Panalanginan ang Mahinatagon

SUKAD kaniadto, ang mga halad maoy importanteng bahin sa tinuod nga pagsimba. Ang mga Israelinhon naghalad ug mga hayop, ug ang mga Kristohanon nailhan sa ilang “halad sa pagdayeg.” Pero duna pay ubang halad nga makapahimuot sa Diyos. (Heb. 13:15, 16) Kini nga mga halad moresultag kalipay ug mga panalangin, sama sa ipakita sa mosunod nga mga pananglitan.

Ang matinumanong alagad kaniadto nga si Ana nangandoy nga makabatog anak nga lalaki, pero baog siya. Sa iyang pag-ampo, nanaad siya kang Jehova nga kon makabaton siyag anak nga lalaki, “ihatag [niya kini] kang Jehova sa tanang adlaw sa iyang kinabuhi.” (1 Sam. 1:10, 11) Wala madugay, si Ana namabdos ug nanganak, ug ginganlan niya kinig Samuel. Dihang nalutas si Samuel, gidala siya ni Ana sa tabernakulo, sama sa iyang gisaad. Si Jehova nagpanalangin kang Ana tungod sa pagsakripisyo niini. Si Ana nakabatog lima pa ka anak, ug si Samuel nahimong propeta ug magsusulat sa Bibliya.—1 Sam. 2:21.

Sama ni Ana ug Samuel, ang mga Kristohanon karon dunay pribilehiyo nga gamiton ang ilang kinabuhi sa pag-alagad sa ilang Maglalalang. Si Jesus nagsaad nga dagayang panalanginan ang bisan unsang sakripisyo nga atong himoon sa pagsimba kang Jehova.—Mar. 10:28-30.

Sa unang siglo, ang Kristohanong si Dorcas ilado sa iyang “maayong mga buhat ug mga gasa sa kaluoy”—mga sakripisyo nga iyang gihimo para sa uban. Ikasubo, “siya nasakit ug namatay,” nga nakapaguol sa kongregasyon. Dihang nadunggan sa mga tinun-an nga si Pedro anaa sa maong lugar, gihangyo nila siya sa pag-adto. Hunahunaa ang ilang kalipay dihang si Pedro miabot ug gibuhi pag-usab si Dorcas—ang unang rekord sa pagkabanhaw nga gihimo sa usa ka apostoles! (Buh. 9:36-41) Wala kalimti sa Diyos ang mga sakripisyo ni Dorcas. (Heb. 6:10) Ang asoy sa iyang pagkamahinatagon napreserbar diha sa Pulong sa Diyos ingong maayong sulondan kanato.

Sa susama, si apostol Pablo nagpakitag maayong ehemplo sa paghatag sa iyang panahon ug pagtagad. Sa iyang sulat sa mga Kristohanon sa Corinto, siya miingon: “Alang kanako ikalipay ko gayod nga magagasto ug bug-os nga pagagastohon alang sa inyong mga kalag.” (2 Cor. 12:15) Nakat-onan ni Pablo sa iyang eksperyensiya nga ang pagsakripisyo para sa uban moresulta dili lang sa kaugalingong kaayohan, kondili labaw sa tanan, sa panalangin ug pag-uyon ni Jehova.—Buh. 20:24, 35.

Klaro, malipay si Jehova dihang gamiton nato ang atong panahon ug kusog sa pagpauswag sa buluhaton sa Gingharian ug sa pagtabang sa atong mga igsoon. Pero duna pa bay laing mga paagi nga masuportahan nato ang buluhatong pagsangyaw? Oo! Gawas sa atong panahon ug kusog, mapasidunggan nato ang Diyos pinaagi sa atong boluntaryong mga donasyon. Kini gigamit sa pagpauswag sa tibuok kalibotang pagsangyaw ug sa pagsuportar sa mga misyonaryo ug ubang special full-time servant. Dugang pa, gisuportahan sa atong boluntaryong mga donasyon ang pag-andam ug paghubad sa literatura ug mga video, paghatag ug hinabang panahon sa katalagman, ug ang pagpanukod ug mga Kingdom Hall. Makaseguro ta nga panalanginan ang mahinatagon. Dugang pa, mapasidunggan nato si Jehova dihang atong ihatag kaniya ang atong bililhong mga butang.—Prov. 3:9; 22:9.

Kon Sa Unsang Paagi Ang Uban Midonar Alang Sa Tibuok Kalibotang Buluhaton

Sama sa panahon ni apostol Pablo, daghan karon ang ‘naggahin,’ o nagbadyet, ug salapi aron ihulog sa contribution box sa kongregasyon nga gimarkahag “Worldwide Work.” (1 Cor. 16:2) Matag bulan, ang mga kongregasyon magpadala niini nga salapi ngadto sa sangang buhatan sa mga Saksi ni Jehova diin sila sakop. Puwede sab kang direkta nga magpadala ug mga donasyon sa legal nga korporasyon nga gigamit sa mga Saksi ni Jehova sa nasod diin ka nagpuyo. Aron mahibalo sa pangunang korporasyon nga gigamit sa mga Saksi ni Jehova sa nasod diin ka nagpuyo, palihog kontaka ang sangang buhatan. Ang adres makita sa www.jw.org/ceb. Depende sa inyong lugar, kini ang matang sa mga donasyon nga direkta nimong ikapadala:

OUTRIGHT DONATIONS

Mga donasyon nga gihimo pinaagig bank transfer, debit card, o credit card. Sa pipila ka sangang buhatan, posible usab kining himoon diha sa jw.org o sa ubang haom nga website.
Mga donasyon nga salapi, alahas, o ubang mahalong butang. Ilakip ang sulat nga nag-ingong kini maoy outright donation, o donasyon nga walay kondisyones.

CONDITIONAL DONATION ARRANGEMENT

Mga donasyong salapi nga mahimong ibalik kon gikinahanglan sa nagdonar.
Ilakip ang usa ka sulat nga nag-ingong ang donasyon maoy kondisyonal.

CHARITABLE PLANNING

Gawas sa mga gasa nga salapi ug ubang mahalong butang, aduna pay laing mga paagi sa paghatag aron makatabang sa buluhaton sa Gingharian sa tibuok kalibotan. Kini gihisgotan dinhi. Bisag unsa pang paagi sa pagdonar ang gusto nimong pilion, palihog kontaka una ang inyong sangang buhatan aron masayran kon unsa nga mga paagi ang puwede sa inyong nasod. Kay lainlain man ang legal nga mga kinahanglanon ug balaod bahin sa buhis, importante nga mokonsultag abogado ug tax adviser sa dili pa mopilig kinamaayohang paagi sa pagdonar.

Insurance and Retirement Plans: Donasyon diin ang korporasyon nga gigamit sa mga Saksi ni Jehova ang gihimong benepisyaryo sa usa ka life insurance policy, indibiduwal nga mga pondo sa pagretiro, o retirement/pension plan.

Bank Accounts: Mga deposito sa bangko nga gihimong payable on death ngadto sa korporasyon nga gigamit sa mga Saksi ni Jehova, depende sa mga requirement sa lokal nga bangko.

Stocks and Bonds: Mga stock ug bond nga direktang gidonar ngadto sa korporasyon nga gigamit sa mga Saksi ni Jehova, o kaha pinaagig transfer on death nga kasabotan.

Real Estate: Mabaligya nga balay ug yuta nga direktang gidonar ngadto sa korporasyon nga gigamit sa mga Saksi ni Jehova. O kon kini gipuy-an pa, puwedeng maghimog kasabotan nga makapuyo niini ang nagdonar samtang siya buhi pa.

Wills and Trusts: Propidad o salapi nga mahimong ipapanunod ngadto sa korporasyon nga gigamit sa mga Saksi ni Jehova pinaagig legal nga testamento, o pinaagi sa paghimo sa korporasyon ingong benepisyaryo sa usa ka trust agreement. Dunay bentaha kini nga kasabotan kay mahimong makunhoran ang bayranan sa buhis.

Ang terminong “charitable planning” nagpasabot nga kinahanglang abanteng magplano ang modonar. Para matabangan kadtong gustong mosuportar sa tibuok kalibotang buluhaton sa mga Saksi ni Jehova pinaagig charitable planning, gihimo ang brosyur nga Charitable Planning to Benefit Kingdom Service Worldwide diha sa Iningles ug Kinatsila. Ang brosyur naghatag ug impormasyon bahin sa lainlaing paagi sa paghatag ug donasyon, ihatag man kini karon o inigkamatay sa nagdonar. Lagmit dili tanang impormasyon sa brosyur ang puwede sa imong kahimtang tungod sa mga balaod bahin sa buhis o uban pang balaod sa nasod diin ka nagpuyo. Pinaagi niini nga mga paagi sa pagdonar, daghan ang nakasuportar sa atong tibuok kalibotang buluhaton ug dako ang nakunhod sa ilang buluhisan. Kon mabatonan kini nga brosyur sa nasod diin ka nagpuyo, pangayog kopya sa sekretaryo sa inyong kongregasyon.

Para sa dugang impormasyon, i-click ang link, “Paghatag ug Donasyon Para sa Among Buluhaton sa Tibuok Kalibotan,” sa ubos sa bisan unsang page sa jw.org/ceb, o kontaka ang sangang buhatan.