TUBAG SA MGA PANGUTANA BAHIN SA BIBLIYA
May paglaom ba ang mga patay?
Ang kamatayon samag pagkatulog sa diwa nga ang mga patay walay nahibaloan ug dili makabuhat ug bisan unsa. Apan, ang Maglalalang sa kinabuhi makabalik sa kinabuhi sa patay pinaagi sa pagkabanhaw. Ingong pamatuod niana, gihatagan sa Diyos si Jesus ug gahom sa pagbanhaw sa pipila ka patay.—Basaha ang Ecclesiastes 9:5; Juan 11:11, 43, 44.
Sa unsang diwa nga ang kamatayon samag pagkatulog?
Ang Diyos nagsaad nga ang mga patay nga anaa sa iyang panumdoman mabanhaw unya sa usa ka matarong nga bag-ong kalibotan. Sila magpabilin una sa lubnganan hangtod nga ang Diyos magbanhaw kanila. Ang Labing Gamhanang Diyos nangandoy sa paggamit sa iyang gahom aron banhawon ang mga patay.—Basaha ang Job 14:14, 15.
Sama sa unsa unya ang pagkabanhaw?
Sa dihang ang Diyos magbanhaw sa mga patay, sila makaila sa ilang kaugalingon, sa ilang mga higala, ug sa ilang pamilya. Bisag nadugta na ang lawas sa usa ka tawo, ang Diyos makabanhaw sa mao gihapong tawo uban sa bag-ong lawas.—Basaha ang 1 Corinto 15:35, 38.
Diyutay lang ang pagabanhawon aron mopuyo sa langit. (Pinadayag 20:6) Kadaghanan sa mga binanhaw mopuyo sa napasig-uling paraiso sa yuta. Sila hatagag kahigayonan nga magsugod ug bag-ong kinabuhi uban ang paglaom nga mabuhi sa walay kataposan.—Basaha ang Salmo 37:29; Buhat 24:15.