Pamilyahanong Pagsimba—Puwede ba Nimo Kining Himoong Mas Makalingaw?

“Ganahan kaayo ming maghisgot panahon sa among pamilyahanong pagsimba nga sagad maabtan mig tungang gabii kon dili nako pugngan ang akong pamilya,” matod sa usa ka amahan sa Brazil. Ang usa ka amahan sa Japan miingon nga ang iyang 10 anyos nga anak nga lalaki daw dili makamatikod sa oras ug gusto pang magpadayon. Ngano? “Ganahan kaayo siya, ug nakadugang kana sa iyang kalipay,” matod sa amahan.

Siyempre, dili tanang anak ang ganahan sa pamilyahanong pagsimba, ug ang uban laayon pa gani niini. Ngano? Ang usa ka amahan sa Togo miingon base sa iyang kasinatian, “Ang pagsimba kang Jehova dili angayng makalaay.” Kon kini makalaay, tungod kaha kini sa paagi sa pagdumala sa pamilyahanong pagsimba? Nakita sa daghang pamilya nga ang pamilyahanong pagsimba mahimong tinubdan sa “tumang kalipay,” sama sa giingon ni Isaias bahin sa Igpapahulay.​—Isa. 58:13, 14.

Naamgohan sa Kristohanong mga amahan nga aron mahimong makalingaw ang pamilyahanong pagsimba, dili kini angayng sobra ka pormal. Si Ralf, nga may tulo ka anak nga babaye ug usa ka anak nga lalaki, miingon nga sa ilang pamilyahanong pagsimba mora lang silag nag-estoryahanay imbes pormal nga nagtuon; ang tanan nakigbahin. Tinuod, hagit usahay kon sa unsang paagi magpabilin ang interes sa tanan diha sa materyal nga gitun-an. Ang usa ka inahan miangkon: “Usahay bisag gusto nakong himoong makalingaw ang among pamilyahanong pagsimba, dili nako kana mahimo.” Unsay puwede nimong himoon?

IPASIBO UG HIMOA SA LAINLAING PAAGI

“Kinahanglan nga mapasiboon kita,” matod sa usa ka amahan sa Germany nga may duha ka anak. Si Natalia, nga may duha ka anak, miingon nga sa ilang pamilya importante kaayo nga lainlain ang paagi sa pagtuon. Gibahin sa daghang pamilya ang panahon sa ilang pamilyahanong pagsimba. “Pinaagi niana, mas bibo ang pagtuon ug makaambit ang tanan,” matod ni Cleiton, amahan nga taga-Brazil nga may duha ka tin-edyer nga anak. Kon bahinon sa mga ginikanan ang panahon sa pamilyahanong pagsimba, ilang mahatagag atensiyon ang panginahanglan sa matag anak, depende sa edad niini. Mahimo usab nga magmapasiboon ang mga ginikanan sa pagpilig materyal ug kon unsaon kini pagtuon.

Unsay gihimo sa ubang pamilya aron mahimong lainlain ang ilang paagi sa pamilyahanong pagsimba? Sugdan kini sa uban pinaagig mga awit kang Jehova. “Kini makaparelaks ug mag-andam sa among hunahuna sa materyal nga among tun-an,” miingon si Juan sa Mexico. Ang iyang pamilya mopilig mga awit nga haom sa ilang tun-an nianang gabhiona.

Daghang pamilya ang magbasag usa ka seksiyon sa Bibliya. Aron mapalahi, ang matag membro sa pamilya iasayn nga maoy mobasa sa isulti sa lainlaing karakter. Ang usa ka amahan sa Japan miangkon nga siya “sa sinugdan nabag-ohan niini nga paagi sa pagbasa.” Pero ang iyang duha ka anak nga lalaki nalipay nga ang ilang ginikanan nalingaw kauban nila. Gidrama-drama pa gani sa ubang pamilya ang mga estorya sa Bibliya. Ang mga bata “sagad makakita ug mga punto sa usa ka asoy sa Bibliya nga wala namo makita ingong ginikanan,” matod ni Roger, usa ka amahan sa South Africa nga may duha ka anak nga lalaki.

Ang lain pang paagi mao ang paghimog usa ka proyekto ingong pamilya, sama sa pagbuhat ug gamayng arka ni Noe o templo ni Solomon. Makalingaw ang pag-research alang niini nga proyekto. Pananglitan, sa Asia gisulayan kini sa singko anyos nga batang babaye uban sa iyang ginikanan ug lola. Diha sa ilang sala, nagtinabangay sila sa paghimog board game nga gibase sa misyonaryong mga panaw ni apostol Pablo. Ang ubang pamilya naghimo usab ug board game nga gibase sa mga asoy sa Exodo. Tungod sa lainlaing paagi sa pagtuon “nahimong mas malipayon ang among pamilyahanong pagsimba ug ang among pamilya mismo,” matod sa 19 anyos nga si Donald sa Togo. May mahunahunaan ka bang proyekto aron mahimong mas makalingaw ang inyong pamilyahanong pagsimba?

IMPORTANTE ANG PAGPANGANDAM

Bisag ang pagpasibo ug ang lainlaing paagi maghimo sa pamilyahanong pagsimba nga makapainteres, kini mahimong mas mapuslanon kon ang tanan mangandam. Usahay laayon ang mga bata, mao nga angayng hunahunaon daan sa mga amahan ang materyal nga gamiton ug andamon kini pag-ayo. Ang usa ka amahan miingon, “Kon makapangandam ko, ang tanan mas makabenepisyo sa among pagtuon.” Pahibaloon daan sa usa ka amahan sa Germany ang iyang pamilya kon unsay ilang tun-an sa sunod nga mga semana. Ang usa ka amahan sa Benin nga may unom ka anak nga nag-edad ug 12 paubos, abanteng maghatag ug mga pangutana bahin sa binase sa Bibliya nga DVD nga ilang tan-awon sa ilang pamilyahanong pagsimba. Oo, pinaagi sa pagpangandam mahimong mas mapuslanon ang atong pamilyahanong pagsimba.

Kon abanteng mahibalo ang pamilya kon unsay hisgotan, maestoryahan nila kana sa tibuok semana. Busa mas mahinam sila. Ug kon ang matag usa dunay asaynment, siya mobating bahin sa pamilyahanong pagsimba.

HIMOA KINING REGULAR

Daghang pamilya ang maglisod sa paghimo sa ilang pamilyahanong pagsimba nga regular.

Ang ubang amahan kinahanglang motrabahog daghang oras aron matagan-an ang ilang pamilya. Pananglitan, usa ka amahan sa Mexico ang mogikan sa balay ug alas sayis sa buntag ug moulig alas otso sa gabii. Dugang pa, kinahanglang ieskedyul usahay sa laing adlaw ang Pamilyahanong Pagsimba tungod sa laing espirituwal nga kalihokan.

Apan kinahanglang determinado kitang himoong regular ang atong pamilyahanong pagsimba. Ang 11 anyos nga si Loïs sa Togo miingon bahin sa determinasyon sa iyang pamilya: “Bisag usahay gabii na mi magsugod tungod sa mga sirkumstansiya nianang adlawa, pirme gyod ming may pamilyahanong pagsimba.” Kanay hinungdan nga gieskedyul sa uban ang ilang pamilyahanong pagsimba sa sayong bahin sa semana. Kon dunay wala damhang panghitabo, maeskedyul pa nila kana sa laing adlaw.

Nganong gitawag kanag “pamilyahanong pagsimba”? Kay kana maoy bahin sa atong pagsimba kang Jehova. Hinaot nga kada semana, ang tanang membro sa imong pamilya maghalad kang Jehova ug “mga toreyong baka,” sa ato pa, magdayeg kang Jehova. (Os. 14:2) Ug hinaot mahimo kanang makapalipayng panahon sa matag usa sa pamilya, “kay ang kalipay ni Jehova mao ang inyong salipdanan.”​—Neh. 8:9, 10.