5 Dawaton sa Diyos ang Tanang Sinserong Pagsimba—Tinuod ba Kana?

Ang imo tingaling nadunggan: “Maingon nga daghang dalan ang motultol sa samang destinasyon, daghan usab ang dalang motultol sa Diyos. Ang matag usa kinahanglang mangita sa iyang dalan paingon sa Diyos.”

Ang gitudlo sa Bibliya: Kinahanglang sinsero kita sa atong pagsimba ug dili magpakaaron-ingnon. Gisultian ni Jesus ang mga lider sa relihiyon sa iyang adlaw kon nganong gisalikway sila sa Diyos: “Si Isaias haom nga nagtagna bahin kaninyo nga mga salingkapaw, ingon sa nahisulat, ‘Kining mga tawhana nagpasidungog kanako pinaagi sa ilang mga ngabil, apan ang ilang mga kasingkasing halayo kaayo kanako.’” (Marcos 7:6) Bisan pa niana, ang pagkasinsero lamang dili garantiya nga dawaton sa Diyos ang atong pagsimba.

Gipakita kini ni Jesus pinaagi sa pagyagyag sa pangunang sayop sa pagsimba sa maong mga lider sa relihiyon ug sa ilang mga sumusunod. Iyang gipadapat kanila ang giingon sa Diyos: “Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.” (Marcos 7:7) Ang ilang pagsimba “kawang,” o walay pulos, kay ilang giuna ang tradisyon inay ang sukdanan sa Diyos.

Inay uyonan ang ideya nga dunay daghang dalawatong paagi sa pagduol sa Diyos, ang Bibliya nagtudlo nga dunay usa lamang ka paagi. Ang Mateo 7:13, 14 nag-ingon: “Sulod kamo agi sa sigpit nga ganghaan; tungod kay halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.”

Kon sa unsang paagi ang pagkahibalo sa kamatuoran makatabang nimo: Unsa kahay imong bation kon human sa daghang bulan nga pagbansay alang sa lumba sa dagan, ikaw ang unang nakaabot sa dag-anan apan wala ka makadawat sa ganti kay may nalapas kang balaod nga wala nimo mahibaloi? Bation tingali nimo nga kawang lang ang imong kahago. Mahitabo kaha kini sa atong pagsimba sa Diyos?

Sa pagtandi sa atong pagsimba sa usa ka kompetisyon sa esports, si apostol Pablo miingon: “Kon ang usa makigsangka bisan diha sa mga dula, dili siya mapurongpurongan gawas kon siya makigsangka subay sa mga lagda.” (2 Timoteo 2:5) Atong maangkon ang pabor sa Diyos pinaagi sa pagsimba kaniya “subay sa mga lagda,” nga mao, sa paagi nga iyang giuyonan. Dili kita makapili sa atong kaugalingong dalan paingon sa Diyos. Sa susama, ang usa ka maglulumba dili makadagan bisag asa ug unya magdahom nga maoy modaog sa lumba.

Aron pahimut-an ang Diyos, kinahanglan nga ang atong pagsimba walay sagol nga kabakakan bahin niya. Si Jesus miingon: “Ang matuod nga mga magsisimba magasimba sa Amahan uban sa espiritu ug sa kamatuoran.” (Juan 4:23) Atong makat-onan ang tinuod nga dalan paingon sa Diyos gikan sa iyang Pulong, ang Bibliya.—Juan 17:17.a

[Footnote]

[Blurb sa panid 8]

Ang tanan bang relihiyon nagtudlo sa mga tawo sa pagsimba sa Diyos sa paagi nga iyang giuyonan?