Mga Magbabasa Nangutana . . .

Ang Diyos ba May Gipalabing Rasa?

▪ Wala. Ang Bibliya tin-awng nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Maylabot niini, mas ugdang ang panglantaw sa Diyos kay sa dili-hingpit nga mga tawo. Daghan ang nagtuo nga ang usa ka rasa (kasagaran ang ilaha) labaw kay sa uban. Ang maong pagpihig nagpabanaag sa panglantaw ni Charles Darwin, kinsa misulat: “Sa umaabot, . . . pukanon ug pulihan gayod sa sibilisadong rasa sa tawo ang kadaghanang luog nga mga rasa.” Ikasubo nga daghan nang gilupigan sa ubang mga rasa kinsa naglantaw sa ilang kaugalingon nga labaw kay sa uban.

Makataronganon bang mobati nga mas labaw ang atong rasa? Pananglitan, napamatud-an ba sa siyensiya nga ang genes sa ubang rasa mas labaw kay sa uban? Sa kasukwahi, ang geneticist ug propesor sa Oxford nga si Bryan Sykes miingon: “Walay makita sa genes nga basehanan aron estriktong ikaklasipikar ang usa ka grupo o kaliwat. . . . Kanunay kong pangutan-on kon duna bay DNA nga Grego o Italyanong gene, pero siyempre, wala gayod. . . . Kita magkaamgid ra kaayo.”

Ang maong konklusyon kaharmonya sa atong mabasa sa Kasulatan. Gitudlo sa Bibliya nga gilalang sa Diyos ang usa lamang ka lalaki ug babaye, nga maoy gigikanan sa tanang tawo. (Genesis 3:20; Buhat 17:26) Nan sa mata sa Diyos, pareho ra ang tanang rasa sa tawo.

Dili hinungdanon alang kang Jehova ang kolor sa panit ug dagway sa tawo. Hinunoa, adunay mas labaw Niyang gipabilhan—ang atong mahulagwayong kasingkasing, ang atong pagkatawo. Siya miingon: “Ang mga tawo maghukom sa uban kon unsay ilang makita kanila, apan ako maghukom sa mga tawo kon unsay anaa sa ilang kasingkasing.” (1 Samuel 16:7, Contemporary English Version) Kini makapadasig gayod kanato. Sa unsang paagi?

Bisan unsay atong rasa, daghan kanato ang dili kontento sa ubang mga bahin sa atong pisikal nga panagway, apan wala kaayo tay mahimo niini. Apan, atong mapauswag kon unsa ang mas hinungdanon—ang mga pangandoy ug pagbati sa atong kasingkasing. (Colosas 3:9-11) Kon matinud-anon ta sa atong kaugalingon, tingali atong maamgohan nga usahay bation nato nga kita labaw, o ubos sa ubang rasa. Sanglit kini dili man kaharmonya sa panghunahuna sa Diyos, kinahanglang maningkamot ta nga wagtangon ni gikan sa atong kasingkasing.—Salmo 139:23, 24.

Kon lantawon nato ang atong kaugalingon ug ang uban ingon sa panglantaw ni Jehova, makaseguro ta sa iyang tabang. Ang iyang pulong nagpahinumdom kanato: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Tinuod kini bisan unsa man ang atong rasa.