Nahiusa sa Pagbuhat sa Kabubut-on ni Jehova
1 Tungod kay ang Disyembre ato mang bulan sa kombensiyon, kitang tanan nagaplano sa pagpanaw ngadto sa kombensiyon sa sunod pipila ka semana. Apan samtang nagatagad sa atong mga plano sa kombensiyon, dili ta sayloan ang atong hinungdanong buluhatong pagsangyaw sa maong bulan. Among gidasig ang tanan sa paggugol ug daghang panahon kutob sa mahimo nganha sa ministeryo sa kanataran sa mga semana sa dili pa ang kombensiyon, nga dili pasagdan ang atong mga pagtuon sa Bibliya ug buluhatong naandan nga pamalaybalay sulod niining panahona.
2 Alang sa daghang tawo ang Disyembre maoy bulang piyesta opisyal. Ang ilang mga hunahuna gitumong sa mga saulog, ang pagpamalit ug mga gasa, pagduaw sa mga paryente, ubp. Sanglit kay ang gidak-on sa selebrasyon pagpasidungog man kono kang Kristo, makaayo nga ipasiugda ang mga puntos maylabot kang Kristo diha sa atong buluhatong pagsangyaw. Ang impormal nga pagpamatuod mohatag usab ug higayon sa paghisgot sa tinuod nga katuyoan sa pagkatawo ni Jesus, nga nagapunting sa lukat. Sa magngadto-ngari sa mga kombensiyon basin kita may maayong kahigayonan sa pagpakighisgot sa mga tawo sa maong mga puntos.
ANG TANYAG
3 Atong itanyag ang Akong Basahon sa mga Estorya sa Bibliya niining bulana. Apan, ingong kapilian ato usab nga ikatanyag ang librong Mabuhing Walay Kataposan kon gusto. Ang maong duha ka basahon adunay daghang paagi nga dala ang maayong balita. Ang Bahin 6 sa librong Estorya sa Bibliya, sugod sa estorya 84, nagkobre sa yugto gikan sa pagkatawo ni Jesus hangtod sa iyang kamatayon. Dinhi aduna kita ing bahandi sa impormasyon sa mga ulohan nga maylabot sa pagkatawo ni Jesus. Anaa ang mga estorya nga nag-ulohang “Manulunda Miduaw kang Maria,” “Si Jesus Natawo sa Kuwadra,” ug “Mga Lalaking Gigiyahan sa Bituon.” Niini lamang tulo ka estorya ikaw may daghan nang puntos nga magamit sa mga piyesta opisyal sa Pasko. Kini ilabinang tinuod diin adunay mga bata diha sa pamilya.
4 Ang kapitulo 6 sa librong Mabuhing Walay Kataposan nag-ulohang “Si Jesu-Kristo—Gipadala sa Diyos?” Kini magtaganag daghang puntong igsusulti bahin sa antes-tawhanong paglungtad ni Jesus, iyang kinabuhi ibabaw sa yuta, ug ang iya karong papel nga gidumala ingong Magmamando sa Gingharian sa Diyos. Ang paggamit niining mga puntoha magpalambo sa ilang interes sa tukmang impormasyon maylabot sa atong Ginoo niining bulana sa dihang ang ilang mga hunahuna natumong sa pagkatawo ni Jesus.
5 Tungod kay daghan batan-ong mga magmamantala aduna man ing piyesta opisyal sulod sa Disyembre, sila usab makaambit sa bug-os sa buluhaton sa Gingharian uban sa ilang banay niining bulana. Sanglit kay adunay lima ka Sabado ug lima ka Domingo sa Disyembre, hayan daghan ang makaoksilyare payunir bisan pa sa pagtambong sa kombensiyon.
6 Paniguroon gayod sa mga ansiyano sa pag-eskedyol ug igong mga tigom sa dayon na nga pagsangyaw ug usab sa linain manlimbasog sa pagkolekta sa tanang report sa kataposan sa bulan aron ang taho sa kongregasyon mahimong kompleto. Manikaysikay kitang tanan sa hiniusang pagbuhat sa kabubut-on ni Jehova sa Disyembre.