Pagsangyaw Ingong Pamilya Sulod sa Disyembre
1 “Ang imong katawhan magatanyag sa ilang kaugalingon nga mahinangpon sa adlaw sa imong militaryong puwersa.” Kining mga pulonga sa Salmo 110:3 maayong nagahubit sa aktibong organisasyon ni Jehova karon samtang ang mga lalaki, mga babaye, ug mga bata masibotong nagapakig-ambit sa pagmantala sa maayong balita sa Gingharian. Sulod sa bulan sa Disyembre, daghang mga membro sa banay adunay ekselenteng kahigayonan sa pagpalapad sa ilang ‘mahinangpong pag-alagad’ pinaagig pagpauswag sa ilang pakig-ambit diha sa ministeryo sa kanataran. Kon ugaling ‘paliton ta ang tukmang higayon,’ gikinahanglan nato ang paghimog tinong mga plano ug ayohon sa pag-eskedyol ang atong panahon nga abante pa.—Col. 4:5; 1 Cor. 9:26.
2 Nganong dili himoon ang pagsangyaw ingong pamilyahanong proyekto? Duyog kamong molingkod ug tinoon ang mga posibilidad alang sa mauswagong pag-alagad sa kanataran sulod sa Disyembre. Tungod kay ang tanang membro nagaamotay sa ilang mga panaghisgot, kamo hayan mahinganha gayod kon unsa ka maayo ang mahimong malampos.—Prov. 11:14; 15:22.
3 Daghang batan-on ang bug-os makapahimulos sa panahong walay eskuwela aron mosalga diha sa pag-alagad sa kanataran sulod sa panahong piyesta opisyal sa kalibotan. Ang estudyante ba makaduyog sa daghan ubang batan-on kinsa mag-oksilyare payunir sa Disyembre? Hayan makaplagan sa mga inahan nga ang Disyembre nagahatag ug maayong higayon sa paggugol ug dugang panahon sa pag-alagad sa kanataran uban sa ilang mga anak. Posible ba alang kaninyong mga amahan ug mga inahan sa pag-oksilyare payunir uban sa inyong mga anak? O, tungod kay duyog nga nagapaigo ang tanang membro sa banay, makatabang ba kamo ug labing menos usa o tingali dugang mga membro sa pamilya sa pag-oksilyare payunir? Pagkamakapalig-on ug makapahiusa kini alang sa tanan sa inyong banay!
PAGHIMOG TINONG MGA PLANO
4 Human matagad ug maayo ang mga posibilidad sa pagpauswag sa inyong pag-alagad ingong pamilya, gikinahanglan ninyo ang paghimog tinong mga plano ug manikaysikay sa pagsunod niana. Isulat ang mga tumong alang sa matag membro sa pamilya ug ang matag adlaw nga eskedyol sa pag-alagad sa kanataran alang sa matag usa. Tingali kini ikasulat diha sa inyong banaynong teokratikanhong kalendaryo. Hinumdomi, kon dili ninyo ieskedyol kini, ang panahon moabot ug molabay, ug mahimong dili ninyo makab-ot ang inyong tumong.
5 Siyempre, ang magtatan-aw sa pag-alagad sa kongregasyon buot man nga maghimog mga plano karon alang sa espesyal grupong pagsangyaw sulod sa sayong bahin sa bulan. Hinumdomi nga ang ulahing bahin sa Disyembre maoy panahon sa kombensiyon. Mahimong himoon ang mga kahikayan sa pag-alagad sa kanataran sa buntag, palis ug sa gabii.
6 Ang kasinatian nagbutyag nga ang Disyembre maoy ilabinang mabungahong bulan alang sa pagsangyaw sa maayong balita. Sagad, dugang mga tawo ang anaa ra sa balay, ug sila anaa sa mas relaks nga panghunahuna. Kadtong mahiligon sa relihiyon sagad mahinangop sa pagpakighisgot maylabot sa espirituwal nga mga butang. Buot tang mopahimulos sa kinabug-osan niining mga kahimtanga aron sa pagsangyaw sa maayong balita ug sa ingon ‘makatanyag sa atong kaugalingon nga mahinangpon’ ingong usa ka pamilya ‘sa adlaw sa militaryong puwersa ni Jehova.’