Ang “Maayong Balita” Gisangyaw sa Kinalay-ang mga Isla sa Amihanang Australia

“KINING maayong balita sa gingharian,” matod pa ni Jesus, “igawali sa tibuok gipuy-ang yuta.” (Mateo 24:14) Ang mga Saksi ni Jehova nagtuman sa sugo ni Jesus ug nagwali sa mensahe sa Bibliya ngadto sa mga tawo, bisan diin sila nagpuyo. (Mateo 28:​19, 20) Sila boluntaryong nagtuman niining buluhatona, bisan pag usahay naglangkit kinig dakong sakripisyo ug personal nga gasto.

Pananglitan, si Nathan ug Carly naghimog mga pagpasibo sa ilang kinabuhi aron makasangyaw sa mga tawong nagpuyo sa halayong Torres Strait Islands. Niadtong 2003, usa ka hawas sa opisina sa mga Saksi ni Jehova sa Australia ang nagdapit kanila nga mobalhin sa Thursday Island aron tabangan ang kongregasyon didto. Kini nga isla maoy usa lang sa daghang nindot nga isla sa Pasipiko tali sa Australia ug New Guinea.

Niadtong 2007, ang ilang pamilya mipalit ug karaang lantsa nga ginganlag Teisan-Y. Kini gama sa kahoy ug gigamit kaniadto sa pagpanguhag perlas. Migasto sila aron monindot kini ug magamit sa pagsangyaw ngadto sa mga molupyo sa napulo ka kinalay-ang isla, ug ang Thursday Island maoy ilang paulianan. Ang mosunod mao ang talaan sa pipila nila ka paglawig.

Enero 2008: Nag-speed boat ko paingon sa Bamaga​—⁠80 kilometros nga ida-buwelta​—⁠aron kuhaon ang unom ka Saksi didto. Dayon misakay kami sa Teisan-Y paingon sa mga isla sa Warraber ug Poruma. Ang tangke punog 5,500 litros nga gasolina nga tag-dos dolyares [Australian] kada litro. Hinay kaayo ang lantsa, nga nag-aberids lang ug napulo ka kilometros kada oras. Apan maayo kaayo ang panahon ug linaw ang kadagatan.

Sa among pag-abot sa Warraber, gipondo namo ang lantsa distansiyag gamay sa baybayon ug among gipasakay sa speed boat ang among mga kauban nga dunay mga paryente didto. Dayon nakigkita sila sa konsehal aron mangayog permiso sa pagsangyaw. Bisag usa siya ka pastor, iya ming gitugotan nga mosangyaw sa mga molupyo. Ingon usab niana ang among gihimo sa Poruma ug kami gitugotan sa pagsangyaw. Ang mga tawo mahigalaon kaayo ug gustong mobasa sa among mga basahon. Daghan kanila ang among nasugdan sa pagtuon sa Bibliya.

Abril 2008: Among giplano ang among biyahe paingon sa Dauan, Saibai, ug Boigu​—⁠ang tulo ka kinalay-ang isla duol sa utlanan sa Papua New Guinea (PNG). Dili maayo ang panahon busa mipaingon kami sa Mabuiag Island. Kini maoy 70 kilometros lang gikan sa among giestaran, apan miabot ug 140 kilometros ang among biyahe kay nag-ikis-ikis mi diha sa daghan kaayong katakotan.

Tungod sa dako kaayong balod, ang speed boat nga giguyod sa Teisan-Y natangtang. Bisan pa sa higanteng mga balod, among gipaliko ang lantsa aron balikan kini. Ang kadaghanan kanamo gidagat.

Apan nawala ra dayon sa among buot ang maong panghitabo tungod kay pag-abot sa Mabuiag, gitugotan mi sa pagsangyaw ug mainiton ming giabiabi sa mga molupyo. Ang usa ka babaye malipayon kaayong namati sa among mensahe ug gani mikuha pag dugang basahon aron iyang ikabutang sa librarya nga iyang gitrabahoan.

Mayo-Oktubre 2008: Tungod kay dili na maayo ang panahon, wala namo maadtoi ang mga isla. Gigahin namo ang panahon sa pagsangyaw sa kasilinganan, sa pagtrabaho, ug sa pag-ayo sa lantsa.

Dunay dakong alayohon sa lantsa, busa gidala namo kini sa dunggoanan sa Weipa ug gihaw-as sa dagat pinaagig dakong treyler. Dali ra kanang isulti pero pagkadakong trabaho! Ang mga Saksi sa lokal nga kongregasyon mitabang sa pag-ayo sa mga tubo, sa pagpintal, ug sa uban pang alayohon. Ang uban nagdalag pagkaon ug dihay nagdalag suplay para sa sunod namong panaw sa pagsangyaw. Mapasalamaton kami sa ilang kaayo ug pagtabang kanamo.

Disyembre 2008: Kami milawig na usab paingon sa Dauan, Saibai, ug Boigu. Among nalikayan ang mga bagyo sa tabang sa among radar, ug namaniobra ang lantsa latas sa katakotan sa tabang sa among chart plotter (usa ka himan sa paglawig). Bisag 12 ka oras ang among biyahe paingon sa Dauan, wala namo kini igsapayan kay pwerteng nindota sa isla. Ang nagbuntaog nga batoong mga bungtod natabonan sa panganod. Ang mga molupyo sa Dauan maikagong namati kanamo, ug among gisaaran sila nga ipadayon namo ang panaghisgot sa Bibliya pinaagig telepono sa dihang makauli na mi.

Ang usa ka babaye didto nga si Lettie nakadawat nag mga magasin sa mga Saksi ug misulat sa opisina sa mga Saksi sa Australia aron makadawat ug dugang basahon. Gipadad-an siyag mga basahon ug gisulatan ang among kongregasyon nga kon mahimo duawon siya. Among nakaplagan si Lettie ug nalipay mi nga nakatabang kaniya nga madugangan ang iyang kahibalo sa Diyos.

Sa isla sa Saibai, ang konsehal wala motugot nga mosangyaw mi sa mga molupyo. Apan iyang gitugotan ang among mga kauban nga dunay mga paryente sa maong isla sa pagduaw ug pagpakigsulti kanila. Ang gobyerno naghatag kanakog permit nga manarbaho ingong tigpintal ug mga balay sa Saibai, ug ang akong kinitaan nakatabang sa among mga galastohan.

Ang kauban namong sister nga si Tassie naggikan sa usa ka komunidad sa PNG, nga mga upat ka kilometros lang gikan sa Saibai. Ubos sa usa ka kasabotan sa gobyerno sa Australia, ang mga molupyo sa PNG mahimong magnegosyo sa Saibai. Si Tassie daghag nahibalag nga taga-ila apan wala siyay igong basahon alang kanila. Sukad nga nahimo siyang Saksi ni Jehova, kini ang unang higayon nga siya nakahibalag ug mga tawo gikan sa ilang lugar. Mibalik kami sa lantsa ug gidad-an siyag usa ka karton nga basahon, kadaghanan diha sa pinulongang PNG Pidgin, nga nailhang Tok Pisin. Gipatin-aw ni Tassie ang mensahe sa Bibliya sa kapin sa 30 ka tawo nga taga-PNG, ug gikuha sa mga interesado ang tanang basahon. Ang ilang komunidad maabot lang pinaagig sakayan ug lagmit wala pa gayod maduaw sa mga Saksi ni Jehova.

Lisod kaayo ang pag-adto sa kataposan namong destinasyon, ang isla sa Boigu. Mga upat ka kilometros ang distansiya namo gikan sa baybayon ug ang giladmon sa tubig maoy 2.5 metros lang. Ang unlod sa lantsa maoy 1.8 metros. Ako ug ang laing kauban migamit sa speed boat aron mangitag kaagian paingon sa isla. Kusog kaayo ang ulan, ug basa kaayo mi! Duha ka oras ming nangitag kaagian.

Sa among pag-abot, ang nahinganghang mga molupyo miingon nga dili tukma ang akong mga tsart nga gigamit sa paglawig ug bisan gani ang coast guard o ang navy dili mosulod didto. Ang konsehal wala mohatag kanamog permiso sa pagsangyaw apan mitugot niadtong adunay mga paryente sa isla sa pagduaw ug pagsangyaw kanila. Gitahod namo ang desisyon sa konsehal ug giduaw lamang ang mga paryente. Dihay usa ka lalaki nga midawat sa librong Unsay Tinuod nga Gitudlo sa Bibliya?⁠a Iya dayon kining gibasa ug gisulat sa likod sa iyang Bibliya ang iyang mga pangutana. Kining tawhana nakontak sa ulahi sa dihang siya miadto sa Thursday Island.

Enero 2009: Mibalik kami sa isla sa Moa ug Mabuiag aron duawon kadtong nagpakitag interes sa mensahe sa Bibliya. Kami giabiabi pag-ayo sa mga tawo niining duha ka isla. Daghang molupyo sa baryo sa St. Paul sa Moa Island ang mihangyo kanamo nga balikan dayon sila. Ang konsehal miingon nga kami mahimong mosangyaw sa ilang baryo bisan kanus-a namo gusto.

Adunay 17 ka gipuy-ang isla sa Torres Strait. Wala mi masayod kon maduaw ba namo ang tanan nga nagpuyo niini. Apan kaming tanan nga mga Saksi ni Jehova dinhi sa kinalay-ang mga isla sa amihanang Australia malipayong naghimo sa among maarangan sa paghimaya sa gamhanang Maglalalang, si Jehova.

[Footnote]

[Mapa sa panid 23]

(Alang sa aktuwal nga pagkahan-ay, tan-awa ang publikasyon)

AUSTRALIA

Weipa

Bamaga

TORRES STRAIT ISLANDS

PAPUA NEW GUINEA

[Credit Line]

Based on NASA/Visible Earth imagery

[Mapa sa panid 24, 25]

Bamaga

Thursday Island

Moa Island

Warraber Island

Poruma Island

Mabuiag Island

Saibai Island

Dauan Island

Boigu Island

PAPUA NEW GUINEA

[Credit Line]

Based on NASA/Visible Earth imagery

[Hulagway sa panid 24]

Pagdunggo sa Thursday Island

[Hulagway sa panid 24]

Nagbaktas aron duawon ang mga tawo sa Saibai Island

[Hulagway sa panid 25]

Pagsangyaw sa maayong balita diha sa pinulongang Tok Pisin