Mga Tagna nga Natuman

Sa unang artikulo, gihisgotan nato ang estorya bahin kang Croesus nga mituo sa mananag-an sa Delphi, maong napildi siya sa hari sa Persia. Sa laing bahin, ang Bibliya dunay talagsaong tagna bahin sa hari sa Persia nga detalyadong natuman.

Mga 200 ka tuig nga abante​—sa wala pa ipanganak ang hari—​ang Hebreohanong propeta nga si Isaias naghisgot sa ngalang Ciro, ug gihisgotan sab niya kon unsaon pagpildi ni Ciro ang gamhanang siyudad sa Babilonya.

Isaias 44:24, 27, 28: “Kini ang giingon ni Jehova, . . . ‘ang Usa nga nag-ingon sa lawom nga katubigan, “Mahubas ka, ug pamalhon nako ang tanan nimong kasubaan”; ang Usa nga nag-ingon labot kang Ciro, “Siya ang akong magbalantay, ug bug-os niyang himoon ang tanan nakong kabubut-on”; ang Usa nga nag-ingon labot sa Jerusalem, “Siya pagatukoron pag-usab,” ug labot sa templo, “Mapahimutang ang imong pundasyon.”’”

Sumala sa Gregong historyano nga si Herodotus, gipasimang sa kasundalohan ni Ciro ang tubig sa Suba sa Euprates, nga naglibot sa siyudad sa Babilonya. Tungod sa estratehiya ni Ciro, ang iyang kasundalohan nakasulod sa siyudad agi sa nahubas nga suba. Human masakop ang siyudad, gihatagag kagawasan ni Ciro ang mga Hudiyong nabihag sa Babilonya ug gitugotan silang mouli aron tukoron pag-usab ang Jerusalem, nga nagun-ob 70 ka tuig na ang milabay.

Isaias 45:1: “Kini ang giingon ni Jehova sa iyang dinihogan, kang Ciro, kansang tuong kamot akong gigunitan sa pagpukan sa mga nasod sa iyang atubangan, sa pagkuha sa mga hinagiban sa mga hari, sa pagbukas sa duhay palid nga mga pultahan sa iyang atubangan, aron ang mga ganghaan dili masirhan.”

Ang mga Persiano nakasulod sa siyudad agi sa duha ka dagkong pultahan sa paril sa siyudad, nga napasagdang bukas. Kon nasayod lang ang mga Babilonyanhon sa plano ni Ciro, ila gyod untang sirad-an ang tanang ganghaan sa siyudad. Pero sumala sa gitagna, wala gyod mapanalipdan ang siyudad.

Kining talagsaong tagna maoy usa lang sa daghang tagna sa Bibliya nga natuman.a Dili parehas sa prediksiyon sa mga tawo, nga sagad gigiyahan sa ilang bakak nga mga diyos, ang mga tagna sa Bibliya naggikan sa Usa nga miingon: “Sukad sa sinugdan gitagna na nako ang mahitabo, ug sa dugay nang panahon gitagna na nako ang mga butang nga wala pa mahimo.”​—Isaias 46:10.

Ang tinuod nga Diyos, nga ang ngalan mao si Jehova, mao lang ang makahimo niana. Kanang ngalana nagkahulogan nga “Iyang Ipahinabo nga Mahimong.” Kini nagpasabot nga duna siyay katakos sa pagkahibalo ug sa pagmaniobra sa mga panghitabo sa umaabot aron matuman ang iyang kabubut-on. Gipasaligan ta niini nga seguradong matuman ang tanan niyang gisaad.

MGA TAGNA NGA NATUMAN KARON

Gusto ba kang mahibalo kon unsang mga tagna sa Bibliya ang natuman karon? Mga 2,000 ka tuig kanhi, ang Bibliya nagtagna nga “sa kataposang mga adlaw moabot ang kuyaw nga mga panahong lisod sagubangon.” Kataposang mga adlaw kini sa unsa? Dili sa atong planeta o sa tanang tawo, kondili sa panag-away, pagdaogdaog, ug pag-antos nga nasinati sa mga tawo sulod sa libolibo na ka tuig. Atong susihon ang pipila sa mga tagna nga nagpaila sa “kataposang mga adlaw.”

2 Timoteo 3:1-5: “Sa kataposang mga adlaw . . . ang mga tawo unya mahigugmaon sa kaugalingon, mahigugmaon sa kuwarta, hambogiro, mapahitas-on, magsultig daotan batok sa Diyos ug sa isigkatawo, dili masinugtanon sa ginikanan, dili mapasalamaton, dili maunongon, walay pagmahal sa isigkatawo, dili ikasabot, tigbutangbutang, walay pagpugong sa kaugalingon, bayolente, walay gugma sa pagkamaayo, traydor, gahig ulo, garboso kaayo, mahigugmaon sa kalipayan imbes mahigugmaon sa Diyos, diyosnon tan-awon pero dili diyosnon ug binuhatan.”

Mouyon ba ka nga mao nay kinaiya sa kadaghanan karon? Nakita ba nimo nga gipalibotan tag mga tawo nga sobrang nagmahal sa ilang kaugalingon, sa kuwarta, ug garboso kaayo? Namatikdan ba nimo nga daghan ang mas gusto nga silay masunod ug dili maminaw sa uban? Seguradong nakamatikod ka nga daghan ang masinupakon sa ginikanan ug daghan sab ang mas mahigugmaon sa kalipayan imbes sa Diyos. Ug kada adlaw nagkagrabe ang kahimtang.

Mateo 24:6, 7: “Makadungog mog mga gubat sa lainlaing dapit. . . . Ang nasod makiggubat batok sa nasod ug ang gingharian batok sa gingharian.”

Gibanabana sa uban nga ang gidaghanon sa nangamatay sa giyera ug armadong panag-away sukad sa 1914 maoy kapig 100 ka milyon. Hunahunaa ang paghilak, kaguol, ug pag-antos nga resulta niining tanan. Nakakat-on ba ang mga nasod sa ilang sayop ug gihunong ang mga giyera?

Mateo 24:7: “Duna unyay mga kanihit sa pagkaon.”

Ang World Food Programme nag-ingon: “Sa kalibotan nga dunay igong pagkaon para sa tanan, 815 ka milyong tawo​—usa sa siyam ka tawo—​ang matulog kada gabii nga walay kaon. Gani, usa sa tulo ka tawo ang nag-antos sa malnutrisyon.” Gibanabana nga kada tuig mga tulo ka milyong bata ang mamatay tungod sa gutom.

Lucas 21:11: “Duna unyay dagkong linog.”

Kada tuig, mga 50,000 ka linog ang nasinati sa mga tawo. Halos 100 niana ang nakagubag mga bilding, ug usa ka kusog kaayong linog ang mahitabo kada tuig. Sumala sa usa ka banabana, tali sa 1975 ug 2000, ang mga linog nakapatayg 471,000 ka tawo.

Mateo 24:14: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”

Sa tibuok kalibotan, ang mga Saksi ni Jehova, nga kapig walo ka milyon ang gidaghanon, nagsangyaw ug nagpamatuod sa maayong balita sa Gingharian sa Diyos diha sa mga 240 ka nasod. Ilang gisangyaw ang maayong balita diha sa dagkong mga siyudad ug gagmayng baryo, sa kalasangan ug kabukiran. Dihang matapos na kining buluhatona sa gitakdang panahon sa Diyos, ang tagna nag-ingon, “moabot ang kataposan.” Unsay ipasabot ana? Nagpasabot na nga matapos na ang pagmando sa tawo ug magsugod na ang pagmando sa Gingharian sa Diyos. Unsang mga saad ang matuman ubos sa pagmando sa Gingharian sa Diyos? Tubagon kana sa sunod nga mga artikulo.