2 Pagbaton ug Tukmang Kahibalo Bahin sa Diyos
“Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.”—Juan 17:3.
UNSAY BABAG? Ang pipila nag-ingon nga walay Diyos. Ang uban nag-ingon nga ang Diyos dili persona kondili usa ka gamhanang puwersa. Kadtong nagtuo nga siya usa ka persona nagtudlo ug lainlaing doktrina bahin kaniya ug sa iyang mga hiyas.
UNSAON NIMO PAGBUNTOG ANG BABAG? Ang usa ka paagi aron makabaton ug kahibalo sa Diyos mao ang pagpaniid sa mga butang nga iyang gilalang. Si apostol Pablo nag-ingon: “Ang iyang [Diyos] dili-makita nga mga hiyas, nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) Kon imong panid-an pag-ayo ang kalalangan sa Diyos, daghan kag makat-onan bahin sa kaalam ug gahom sa atong Maglalalang.—Salmo 104:24; Isaias 40:26.
Apan, aron mabatonan ang tukmang kahibalo bahin sa mga hiyas sa Diyos, kinahanglang basahon ug tun-an sa matag usa ang Iyang Pulong, ang Bibliya. Ayaw tugoti nga maimpluwensiyahan sa uban ang imong panghunahuna. Hinunoa, sunda ang tambag sa Bibliya: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Pananglitan, tagda ang mosunod nga mga kamatuoran bahin sa Diyos nga gipadayag diha sa Bibliya.
Ang Diyos adunay personal nga ngalan. Sa pagkatinuod, ang ngalan sa Diyos makita sa Bibliya sa linibo ka beses. Daghang hubad ang naglakip niini diha sa Salmo 83:18, nga mabasa: “Aron ang mga tawo mahibalo nga ikaw, kansang ngalan mao si Jehova, ang kinatas-an ibabaw sa tibuok yuta.”—King James Version.
Si Jehova nga Diyos adunay pagbati nga maapektohan sa binuhatan sa mga tawo. Human pagawsa ni Jehova ang mga Israelitas gikan sa pagkaulipon sa Ehipto, may mga higayon nga ilang gisalikway ang iyang maalamong tambag. Ang ilang rebelyosong dalan ‘nakapasakit’ kaniya. Ila gayong “gipasakitan bisan ang Balaang Usa sa Israel” pinaagi sa ilang binuhatan.—Salmo 78:40, 41.
Si Jehova nahangawa sa matag usa kanato. Sa dihang nakig-estorya sa iyang mga apostoles, si Jesus miingon: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.”—Mateo 10:29-31.
Ang Diyos walay gipalabi nga rasa o kultura. Gisultihan ni apostol Pablo ang mga Grego sa Atenas nga “gihimo [sa Diyos] gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta.” Siya miingon usab nga ang Diyos “dili halayo gikan sa matag usa kanato.” (Buhat 17:26, 27) Si apostol Pedro miingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.
UNSAY KAAYOHAN? Ang pipila adunay “kasibot sa Diyos; apan dili sumala sa tukmang kahibalo.” (Roma 10:2) Kon ikaw mahibalo kon unsay tinuod nga gitudlo sa Bibliya bahin sa Diyos, ikaw dili na malimbongan. Hinunoa, kini makapasuod kanimo sa Diyos.—Santiago 4:8.
Alang sa dugang impormasyon, tan-awa ang kapitulo 1, “Unsa ang Kamatuoran Bahin sa Diyos?,” sa librong Unsay Tinuod nga Gitudlo sa Bibliya?a
[Footnote]
a Gipatik sa mga Saksi ni Jehova.
[Hulagway sa panid 6]
Ang usa ka paagi aron makabaton ug kahibalo bahin sa Diyos mao ang pagpaniid sa mga butang nga iyang gilalang