Ang Balaang Espiritu—Usa ka Puwersa nga Imong Gikinahanglan sa Imong Kinabuhi

“AYAW ako isalikway gikan sa imong atubangan; ug ayaw kuhaa ang imong balaang espiritu gikan kanako.” (Salmo 51:11) Mao kini ang kinasingkasing nga pag-ampo ni Haring David sa dihang siya nakahimog seryosong sala.

Si David subsob nga nakasinati sa gahom sa balaang espiritu. Sa dihang siya batan-on pa, ang balaang espiritu mitabang kaniya sa pagpildi sa gikahadlokang sundalo nga si Goliat. (1 Samuel 17:45-50) Kini mitabang usab kaniya sa pagkomposo sa pipila sa kinanindotang mga salmo o awit nga nasulat sukad. Si David miingon: “Ang espiritu ni Jehova mao ang misulti pinaagi kanako, ug ang iyang pulong diha sa akong dila.”—2 Samuel 23:2.

Mismong si Jesu-Kristo nagpamatuod nga ang balaang espiritu nagtabang kang David. Sa usa ka higayon, si Jesus misulti ngadto sa iyang mga mamiminaw: “Pinaagi sa balaang espiritu si David miingon, ‘Si Jehova miingon sa akong Ginoo: “Lingkod sa akong tuong kamot hangtod nga ibutang ko ang imong mga kaaway sa ilalom sa imong mga tiil.”’” (Marcos 12:36; Salmo 110:1) Si Jesus nahibalo nga sa dihang gisulat ni David ang iyang mga salmo, siya gigiyahan sa balaang espiritu. Motabang ba usab ang balaang espiritu kanato karon?

“Padayon sa Pagpangayo, ug Igahatag Kini Kaninyo”

Tinuod, dili ka mokomposo ug usa ka salmo, apan lagmit makaatubang kag mga kalisdanan nga lisod buntogon sama sa higanteng si Goliat. Pananglitan, tagda ang kasinatian ni Isabel.a Siya gibiyaan sa iyang bana ug gipulihag mas batan-ong babaye. Siya gibinlag dakong utang ug wala suportahi ang ilang duha ka gagmayng anak nga babaye. “Mibati ko nga giluiban ug gipakawalay-bili,” siya miingon. “Bisan pa niana, sukad sa iyang pagbiya, ako gitabangan sa balaang espiritu aron makalahutay.”

Gidahom ba ni Isabel nga awtomatiko niyang madawat ang balaang espiritu? Wala, hinunoa siya adlaw-adlawng naghangyo sa Diyos bahin niana. Siya nahibalo nga gikinahanglan niya ang tabang sa Diyos aron makalahutay sa iyang kahimtang, maatiman ang iyang mga anak, ug aron mahibalik ang iyang pagtamod sa kaugalingon. Iyang gisunod ang mga pulong ni Jesus: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo.”—Mateo 7:7.

Ang lain pang pananglitan mao si Roberto. Gibati niya nga siya nanginahanglan usab sa tabang sa balaang espiritu tungod kay siya naadik sa sigarilyo ug sa droga nga hashish. Sulod sa duha ka tuig, siya naningkamot sa pag-undang sa iyang bisyo, apan siya napakyas sa makadaghang higayon. “Sa dihang imong undangan ang paggamit ug droga, dili ka mahimutang,” miingon si Roberto. “Ang imong lawas magpangita niini.”

Si Roberto mipadayon: “Apan ako determinado sa pagbag-o sa akong kinabuhi aron ako makaalagad sa Diyos. Gipamalandong nako kanunay ang makapalig-ong mga pulong sa Bibliya. Adlaw-adlaw akong nag-ampo sa Diyos alang sa kusog aron mapahiuyon ang akong kinabuhi sa mga sukdanan sa Bibliya. Nahibalo ko nga dili ko molampos sa akong kaugalingong paningkamot. Ug gitubag gayod ni Jehova ang akong mga pag-ampo, ilabina sa mga panahong mibati kog grabeng kaguol kay natental sa akong bisyo. Kombinsido gyod ko nga gihatagan kog kusog sa balaang espiritu, kay kon wala pa, dili gayod nako mabuntog ang akong bisyo.”—Filipos 4:6-8.

Sila Manglupad nga Daw Agila

Sama kang Isabel ug Roberto, minilyon sa mga Saksi ni Jehova ang nakasinati sa tabang sa balaang espiritu diha sa ilang kinabuhi. Ang aktibong puwersa ni Jehova, nga maoy iyang gigamit sa paglalang sa uniberso, makatabang usab kanimo kon buot nimo. Gusto gayod sa Diyos nga ihatag ang iyang balaang espiritu kon ikaw sinserong mangayo niini. Apan aron imong madawat kini, kinahanglan nga imong sayron ang kamatuoran bahin kaniya ug buhaton ang iyang kabubut-on.—Isaias 55:6; Hebreohanon 11:6.

Pinaagi sa tabang sa balaang espiritu, makabaton kag kusog aron magmalamposon sa pag-alagad sa Diyos ug maatubang ang bisan unsang kalisdanan nga motungha sa imong kinabuhi. Ang Bibliya nagpasalig: “[Si Jehova] naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom. . . . Kadtong naglaom kang Jehova maulian sa kusog. Sila manglupad pataas pinaagig mga pako nga sama sa mga agila. Sila managan ug dili maluya; sila manglakaw ug dili kapoyon.”—Isaias 40:28-31.

[Footnote]

[Blurb sa panid 8]

‘Adlaw-adlaw akong nag-ampo sa Diyos alang sa kusog. Nahibalo ko nga dili ko molampos sa akong kaugalingong paningkamot. Ug gitubag gayod ni Jehova ang akong mga pag-ampo’

[Kahon/Mga hulagway sa panid 7]

KON SA UNSANG PAAGI GIGAMIT SA DIYOS ANG BALAANG ESPIRITU

Ang Diyos naggamit sa balaang espiritu sa paglalang sa yuta ug sa uniberso. “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat,” miingon ang salmista. “Kon ipadala mo ang imong espiritu, malalang sila.”—Salmo 104:24, 30; Genesis 1:2; Job 33:4.

Ang balaang espiritu naggiya sa mga tawo sa pagsulat sa Bibliya. “Ang tibuok Kasulatan inspirado sa Diyos ug mapuslanon,” misulat si apostol Pablo. (2 Timoteo 3:16) Ang Gregong pulong nga gihubad ug “inspirado sa Diyos” literal nga nagkahulogang “ang Diyos naghatag ug gininhawa.” Ang gininhawa, o espiritu, ni Jehova naggiya sa hunahuna sa mga magsusulat sa Bibliya, mao nga ilang nasulat ang “pulong sa Diyos.”—1 Tesalonica 2:13.

Ang balaang espiritu naghatag ug gahom sa mga alagad sa Diyos aron tukma silang makatagna sa umaabot. Si apostol Pedro misaysay: “Walay panagna sa Kasulatan nga nagagikan sa kaugalingong interpretasyon. Kay walay panagna bisan kanus-a nga midangat pinaagi sa kabubut-on sa tawo, hinunoa ang mga tawo nagsulti gikan sa Diyos samtang sila giagak sa balaang espiritu.”—2 Pedro 1:20, 21; Joel 2:28.

Ang balaang espiritu nagtabang kang Jesus ug sa uban pang mga alagad sa Diyos sa pagsangyaw sa maayong balita sa Gingharian sa Diyos ug sa paghimog mga milagro. Si Jesus miingon: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos, siya nagpadala kanako aron sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta.”—Lucas 4:18; Mateo 12:28.

[Kahon/Mga hulagway sa panid 9]

KON SA UNSANG PAAGI ANG BALAANG ESPIRITU MAKATABANG KANATO

Ang balaang espiritu maghatag kanimog kusog sa pagsukol sa tentasyon ug sa pagbuntog sa daotang mga buhat. Si apostol Pablo miingon: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.

Ang balaang espiritu makatabang kanimo sa pag-ugmad ug diyosnong mga hiyas. “Ang bunga sa espiritu mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.

Ang balaang espiritu magpalig-on kanimo sa paglahutay sa mga pagsulay. “Sa tanang butang ako adunay kusog pinaagi kaniya nga naghatag ug gahom kanako.”—Filipos 4:13.