“Imposible!”—Unsay Kahulogan Niini?

ANG Titanic, nga milawig sa unang higayon niadtong 1912, mao ang kinadak-an ug labing maluho nga barko niadtong panahona. Kay maayo ang pagkadisenyo niini, ang barko giisip nga “dili-malunod.” Aw, nahibalo na ta sa nahitabo. Sa unang biyahe niini, kini nabangga sa iceberg sa North Atlantic ug nalunod, uban ang mga 1,500 sa mga pasahero niini. Ang barko nga gikaingong imposibleng malunod nahanaw sa pipila lang ka oras.

Ang pulong nga “imposible” daghag kahulogan. Makaingon kita nga ang usa ka butang imposible sa diwa nga dili nato kana masagubang, mapalampos, o masabtan. Daghan sa kalamposan karon sa teknolohiya ang giisip kaniadto nga imposible kay niadtong panahona, wala pay katakos ang tawo sa paghimo niana o wala gani nila kana mahunahunai. Ang pagpadalag mga tawo sa bulan, pagpadalag sakyanan sa Mars ug kontrolahon kana gikan sa Yuta, pag-ila sa tanang bahin sa genetic code sa tawo, ug ang pagkakita diha sa balita sa mga panghitabo sa laing lungsod o nasod—maoy mga realidad karon nga lagmit giisip nga imposible mga 50 ka tuig kanhi. Kining ideyaha maayong pagkapahayag sa kanhing presidente sa United States nga si Ronald Reagan sa iyang pakigpulong sa usa ka grupo sa inilang mga siyentipiko: “Kamo, nga maoy nanguna sa teknolohiya, nakahimo na karon sa mga butang nga daw imposible kaniadto.”

Tungod sa daghang makapahingangha nga kaugmaran, si Propesor John Brobeck miingon: “Ang usa ka siyentipiko dili na makaingon nga imposible ang usa ka butang. Mahimo lang siyang moingon nga kini kaduhaduhaan. Apan makaingon siya nga ang usa ka butang imposibleng ipatin-aw base sa atong nahibaloan karon.” Kon dunay daw imposible kanato, ang propesor nagpadayon sa pag-ingon, “kinahanglang tagdon usab nato ang tuboran sa enerhiya nga wala nato mahibaloi pinaagi sa biolohikal ug pisyolohikal nga siyensiya. Sa Kasulatan kini nga tuboran sa enerhiya nailhan ingong gahom sa Diyos.”

Ang Tanang Butang Posible sa Diyos

Dugay na kanhi sa wala pa ang maong obserbasyon ni Propesor Brobeck, si Jesus sa Nasaret, nga gihubit ingong labing bantogang tawo nga nabuhi sukad, miingon: “Ang mga butang nga imposible sa tawo maoy posible sa Diyos.” (Lucas 18:27) Ang balaang espiritu sa Diyos mao ang labing gamhanang puwersa sa uniberso. Kini dili masukod pinaagig teknolohiya. Pinaagi sa balaang espiritu, mahimo nato ang mga butang nga dili nato mahimo sa kaugalingong kusog.

Ingong mga tawo, sagad makasinati tag mga kahimtang nga morag imposibleng sagubangon. Pananglitan, tingali namatyan tag minahal o ang atong pamilyahanong kinabuhi nahimong tensiyonado kaayo nga mobati tang dili na nato kini maagwanta. Tingali nawad-an na tag paglaom. Ug para nato wala na tay mahimo. Unsay atong buhaton?

Ang Bibliya nag-ingon nga ang usa nga nagtuo sa Labing Gamhanan o nag-ampo alang sa Iyang balaang espiritu samtang naningkamot sa pagpahimuot Kaniya makadawat ug tabang sa pagbuntog sa daw imposibleng sulbaron nga mga problema. Matikdi ang pasalig ni Jesus: “Sa pagkatinuod ako magaingon kaninyo nga si bisan kinsa nga mosulti niining bukira, ‘Maalsa ka ug matambog ngadto sa dagat,’ ug dili magduhaduha diha sa iyang kasingkasing kondili may pagtuo nga mahitabo ang iyang gisulti, kana mahitabo kaniya.” (Marcos 11:23) Walay kahimtang nga dili maantos o masagubang kon atong tugotan ang gahom sa Pulong sa Diyos ug ang iyang espiritu nga molihok sa atong kinabuhi.

Tagda pananglitan ang usa ka lalaki nga 38 ka tuig nang minyo ug namatyag asawa tungod sa kanser. Nahugno kaayo siya. Gibati niya nga dili na niya maagwanta ang kaguol. Dihay mga higayon nga gusto na niyang mamatay inay mabuhi nga wala ang iyang asawa. Siya miingon nga iyang gibati nga daw naglakaw siya sa “walog sa mabagang kangiob.” (Salmo 23:4) Sa paghinumdom, siya nagtuo nga tungod sa pagpahayag niya sa iyang kaguol diha sa pag-ampo ug sa pagbasa sa Bibliya adlaw-adlaw, maingon man sa iyang paningkamot sa pagpagiya sa espiritu sa Diyos, siya natabangan sa pagsagubang sa giisip niya kaniadto nga imposible.

Ang kaminyoon sa usa ka magtiayon halos mabungkag na. Ang bana pintas kaayo ug bisyoso. Morag dili na ni maantos sa iyang asawa. Misulay siya paghikog. Apan ang bana misugod pagtuon ug Bibliya uban sa mga Saksi ni Jehova. Ang iyang nakat-onan nakatabang niya sa pagbiya sa iyang mga bisyo ug pagkontrolar sa iyang kasuko. Ang asawa natingala sa daw imposibleng mga kausaban.

Ang laing lalaki miingon nga ang iyang kinabuhi miserable kaayo tungod sa iyang pagkaadik sa droga ug pagkaimoral. “Nawad-an kog dignidad,” matod niya. Kinasingkasing siyang miampo sa Diyos: “Ginoo, nasayod ko nga naglungtad ka. Tabangi intawon ko!” Human niana nagtuon siyag Bibliya uban sa mga Saksi ug, ingong resulta, daw dili katuohang nausab ang iyang kinabuhi. “Sagad hasolon ko sa akong tanlag ug mobati kong way-pulos,” matod niya. “Usahay maguol kaayo ko. Bisan pa niana, ang Pulong sa Diyos nakatabang nako sa pagbuntog sa akong pagbati. Sa mga gabiing dili ko makatulog, akong isulti sa akong kaugalingon ang mga teksto nga akong nakat-onan. Nakatabang ni nako sa paghinlo sa akong hunahuna.” Karon, usa na siya ka malipayong bana. Siya ug ang iyang asawa aktibo kaayo sa pagtabang sa uban nga mosalig sa gahom sa Pulong sa Diyos. Sa magul-anon pa siya nga batan-on, tingali giisip niya nga imposibleng matagamtam niya ang iyang kinabuhi karon.

Kini nga mga eksperyensiya nagpakita nga ang Pulong sa Diyos gamhanan gayod ug ang iyang balaang espiritu makahimo sa daw imposibleng mga butang sa atong kinabuhi. Apan moingon ka tingali, “Nagkinahanglan kanag pagtuo!” Tinuod na. Gani, ang Bibliya nag-ingon nga “kon walay pagtuo imposible ang pagpahimuot [sa Diyos].” (Hebreohanon 11:6) Apan tagda kini: Ang usa ka maayong higala, tingali usa ka manedyer sa bangko o usa nga naa sa awtoridad, moingon kanimo: “Ayawg kabalaka. Kon duna kay kinahanglan, duol lang nako.” Sa walay duhaduha, mahupayan gyod ka sa maong pasalig. Apan, ikasubo nga ang mga tawo sagad mapakyas. Tingali mausab ang kahimtang sa imong higala ug imposible na alang niya ang pagtuman sa iyang saad. Kon mamatay siya, dili na gyod siya makatabang nimo. Sa laing bahin, kining mga butanga dili mahitabo sa Diyos. Ang Bibliya nagpasalig nato: “Walay imposibli sa Diyos.”—Lucas 1:37, Biblia sa Kristohanong Katilingban.

“Motuo Ka ba Niini?”

Daghang pamatuod niana ang narekord sa Bibliya. Tagda ang pipila niini.

Ang 90-anyos nga si Sara mikatawa sa dihang giingnan nga manganak siyag anak nga lalaki, apan ang paglungtad sa mga Israelitas maoy pamatuod nga nanganak gyod siya. Ang usa ka lalaki gilamoy sa dakong isda, nakalahutay sa tulo ka adlaw sulod sa tiyan sa isda, ug nakasulat sa iyang kaagi. Siya si Jonas. Si Lucas, usa ka doktor, nga nahibalo sa kalainan tali sa pagkawalay-panimuot ug sa kamatayon, nagsulat kon sa unsang paagi ang batan-ong si Eutiko nahulog gikan sa bentana sa ibabaw nga lawak ug namatay apan gibanhaw. Dili kini sugilambong. Kon susihon pag-ayo kini nga mga asoy, mapamatud-an nga tinuod gayod kini.—Genesis 18:10-14; 21:1, 2; Jonas 1:17; 2:1, 10; Buhat 20:9-12.

Sa iyang higala nga si Marta, si Jesus misulti niining makapahinganghang mga pulong: “Ang matag usa nga buhi ug magpasundayag ug pagtuo kanako dili na gayod mamatay.” Niining daw imposible nga saad, si Jesus midugang niining hinungdanong pangutana: “Motuo ka ba niini?” Kini nga pangutana angay gihapon natong tagdon pag-ayo.—Juan 11:26.

Mabuhi sa Walay Kataposan sa Yuta—Imposible?

Sa usa ka pagtuon, ang mga magsusulat mikomento: “Lagmit duol na ang panahon diin kita mabuhi nag mas taas kay sa karon—posibleng sa walay kataposan.” Ang The New Encyclopædia Britannica nagsaysay nga inay isipon ingong natural nga pagkadaot sa selula o sa ubang mga proseso, ang kamatayon daw gipahinabo sa usa ka wala-mahibaloing hinungdan nga nakadaot o nakapahunong sa pag-obra sa mga proseso sa lawas.a Kini nag-ingon: “Posible nga ang pagkatigulang sa usa gipahinabo sa pagkadaot sa nagkontrolar nga mga mekanismo nga gikinahanglan sa usa ka komplikadong pag-obra.”

Makapainteres ang ilang giingon, apan ang Bibliya naghatag kanatog mas lig-ong rason nga motuo sa kinabuhing walay kataposan kay sa rason nga gitanyag sa siyensiya ug lohika. Ang atong Maglalalang, si Jehova nga Diyos, ang Tuboran sa kinabuhi, nagsaad nga “iyang lamyon gayod ang kamatayon hangtod sa kahangtoran.” (Salmo 36:9; Isaias 25:8) Motuo ka ba niini? Ang nagsaad niini mao si Jehova, ug imposible nga siya mamakak.—Tito 1:2.

[Footnote]

[Blurb sa panid 27]

‘Nahimo na karon ang mga butang nga daw imposible kaniadto.’—RONALD REAGAN

[Blurb sa panid 28]

Kon daw imposibleng masagubang ang kinabuhi, kang kinsa ka modangop?

[Picture Credit Line sa panid 27]

NASA photo