“Sa Diyos ang Tanang Butang Posible”
1 Ang pangunang buluhaton sa Kristohanong kongregasyon mao ang pagsangyaw sa mensahe sa Gingharian sa tibuok kalibotan. (Mat. 24:14) Kana maoy dako kaayong buluhaton. Alang sa daghang maniniid, mopatim-aw nga kini nagkinahanglag mga kahinguhaan nga labaw pa kay sa atong nabatonan. Alang sa uban, ang pagtuman niini nga asaynment halos dili mahanduraw tungod kay kita nailalom sa pagbiaybiay, pagsupak, ug paglutos. (Mat. 24:9; 2 Tim. 3:12) Ang mga maduhaduhaon kombinsido nga kining buluhatona maoy butang nga imposibleng molampos. Apan, si Jesus miingon: “Sa Diyos ang tanang butang posible.”—Mat. 19:26.
2 Positibong mga Panig-ingnan Aron Sundogon: Gisugdan ni Jesus ang iyang ministeryo ingong usa ka tawo batok sa tibuok kalibotan. Sa paningkamot nga pugngan siya nga molampos, ang mga magsusupak mipaagom kaniya sa tanang mahanduraw nga kaulawan, nga sa kataposan mipahamtang kaniya sa masakit nga kamatayon. Bisan pa niana, sa kataposan, si Jesus masaligong mipahayag: “Gidaog ko na ang kalibotan.” (Juan 16:33) Pagkatalagsaon gayod nga kalamposan!
3 Gipasundayag sa mga tinun-an ni Jesus ang samang maisogong espiritu ug kasibot diha sa Kristohanong ministeryo. Daghan ang gilatigo, gibunalan, gibalhog ngadto sa bilanggoan, ug gipatay pa gani. Bisan pa niana, sila “nagmaya tungod kay giisip sila nga takos pakaulawan tungod sa iyang ngalan.” (Buh. 5:41) Bisan pa sa kalisdanan, ilang napalampos ang daw imposibleng buluhaton sa pagsangyaw sa maayong balita “hangtod sa kinalay-ang dapit sa yuta.”—Buh. 1:8; Col. 1:23.
4 Kon Unsaon nga Molampos sa Atong Adlaw: Gibuhat usab nato nga masiboton ang buluhatong pagsangyaw sa Gingharian bisan pa sa daw di-maantos nga mga kalisdanan. Bisan pa sa mga pagdili, paglutos, pagbilanggo, ug ubang mapintas nga mga pagsulay sa pagpahunong kanato, kita nagmalamposon. Sa unsang paagi kini posible? “‘Dili pinaagi sa kasundalohan, ni pinaagi sa gahom, kondili pinaagi sa akong espiritu,’ miingon si Jehova sa mga panon.” (Zac. 4:6) Pinaagi sa pagpaluyo ni Jehova kanato, walay makapahunong sa atong buluhaton!—Roma 8:31.
5 Sa dihang kita mosangyaw, walay katarongan nga kita maulaw o mahadlok o mobati nga di-takos. (2 Cor. 2:16, 17) Nabatonan nato ang kinalabwang mga katarongan sa pagpadayon sa pagpakaylap sa maayong balita sa Gingharian. Uban sa tabang ni Jehova, atong mapalampos ang “imposible”!—Luc. 18:27.