Kinabuhi—Usa ka Gasa nga Pagamahalon

SA DIHANG gihatag ni Jehova nga Diyos ang pribilehiyo sa pagpanganak sa tawhanong pamilya, pagkatalagsaon nga gasa kadto! Usa ka matahom nga bata moabot nga pagadawaton sa nagahulat nga mga bukton sa malipayong magtiayon nga naghigugmaay sa usag usa ug andam sa pagmahal ug pag-atiman niining gamayng produkto sa ilang panaghiusa sa kaminyoon. Kalipay lamang ang nagahulat sa pamilya samtang ginabukhad ang kinabuhi sa bata.

Apan ang sala ni Adan ug Eva naghatag ug makasubong mga sangpotanan sa mga bata nga natawo sa tawhanong rasa. Ingong sangpotanan sa sala, ang atong unang inahan gitunglo sa kasub-anan ug pisikal nga kasakit sa nanganak siya. Ug ang makasasala nga palibot nga gihimugsoan sa iyang mga anak nagpahimo sa pagpanganak nga usa ka lisod dag-on nga hagit. Busa, diha niining komplikadong kalibotan karon, dili ikahibulong nga ang pagsamkon ug bata sagad ginasugat ug kaguol. Bisan pa, unsa ang panglantaw sa Maglalalang sa wala pa matawo? Kini ba nausab uban sa pag-usab sa nagabag-ong moralidad? Wala gayod. Ang iyang panglantaw ug kabalaka alang sa wala pa matawong mga bata sa kalibotan nagpabiling wala mausab.

Gitin-aw sa Kasulatan nga diha sulod sa inahan maoy usa ka talagsaong indibiduwal nga tawong nagaugmad. Ang kinabuhi magsugod sa pagsamkon. Ang pagkatawo diha sa kalibotan nagapadayag lamang sa tawo sa bata nga nakita na sa Diyos. Si Ezekiel naghisgot bahin sa “matag bata nga miabli sa tagoangkan.” (Ezekiel 20:26) Gibatbat ni Job “ang mga ganghaan sa tagoangkan sa akong inahan,” ug nagtawag sa mga pagkahulog sa bata nga “mga bata nga wala makakitag kahayag.”​—Job 3:10, 16.

Matikdi ang malulot nga pagtagad ni Jehova nga Diyos sa delikadong kinabuhi samtang nagatubo kini diha sa tagoangkan. Siya miingon kang Jeremias: “Sa wala pa nako ikaw umola diha sa tiyan nakaila na ako kanimo, ug sa wala pa ikaw mogula sa tagoangkan gibalaan ko na ikaw.” (Jeremias 1:5) Si David miingon: “Ang akong mga bukog wala hisalipdi gikan kanimo sa dihang gihimo ako sa tago, sa dihang gilala ako didto sa kahiladman sa yuta. Ang imong mga mata nakakita sa akong lawas nga wala pa maporma.” (Salmo 139:15, 16) Gitawag ni Job ang Diyos nga mao “ang Usa nga nagabuhat kanako diha sa tiyan,” kinsa mipadayon sa “pag-andam kanato diha sa tagoangkan.”​—Job 31:15.

Apan unsay ikasulti bahin sa kahingawa sa Diyos alang sa inahang nagsabak nga nawad-ag paglaom nga wala magkinahanglan sa bata? Labaw sa tanang mga persona, ang Maglalalang nahibalo sa mabug-at nga mga responsabilidad sa pagkaginikanan. Kon ang usa ka nagsabak nga inahan, bisag malisod ang mga kahimtang, mopili sa pagbaton sa iyang anak agig pagtahod sa mga kinahanglanon sa Diyos, dili ba iyang panalanginan ang iyang desisyon? Ang ginikanan makahimo ug angay mag-ampo alang sa iyang tabang sa pagmatuto ug usa ka malipayong anak. Diha sa mga panid sa iyang Pulong, ang Diyos naghatag na ug labing maayong tambag nga mabatonan bahin sa pagpadako ug mga anak. Ang pagpadapat sa mga prinsipyo sa Bibliya sa panimalaynong kinabuhi mohatag ug bulahang mga bunga. Ang mga kalipay ug mga ganti sa pagpadako ug diyosnong mga anak mas daghan kay sa mga pagsakripisyo nga mahimo sa pagpadako niini, nga maoy isulti sa tanang magarbohong ginikanan.

Lahi ba ang panglantaw ni Jehova kon ang bata maoy bunga sa panglugos o relasyon sa suod nga paryente? Bisan pag krimen ang gibuhat batok sa inahan, ang bata dili ang mabasol. Ang pagputi sa kinabuhi niini mosangpot lamag usa ka laing buhat sa kapintasan. Sa pagkatinuod si Jehova nahibalo sa mapait nga kasinatian sa emosyon niini nga mga biktimaha ug makatabang sa inahan ug sa anak sa pagsagubang sa sangpotanan sa timbang nga paagi.

Komosta kon sultihan sa doktor ang babayeng mabdos nga ang iyang pagsabak nagapameligro sa iyang kinabuhi? Si Dr. Alan Guttmacher miingon: “Karon posible halos sa bisan kinsang pasyente nga makalahutay sa pagpanganak nga buhi, gawas kon siya nagaantos sa makamatay nga sakit sama sa kanser o leukemia, ug kon mao, walay posibilidad nga ang aborsiyon makapataas, o makaluwas ug kinabuhi.” Ang The Encyclopedia Americana nag-ingon: “Sanglit halos ang tanang mga babaye mahimo man nga makalabang nga luwas sa pagsabak bisag may seryosong medikal nga mga suliran, pipila ka aborsiyon lamang ang kinahanglang himoon aron mapanalipdan ang panglawas sa inahan. Ang kadaghanang aborsiyon ginapangayo aron malikayan ang pagbaton ug anak.” Busa ang maong mga kahimtang talagsaon ra. Apan, kon mahitabo kini sa panahon sa pagpanganak, nan ang mga ginikanan kinahanglang mohimog pagpili sa kinabuhi sa inahan ug nianang sa anak. Ila na kining desisyon.

Ikahibulong ba nga ang Maglalalang sa kinabuhi naghatag ug tin-aw nga mga giya bahin sa paggamit sa atong mga gahom sa pagpanganak? Sa iyang mga mata, sala ang paghimog kinabuhi nga ang usa walay tinguha sa pag-atiman, sama nga sala ang pagpatay ug kinabuhi.

Sa tino, ang debate magpadayon hangtod sa kataposan niining sistemaha. Apan alang sa Maglalalang sa kinabuhi, si Jehova nga Diyos, ug niadtong nagapabili sa iyang mga balaod, kini dili gumonhap. Ang kinabuhi bililhon​—usa ka gasa nga kinahanglang amomahon ug mahalon sukad sa pagsugod niini.

[Kahon sa panid 11]

Paglantaw sa Aborsiyon sa Paagi sa Diyos

UNSAY ikasulti bahin sa batan-on kinsa nanamkon nga gawas sa kaminyoon ug dili gayod preparado sa pagkahimong inahan? Tugotan ba siya sa pagpanganak sa bata ngadto sa kalibotan? Ang pagbati sa Diyos sa bata wala mausab tungod lamang kay ang inahan milihok sa dili-maalamon ug imoral nga paagi. Ang pagkahimugso sa bata sa pagkatinuod makatabang sa inahan sa pagkaamgo sa kinaiyanhong mga resulta sa iyang imoralidad ug busa makapasilsil kaniya sa kaalam sa mga kasugoan sa Diyos. Ang pagpatay sa ebidensiya sa iyang supak nga buhat sa sekso mahimong mohatag kaniya ug kasakit sa pagkasad-an, o kaha mopaisog kini kaniya sa dugang mga buhat sa imoralidad.

Kon walay amahan nga motabang sa pagpas-an sa lulan, ang pagmatuto ug bata dili masayon. Apan ang usa ka malig-ong relasyon uban sa atong langitnong Amahan makatagana sa inahan sa moral ug emosyonal nga kusog, pagpaluyo, ug giya sa pagbuhat niini. Siya nagtagana usab sa Kristohanong kongregasyon aron mapagaan ang palas-anon sa nag-inusarang mga ginikanan.