TUBAG SA MGA PANGUTANA BAHIN SA BIBLIYA

Sa unsang paagi magmalipayon ang kaminyoon?

Mapuslanon ang tambag sa Bibliya bahin sa pagbaton ug malipayong kaminyoon kay kini naggikan sa Tagmugna sa kaminyoon, si Jehova nga Diyos. Kini motabang nato nga maugmad ang mga hiyas nga makapalipay sa kaminyoon ug nagpasidaan bahin sa mga tinamdan nga makadaot niini. Kini nagtudlo usab kon unsaon pagpauswag ang katakos sa pagpakigkomunikar nga makadugang sa kalipay sa kaminyoon.​—Basaha ang Colosas 3:8-10, 12-14.

Ang mga bana ug asawa kinahanglang magpasidungog ug magtahod sa usag usa. Kon ilang ipadapat ang papel nga gihatag sa Diyos kanila diha sa kaminyoon, sila magmalipayon.​—Basaha ang Colosas 3:18, 19.

Unsay makapatunhay sa kaminyoon?

Kon ang magtiayon naghigugmaay, motunhay ang ilang panag-ubanay. Gitudloan kita sa Diyos kon unsaon pagpakitag gugma. Siya ug ang iyang Anak, si Jesus, maoy hingpit nga mga panig-ingnan sa masakripisyohong gugma.​—Basaha ang 1 Juan 4:7, 8, 19.

Kon tahoron sa bana ug asawa ang kaminyoon ingong kahikayan sa Diyos, dili gayod sila magbulag. Gimugna sa Diyos ang kaminyoon ingong permanenteng panag-ubanay sa lalaki ug babaye aron mapanalipdan ang mga pamilya. Mahimong motunhay ang kaminyoon kay gihatagan sa Diyos ang lalaki ug babaye ug katakos sa pagpaluyo sa usag usa, sa pisikal ug emosyonal nga paagi. Gilalang usab niya sila sumala sa iyang larawan, uban ang katakos sa pagsundog sa iyang gugma.​—Basaha ang Genesis 1:27; 2:18, 24.