Ang Tanan Kinahanglang ‘Mosagop sa Pulong nga Kinasingkasing’!
1 Milyonmilyong tawo ang nagatuon sa Bibliya uban sa mga Saksi ni Jehova. Aron mahimong takos alang sa kinabuhing walay kataposan, sila kinahanglang ‘mosagop sa pulong nga kinasingkasing,’ sama sa gihimo sa 3,000 nga naghinulsol ug nabawtismohan sa adlaw sa Pentekostes 33 K.P. (Buh. 2:41) Unsang responsabilidad ang gipahiluna niini kanato karong adlawa?
2 Kita kinahanglang motabang sa atong mga estudyante sa Bibliya nga maugmad ang debosyon kang Jehova. (1 Tim. 4:7-10) Nianang maong tumong, ang pasukip sa Hunyo 1996 nga Atong Ministeryo sa Gingharian, parapo 20, nagsugyot: “Latas sa katibuk-an sa pagtuon, pangitag kahigayonan sa pagtukod ug pagpabili alang sa mga hiyas ni Jehova. Ipadayag ang imong kaugalingong lalom nga mga pagbati alang sa Diyos. Tabangi ang estudyante sa paghunahuna sa paaging maugmad ang mainit, personal nga relasyon uban kang Jehova.”
3 Ang Hagit nga Atong Ginaatubang: Ang kadaghanang tawo, nga impluwensiyado sa bakak nga relihiyon, kontento na sa porma sa pagsimba nga naglangkit ug gamayng panahon ug paningkamot, nga wala manginahanglan ug bisan unsang tinuod nga kausaban sa ilang paagi sa kinabuhi. (2 Tim. 3:5) Ang hagit nga nagaatubang kanato mao ang pagtabang sa atong mga estudyante sa Bibliya sa pagsabot nga ang tinuod nga pagsimba naglangkit ug labaw pa kay sa pagkahimong mga tigpatalinghog lamang sa pulong sa Diyos. Kinahanglang ilang ipadapat sa ilang mga kinabuhi ang ilang nakat-onan. (Sant. 1:22-25) Kon dunay butang bahin sa ilang personal nga panggawi nga dili dalawaton sa Diyos, kinahanglang ilang masabtan ang ilang obligasyon nga ‘motalikod’ ug mobuhat kon unsay husto aron sa pagpahimuot kaniya. (Buh. 3:19) Sa pagbaton ug kinabuhing walay kataposan, sila kinahanglang ‘kusganong manlimbasog sa ilang kaugalingon’ ug lig-ong mobarog dapig sa kamatuoran.—Luc. 13:24, 25.
4 Sa dihang maghisgot sa nagkalainlaing mga bahin sa moralidad, suknaa ang imong estudyante sa Bibliya kon unsa man gayod ang iyang paglantaw niining mga butanga ug kon unsay angay niyang buhaton kon makita niya ang panginahanglan sa paghimog mga kausaban sa iyang kinabuhi. Tultoli ang iyang pagtagad ngadto sa organisasyon nga pinaagi niana siya nagapakakat-on sa kamatuoran, ug dasiga siya sa pagtambong sa mga tigom sa kongregasyon nga makanunayon.—Heb. 10:25.
5 Atong himoon kana nga atong tumong nga abton ang kasingkasing sa estudyante pinaagi sa atong pagpanudlo. Kita magmaya samtang atong dasigon ang mga bag-ohan sa pagsagop sa pulong sa Diyos nga kinasingkasing ug mabawtismohan!—1 Tes. 2:13.