Ang Bibliya Makabag-o sa Kinabuhi
Sa unsang paagi ang usa ka tawo nga tigyupyop ug marijuana ug kusog manigarilyo sukad pa sa iyang pagkabatan-on nakabatog kaisog sa paghunong sa maong mga bisyo? Unsay nakatabang sa usa ka bangis nga membro sa gang sa pagkontrol sa iyang pagkamasuk-anon ug sa pagbuntog sa iyang pagkamapihigon? Tagda kon unsay ilang gisulti.
NGALAN: HEINRICH MAAR
EDAD: 38
NASOD: KAZAKHSTAN
KANIADTO: TIGYUPYOP UG MARIJUANA UG KUSOG MANIGARILYO
KAAGI: Ako natawo sa habagatang Kazakhstan, nga mga 120 kilometros gikan sa siyudad sa Tashkent. Panahon sa ting-init, ang maong lugar uga ug init kaayo nga moabot ug 45 grado Celsius, ug panahon sa tingtugnaw ang temperatura moabot ug −10 grado Celsius—mga klima nga haom gayod sa pagpatubog ubas ug marijuana.
Ang akong ginikanan maoy German ug kagikan. Sila maoy mga membro sa Evangelical Christians apan sila dili aktibo sa ilang relihiyon. Bisan pa niana, ila kong gitudloan sa pagsag-ulo sa pag-ampo nga Amahan Namo. Sa dihang ako 14 anyos, ang akong inahan ug magulang nga babaye nagtuon ug Bibliya uban sa mga Saksi ni Jehova apan wala ra kini magdugay. Usa ka higayon niana, akong nadunggan nga gihisgotan sa duha ka Saksi ang ngalan sa Diyos nga Jehova, ug ila kanang gipakita kang Mama diha mismo sa iyang karaang Bibliya. Nahingangha kaayo ko niana. Apan si Mama wala mopadayon sa pagtuon, ug wala na madugangi ang akong kahibalo bahin sa Diyos. Sa ulahi, samtang ako nag-eskuyla, ang among maestra nagsugilon kanamo ug bakak nga mga estorya nga iyang nadunggan bahin sa mga Saksi ni Jehova. Tungod kay nakasulay kog tambong sa mga tigom sa mga Saksi ni Jehova kauban sa akong igsoong babaye, akong gisultihan ang akong maestra nga dili tinuod ang iyang mga nadunggan.
Sa dihang ako 15 anyos na, ako miadto sa Leningrad, nga karon nailhang St. Petersburg, sa Rusya, aron moeskuyla sa trade school. Akong gipaambit sa akong mga kauban sa balay ang diyutay nakong nahibaloan bahin kang Jehova. Apan, ako misugod sa pagpanigarilyo. Sa dihang ako mobakasyon sa amoa sa Kazakhstan, sayon ra alang kanako ang pagpalit ug marijuana, bisag ilegal kana. Kusog pod kong moinom ug vodka ug lokal nga bino.
Sa dihang nahuman ko sa pag-eskuyla, ako miapil sa kasundalohan sa Sobyet sulod sa duha ka tuig. Bisan pa niana, wala nako malimti ang pipila sa akong nakat-onan sa Bibliya sa dihang ako bata pa. Kon duna akoy kahigayonan, akong sultihan ang akong kaubang mga sundalo bahin kang Jehova ug labanan ang mga Saksi kon makadungog kog bakak nga mga estorya bahin kanila.
Human sa akong pagsundalo, ako mibalhin sa Germany. Samtang ako atua sa temporaryong puy-anan sa mga imigrante, ako nakadawat ug libro nga naghisgot bahin sa Bibliya nga gipatik sa mga Saksi. Akong gibasa kini uban ang dakong kahinam ug nakombinsir nga kini nagsulti sa kamatuoran. Apan, naglisod ko sa pagbuntog sa akong pagkaadik sa marijuana ug sigarilyo. Sa ngadto-ngadto ako mibalhin duol sa siyudad sa Karlsruhe. Didto, nakahibalag akog usa ka Saksi ni Jehova, ug iya kong gitun-an sa Bibliya.
KON SA UNSANG PAAGI GIBAG-O SA BIBLIYA ANG AKONG KINABUHI: Sulod sa taas nga panahon, ako nagtuo gayod nga ang Bibliya Pulong sa Diyos. Ug human nako mabasa ang libro nga akong nadawat, ako nakombinsir nga ang Bibliya nagtaganag tubag sa tanang hinungdanong pangutana bahin sa kinabuhi. Bisan pa niana, taudtaod pa ayha nako naundang ang akong mga bisyo. Sa ulahi, ako napalihok sa tambag sa Bibliya sa 2 Corinto 7:1 ug nakadesisyon nga hinloan ang akong kaugalingon sa “tanang kahugawan sa unod ug espiritu,” nga nagpasabot sa pag-undang sa paggamit ug marijuana ug sa pagpanigarilyo.
Naundang dayon nako ang paggamit ug marijuana. Apan naabtan pag unom ka bulan ayha nako naundang ang pagpanigarilyo. Usa ka adlaw niana, ang Saksi nga nagdumala kanakog pagtuon sa Bibliya nangutana, “Unsay imong plano sa imong kinabuhi?” Kana nakapahunahuna gayod kanako bahin sa akong pagkahinigarilyo. Makadaghan na akong misulay sa pag-undang niana. Apan, nianang higayona, ako midesisyon sa pag-ampo sa dili pa ko matental sa pagpanigarilyo inay sa pagpangayog pasaylo sa Diyos human ko makapanigarilyo. Sa 1993, nagtakda kog adlaw kon kanus-a ko moundang. Sa tabang ni Jehova, wala na gyod ko makagunit ug sigarilyo sukad nianang adlawa.
MGA KAAYOHAN NGA AKONG NABATONAN: Karon nga nakalingkawas na ko gikan sa maong gastoso ug makadaot nga bisyo, maayo na ang akong panglawas. Sa pagkakaron, ako nagboluntaryo sa sangang buhatan sa mga Saksi ni Jehova sa Germany. Nalipay kaayo ko nga akong napadapat ang mga tambag sa Bibliya sa akong kinabuhi! Tungod sa akong pagkahibalo sa mga pagtulon-an sa Bibliya, ang akong kinabuhi duna nay direksiyon.
NGALAN: TITUS SHANGADI
EDAD: 43
NASOD: NAMIBIA
KANIADTO: BANGIS NGA MEMBRO SA GANG
KAAGI: Ako nagdako diha sa usa ka baryo sa rehiyon sa Ohangwena sa amihanang Namibia. Sa dihang nahitabo ang gubat sa among rehiyon sa katuigan sa 1980, ang mga tawo sa among baryo gipangulata ug gipamatay. Mao nga diha sa among lugar, ang usa ka batan-on isipon nga tinuod nga lalaki kon siya maayong makig-away ug makapildi sa ubang batan-on. Busa ako nakakat-on sa pagpakig-away!
Sa dihang ako nakahuman sa pag-eskuyla, ako mipuyo uban sa akong uyoan sa Swakopmund, nga usa ka lungsod duol sa dagat. Wala madugay human ko makaabot didto, miapil ko sa usa ka gang sa rebelyosong mga batan-on. Moadto mi sa mga hotel, bar, ug uban pang mga dapit diha sa lungsod diin gipihig ang itom nga mga tawo aron mangitag away. Sa daghang higayon, kami nakig-away sa mga guwardiya ug sa mga polis. Kada gabii, magdaladala kog hait nga sundang aron itigbas sa dihang may magsurangsurang.
Usa ka gabii niana, samtang nakig-away kami sa among kontra nga gang, diriyot kong mamatay. Dihay usa sa among kaaway nga milipot sa akong luyo ug miaksiyog tigbas sa akong ulo, ug maayo na lang kay napatumba siya sa akong kauban ug nawad-an siyag panimuot. Bisan pa sa maong panghitabo, wala gihapon ko mag-usab. Kon duna koy makalalis, lalaki man o babaye, ako dayong sumbagon.
KON SA UNSANG PAAGI GIBAG-O SA BIBLIYA ANG AKONG KINABUHI: Sa dihang nakahimamat akog usa ka babayeng Saksi ni Jehova, iyang gibasa kanako ang pipila ka bersikulo sa Salmo 37 ug dayon iya kong giingnan nga ang basahon sa Pinadayag naghisgot usab ug nindot nga mga saad nga matuman sa umaabot. Apan, tungod kay wala niya isulti kon asa nasulat sa maong basahon ang maong mga saad, nangita kog Bibliya ug akong gibasa ang tibuok basahon sa Pinadayag nianang gabhiona. Nagustohan gayod nako ang saad nga akong nabasa sa Pinadayag 21:3, 4 nga ang “kamatayon mawala na, ni may pagbangotan ni pagtiyabaw ni may kasakit pa.” Sa dihang mibalik ang mga Saksi, akong gidawat ang ilang gitanyag nga pagtuon sa Bibliya.
Lisod kaayong bag-ohon ang akong paagi sa pagkinabuhi. Apan akong nakat-onan diha sa Buhat 10:34, 35 nga “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” Ako naningkamot usab sa pagpadapat sa Roma 12:18: “Kon mahimo, kutob sa inyong maarangan, makigdinaitay sa tanang tawo.”
Gawas nga kinahanglan nakong kontrolahon ang akong kasuko, kinahanglan usab nakong buntogon ang akong pagkaadik sa sigarilyo. Sagad maghilak ko samtang mangaliyupo kang Jehova alang sa tabang. Apan sa sinugdan sayop ang akong paagi kay moampo ko human matental sa pagpanigarilyo. Ang Saksi nga nagdumalag pagtuon kanako mitambag nga mas maayong moampo sa dili pa ako matental sa pagpanigarilyo. Kinahanglan usab nga molikay ko sa mga tawong nanigarilyo. Dugang pa, akong gisunod ang gitambag kanako nga pakigsultihan ang akong mga kauban sa trabaho bahin sa daotang epekto sa pagpanigarilyo. Kini dakog natabang tungod kay wala nay moagda kanako sa pagpanigarilyo diha sa trabahoan.
Sa ngadto-ngadto, akong nabuntog ang pagpanigarilyo ug akong gibiyaan ang akong daotang paagi sa pagkinabuhi. Human sa unom ka bulan nga pagtuon ug pagpadapat sa mga prinsipyo sa Bibliya, ako nahimong kuwalipikado nga mabawtismohan ingong usa sa mga Saksi ni Jehova.
MGA KAAYOHAN NGA AKONG NABATONAN: Ako nakombinsir nga ang mga Saksi ni Jehova mao gayod ang matuod nga relihiyon kay akong nakita nga sila nagpakitag gugma sa usag usa, bisan pag lainlain ang ilang rasa o kolor. Sa wala pa ko mabawtismohi ingong Saksi, dihay usa ka puti nga membro sa kongregasyon nga nagdapit kanako sa pagpangaon didto sa ilang balay. Daw dili ko makatuo niana. Wala pa ko makasulay nga ako malinawong nakig-uban sa usa ka puting tawo, ilabina sa pagpangaon kauban niya sa ilang balay. Karon ako bahin na sa usa ka internasyonal nga organisasyon nga nagpakitag tinuod nga panag-igsoonay.
Kaniadto, ang mga guwardiya ug mga polis misulay sa pag-usab sa akong paagi sa pagkinabuhi, apan wala sila molampos. Ang Bibliya lamang ang nakapausab sa akong personalidad ug nakapahimo kanakong malipayon.
[Blurb sa panid 29]
“Sagad maghilak ko samtang mangaliyupo kang Jehova alang sa tabang”