Paglig-onay sa Usag Usa Pinaagig Pagkomento sa mga Tigom
1 Kita giawhag sa Hebreohanon 10:24 sa ‘pagpasibot sa usag usa sa paghigugma ug sa maayong mga buhat.’ Naglakip kini sa paglig-onay sa usag usa pinaagig paghimog makahuloganong mga komento sa mga tigom sa kongregasyon. Nganong angay kitang mokomento? Unsaon nato paghimo kini? Kinsa ang anaa sa kahimtang nga makabenepisyo?
2 Hunahunaa ang daghang panahon nga ikaw nakabenepisyo sa pagkadungog sa uban nga mihatag ug yano, tin-awng mga pahayag nga nagpalambo sa imong pagsabot ug nagpalig-on kanimo sa espirituwal. Aduna ka ing pribilehiyo sa pagbuhat sa sama alang kanila. Sa dihang ikaw makig-ambit, imong gipasundayag ang imong tinguha nga ‘makahatag ug espirituwal nga gasa’ alang sa pagdasig sa tanang nanambong.—Roma 1:11, 12.
3 Kon Unsaon Paghimog Maayong mga Komento: Ayaw pagkomento ug taas, nga magkobre sa matag punto diha sa parapo. Ang tag-as nga mga komento sagad mapakyas sa pagpunting sa espesipikong tubag ug tingali magpaluya sa uban sa pagpakig-ambit. Ang unang komento sa parapo kinahanglang mubo, deretsong tubag sa pinatik nga pangutana. Kadtong mohatag ug dugang mga komento makahimo dayon ug praktikal nga pagpadapat sa materyal o magpakita kon sa unsang paagi ang mga kasulatan mapadapat. Tan-awa ang Giya sa Tunghaan, mga panid 90-2.
4 Kon ang paghunahuna sa pagkomento makapakulba ug diyutay kanimo, pag-andam ug mubong komento nga abante, ug ingna ang nagdumala sa pagtawag kanimo alang sa maong parapo. Human nga imong mahimo kini sa pipila ka tigom, ang pagpakig-ambit mahimong mas sayon. Hinumdomi nga si Moises ug Jeremias nagpahayag ug kakulang sa pagsalig sa ilang katakos sa pagsulti diha sa publiko. (Ex. 4:10; Jer. 1:6, ptn.) Apan si Jehova nagtabang kanila sa pagsulti alang kaniya, ug siya motabang usab kanimo.
5 Kinsay Makabenepisyo Gikan sa Imong mga Komento? Ikaw mismo makabenepisyo tungod kay ang imong mga komento magpatidlom sa kamatuoran nga mas lig-on diha sa imong hunahuna ug kasingkasing, nga magpasayon pa kanimo sa paghinumdom sa impormasyon sa ulahi. Usab, ang uban makabenepisyo sa pagpatalinghog sa imong makapalig-ong mga pahayag. Kita madasig sa dihang ang tanan, may kasinatian man, batan-on, maulawon, o bag-ohan, maningkamot sa pagpahayag sa ilang pagtuo diha sa mga tigom sa kongregasyon.
6 Kita makaseguro sa pagkaplag nga ‘ang mga pulong nga angay sa panahon, Oh pagkamaayo niana’ sa dihang kini gamiton sa pagpalig-on sa usag usa diha sa mga tigom!—Prov. 15:23.