga anak?

Wala kita mahibalo. Wala gayod maghisgot ang Bibliya nga banhawon ang mga bata nga nakuha samtang gisabak o patay nang daan dihang gihimugso. Hinuon, adunay mga prinsipyo diha sa Pulong sa Diyos nga naghisgot bahin niini ug kini mahimong makahupay kanato.

Atong tagdon ang duha ka pangutana nga nalangkit niini. Una, sumala sa panglantaw ni Jehova, kanus-a magsugod ang kinabuhi sa tawo—sa pagsamkon o sa pagkatawo? Ikaduha, unsay panglantaw ni Jehova sa bata nga gisabak—ingong indibiduwal o ingong mga selula ug mga tisyu diha sa tagoangkan sa iyang inahan? Ang mga prinsipyo sa Bibliya naghatag ug tin-awng tubag niining mga pangutanaha.

Ang Balaod ni Moises klarong nagpakita nga ang kinabuhi magsugod, dili sa pagkatawo kondili samtang gisabak pa. Sumala sa balaod, silotan ug kamatayon ang tawo nga makapatay ug bata nga gisabak pa. Kini ang giingon sa balaod: “Kamo magahatag ug kalag alang sa kalag.”a (Ex. 21:22, 23) Busa ang bata diha sa tagoangkan maoy usa ka buhing indibiduwal. Tungod niini, gilantaw sa milyonmilyong Kristohanon ang aborsiyon ingong seryosong sala batok sa Diyos.

Apan alang kang Jehova unsa ka bililhon ang kinabuhi sa bata diha sa tagoangkan? Sumala sa balaod nga gihisgotan sa ibabaw, patyon ang tawo nga nakaingon sa kamatayon sa bata sulod sa tagoangkan. Busa sa panglantaw sa Diyos, bililhon gayod ang bata sulod sa tagoangkan. Dugang pa, daghang teksto sa Kasulatan nagpakita nga gilantaw ni Jehova ang mga bata nga wala pa matawo ingong mga indibiduwal. Pananglitan, si Haring David giinspirar sa pag-ingon bahin kang Jehova: “Gisalipdan mo ako sa sulod sa tiyan sa akong inahan. . . . Ang imong mga mata nakakita bisan sa binhi pa ako sa tagoangkan, ug ang tanan nga bahin niini nahisulat diha sa imong basahon, mahitungod sa mga adlaw sa dihang kini sila naumol.”—Sal. 139:13-16; Job 31:14, 15.

Nakita usab ni Jehova nga ang mga bata nga wala pa matawo adunay kaugalingong mga kinaiya ug lagmit may maayong kaugmaon. Sa dihang ang asawa ni Isaac nga si Rebeca nagsabak ug kaluha, si Jehova mipahayag ug usa ka tagna bahin niining duha ka batang lalaki nga nagpatiray sulod sa iyang tagoangkan. Kini nagpasabot nga nakita daan ni Jehova ang mga kinaiya niining mga bataa, nga makaimpluwensiya pag-ayo sa mga tawo sa umaabot.—Gen. 25:22, 23; Roma 9:10-13.

Makapainteres usab ang kahimtang ni Juan Bawtista. Ang Ebanghelyo nag-ingon: “Sa dihang nadungog ni Elisabet ang pangomosta ni Maria, ang bata sulod sa iyang tagoangkan miulpot; ug si Elisabet napuno sa balaang espiritu.” (Luc. 1:41) Sa pag-asoy niining hitaboa, ang doktor nga si Lucas migamit ug Gregong pulong nga mahimong nagtumong sa bata nga gisabak o sa bata nga nahimugso na. Gigamit usab niya kining pulonga sa paghisgot sa masuso nga si Jesus nga naghigda sa pasungan.—Luc. 2:12, 16; 18:15.

Sa katibuk-an, ang Bibliya ba nagpakita nga dunay kalainan ang bata diha sa tagoangkan ug ang bata nga gihimugso? Wala. Ug nahiuyon kini sa panukiduki sa modernong siyensiya. Pananglitan, nadiskobrehan sa mga tigdukiduki nga ang bata nga anaa sa tagoangkan makamatikod ug moreaksiyon sa nagakahitabo sa gawas sa tagoangkan. Busa dili ikatingala nga ang inahan masuod pag-ayo sa bata nga iyang gisabak.

Ang mga bata matawo human sa lainlaing gidugayon sa pag-ugmad sulod sa tagoangkan. Pananglitan: Ang usa ka inahan ahat nga nanganak apan ang bata namatay ra paglabay sa pipila ka adlaw. Laing inahan eksakto sa panahon sa pagmabdos, apan patay na ang bata sa ipanganakay na siya. Makalaom ba ang primerong inahan nga mabanhaw ang iyang anak kay natawo ang bata bisag ahat, samtang ang ikaduhang inahan dili makalaom nga mabanhaw ang iyang anak kay natawo siyang patay?

Ang Bibliya tin-awng nag-ingon nga ang kinabuhi magsugod panahon sa pagsamkon ug gilantaw ni Jehova ang bata sulod sa tagoangkan ingong linain ug minahal nga indibiduwal. Tungod niini nga mga kamatuoran sa Bibliya, ang uban naghunahuna nga daw nagkasumpaki ang pag-ingon nga dili banhawon ang usa ka bata nga natawong patay. Sa pagkatinuod, nagtuo sila nga kini nga pangatarongan makapaduhaduha sa atong Kasulatanhong baroganan batok sa aborsiyon, nga gibase niini nga mga kamatuoran.

Sa nangagi, kining magasina nagpatungha ug mga pangutana nga morag dili na banhawon ang mga bata nga nahimugsong patay. Pananglitan, magtisok ba ang Diyos ug nagkamulog porma nga bata diha sa tagoangkan sa iyang inahan didto sa Paraiso? Apan human sa dugang pagtuon ug mainampoong pagpamalandong, ang Nagamandong Lawas nakahinapos nga kana dili hinungdanon kon bahin sa pagkabanhaw. Si Jesus miingon: “Ang tanang butang posible sa Diyos.” (Mar. 10:27) Ang kasinatian mismo ni Jesus nagpakita nga wala gayoy imposible sa Diyos; ang iyang kinabuhi gibalhin gikan sa langit ngadto sa tagoangkan sa usa ka ulay, nga imposible gayod sa tawhanong panglantaw.

Busa kini ba nagpasabot nga ang Bibliya nagtudlo nga banhawon ang mga bata nga namatay sa wala pa mahimugso? Sa pagkatinuod ang Bibliya walay direktang tubag bahin niana, busa dili kita makaingon nga sila pagabanhawon. Daghan kaayong pangutana ang mapatungha bahin niini. Busa mas maayo nga dili kita mangagpas. Kini ang atong matino: Kining tanan nag-agad kang Jehova nga Diyos, kinsa dagaya sa pagkamaluluy-on ug mahigugmaong-kalulot. (Sal. 86:15) Nagtinguha gayod siya sa pagbawi sa kadaot nga gipahinabo sa kamatayon pinaagi sa pagkabanhaw. (Job 14:14, 15) Makasalig kita nga iya gayong buhaton kon unsa ang matarong. Iyang alimon ang tanang kasakit nga atong naagoman niining daotang sistema sa mga butang samtang mahigugmaon niyang giyahan ang iyang Anak sa “pagbungkag sa mga buhat sa Yawa.”—1 Juan 3:8.

[Footnote]

[Hulagway sa panid 13]

Si Jehova magaalim sa tanang kasakit