Tudloi ang mga Ginatun-an kon Unsaon sa Paggamit sa Bibliya
1 “Sa dihang inyong gidawat ang pulong sa Diyos, nga inyong nadungog gikan kanamo, dili ingong pulong sa mga tawo, kondili, sa pagkamatuod gayod, ingong pulong sa Diyos.” (1 Tes. 2:13) Ingong matuod nga mga Kristohanon, kita mabalaka maylabot sa pagtugot sa Bibliya nga mosulti. Busa, sa dihang magdumalag pagtuon sa Bibliya, abagi ang imong estudyante sa pagpabili nga siya nagakat-on sa mga hunahuna ni Jehova, dili ang mga hunahuna sa tawo. Pinaagig pagtudlo sa mga ginatun-an sa maayong paggamit sa Bibliya, imong matukod diha kanila ang pagsalig sa Kasulatan, usa ka lubasang patukoranan alang sa pagtuo, ug ang katakos sa pagpanalipod sa ilang pagtulon-an gikan sa Bibliya.—2 Tim. 3:16; 1 Ped. 3:15.
GAMITA ANG BIBLIYA
2 Gikan sa sinugdan, ipakita sa estudyante ang panid sa Bibliya nga nagtala sa tanang basahon sa Bibliya ug ipakita kaniya ang paagi sa iyang pagkaplag sa matag usa niana. Daghang kasulatang gikutlo diha sa mga basahon sa Sosyedad, ug ang uban gisitar pero wala kutloa. Sa sinugdan, basin makaayong tan-awon ug basahon ang tanan niini gikan sa Bibliya, nga sa ingon nagapasiugda nga kana maoy usa ka pagtuon sa Bibliya. Kini mogugol ug pipila ekstrang panahon, pero moabag kini sa gitun-an sa pagkahimong sinati sa iyang Bibliya. Magpalambo usab kini sa iyang pagsalig nga ang gihisgotan diha sa mga basahon maoy gipasukad-Bibliya.
3 Kon mangutana ang gitun-an, buligi siyang kaplagon ang mga tubag diha sa Bibliya pinaagig pagtan-aw sa tukmang mga teksto. Niining paagiha siya mahibalo nga ang mga tubag sa iyang mga pangutana gikan sa Diyos. (Juan 17:17) Abagi ang estudyante sa pagpangatarongan sa mga kasulatan ug sa bug-os nga pagpabili sa tubag sa Bibliya. Sa kataposan sa pagtuon, hayan gusto mong sublion ang duha o tulo ka yawing teksto pinaagig pagpatan-aw niana sa gitun-an ug ipatin-aw kana diha sa iyang kaugalingong mga pulong. Kini magpaarang kaniya sa pagpanalipod sa iyang pagtuo gikan sa Bibliya.—Buh. 17:1-3.
4 Dasigang estudyante sa pagtan-aw ug pagpangatarongan sa mga sitasyon sa kasulatan samtang siya nagaandam sa leksiyon alang sa iyang personal nga pagtuon, Pagtuon sa Bantayanang Torre, ug ubang mga tigom. Busa, siya maandam sa paggamit ug maayo sa iyang Bibliya sa panahon sa mga tigom ug sa paghatag ug mga komento nga gipasukad sa Kasulatan maylabot sa materyal nga ginatun-an. Usab ipakita kaniya kon unsaon sa pagpangita sa mga teksto bahin sa daghan nagkalainlaing mga ulohan pinaagig indese sa New World Translation. Sa dihang ang mga teksto sa personal ginabasa ug ginatino, ang pagpadulot sa mga kamatuoran nga gitudlo molalom pa gayod.
5 Ang pagtudlo sa mga ginatun-an kon unsaon sa paggamit sa Bibliya adunay maluntarong mga benepisyo. Ang estudyante moila nga ang pagtulon-an nga iyang gidawat nagagikan sa Diyos. Oo, “ang pulong sa Diyos maoy buhi” ug gamhanan. (Heb. 4:12) Buot tang motabang sa uban sa pagkahimong mahanason sa “paggamit sa pulong sa kamatuoran sa hustong paagi.”—2 Tim. 2:15.