Tabangi ang mga Bag-ohan sa Pagkomento sa mga Tigom
1 Pagkamakahinam sa pagkadungog sa usa ka estudyante sa Bibliya nga nagahimo sa iyang unang komento sa Kingdom Hall! Nagalig-on gayod kana nga ang bag-ohan tinuod nga nagatapot sa kamatuoran. Ang mga bag-ohan kinahanglang makaamgo nga ang paghimog katilingbanong pagpahayag gikinahanglan. Kini pamatuod sa pagtuo nga motultol sa kaluwasan.—Roma. 10:10.
2 Si Jesus miingon: “Ang matag usa nga hingpit nga natudloan mahisama sa iyang magtutudlo.” (Luc. 6:40) Kini nagakahulogan nga atong matudloan ang mga bag-ohan sa pagkomento sa mga miting pinaagig pagkomento sa atong kaugalingon. Tudloi sila nga ang pagtuon kinahanglang buhaton uban sa katuyoan nga gamiton ang kahibalo diha sa mga tigom ug sa kanataran maingon man sa pagtultol sa personal nga kinabuhi sa usa.
3 Ang ubang mga bag-ohan magduhaduha, nga nagabating dili sila makahimo sa pagkomento sama ka maayo sa pagkomento sa uban. Apan, ato silang mabuligan sa pagpabili nga ang pagkayano maoy hinungdanon diha sa paghimog maayong mga komento. Kon ang atong mga komento maoy mubo ug laktod sa punto, ang mga bag-ohan dili mobating obligado sa paghimog tag-as nga mga pulong. Sila maabagan sa pag-analisar sa pangutana, kaplagon ang kahulogan diha sa parapo nga nagahatag sa tubag, ug dayon isulti kana sa ilang kaugalingong mga pulong. Tabangi silang makasabot kon sa unsang paagi ilang magamit ang mga teksto nga anaa sa parapo sa pagsuportar sa ilang mga komento. Tudloi sila sa paglinya sa yawing mga pulong ug hayan maghimog mubong mga nota diha sa daplin. Tungod kay naandam na pag-ayo sila dili na mahadlokon kaayo sa pagkomento.
4 Unsa pa man ang atong mahimo sa pagdasig sa mga bag-ohan sa pagkomento? Siyempre, ang paglingkod tupad kanila mahimong makapalig-on ug makapahayahay. Basin gusto mong mosugyot nga adto kamo manglingkod sa unahan nga diyutay ra ang kabaldahan. Ipunting ang mga pangutana nga mahimong tubagon sa pipila ra gayong mga pulong.
5 Sa dihang masinati na ang konduktor sa Pagtuon sa Basahon sa Kongregasyon sa usa nga bag-ohan diha sa iyang grupo, basin hangyoon niya siyang basahon ang usa ka teksto. Human niana, ang lunsayng mga pulong sa pagpabili sa iyang mga panlimbasog mahimong magpalig-on sa maong bag-ohan sa pagpadayon sa pagkomento didto sa pagtuon sa libro ug sa ulahi mosugod sa pagpakig-ambit nga makanunayon didto sa ubang mga miting.
6 Maoy usa ka pribilehiyong moambit sa pagkomento diha sa mga tigom. (Heb. 10:24, 25) Gusto tang buligan ang mga bag-ohan sa pagpabili niini. Diha man sa pag-alagad sa kanataran o sa atong mga tigom sa kongregasyon, kita adunay mga kahigayonan sa pagbuhat niana ingon sa gipahinumdom kanato sa Hebreohanon 13:15: “Pinaagi kaniya tugoting kita kanunayng magatanyag ngadto sa Diyos ug usa ka halad sa pagdayeg, nga mao, ang bunga sa mga ngabil nga nagahimog katilingbanong pagpahayag sa iyang ngalan.”