Abanteng Pagplano Alang sa Disyembre

¹ Sa dili pa gayod mohimog tikang sa paglampos sa usa ka tumong, gikinahanglan ta sa paghimog mga plano. Pananglitan, basin gusto tang magbakasyon nga maglakip sa pagtambong ug usa ka kombensiyon. Mahimong maglangkit kanag pagplano nga abante aron may kuwartang magamit, pagkuhag abotanan, ug uban pa. Kining tanang mga planoha gikinahanglan kon palamposon man ugaling ang atong tumong.​—Prov. 21:5.

² Sa samang paagi, ang pagplano gikinahanglan kon molampos man ugaling kita diha sa pakig-ambit sa oksilyare nga pagpayunir. Mga tagnapulo ka libo sa atong mga igsoong lalaki ug babaye sa tibuok kalibotan ang misulod niining bahina sa pag-alagad nga regular ug nakaani sa daghan personal nga mga benepisyo. Ang mosunod nga mga sugyot basin makabulig kanimo sa paghimo sa imong mga plano aron makaambit sa buluhatong katabang nga pagpayunir, tingali sayo sa sunod nga bulan.

³ Pilia ang kombeniyenteng yugto nga imong mahikay nga labing dakong panahon ang magugol mo sa pag-alagad sa kanataran aron kab-oton ang 60 oras. Kini mahimong maglakip sa paggamit sa pipila sa panahong bakasyon nga imong nabatonan. Ang mga batan-on sa eskuwelahan makagamit man sa mga panahong bakasyon alang sa katabang nga pagpayunir.

⁴ Ang mga bulan nga adunay lima bug-os nga mga hinapos-semana sagad mohatag ug mabatonang panahon alang sa ministeryo sa kanataran. Matikdi nga niining Disyembreha adunay lima bug-os nga mga hinapos-semana. Makigsulti sa uban nga makaarang sa pagkuyog kanimo ingong mga payunir o mga magmamantala.​—Prov. 20:18.

⁵ Himoa ang mapuslanong eskedyol aron magamit mo ang imong panahon nga mas maalamon. Paghimog mga plano sa paggugol sa dakodakong bahin sa imong panahon diha sa buluhatong pamalaybalay. Tagda ang pagsangyaw sa magabii diin kini posible, ug kooperar sa mga kahikayan sa kongregasyon sa kalihokan sa kanataran sulod sa semana ug sa mga hinapos-semana. Ang imong pagsuportar ug pagsangyaw duyog sa ubang mga igsoong lalaki ug babaye mahimong sa bayloay makapalig-on. Padayong iatubang kang Jehova kining butanga diha sa pag-ampo. (Col. 4:2) Hangyoa ang iyang pagtultol samtang nagaplano ka sa pakig-ambit diha sa buluhatong katabang nga pagpayunir.

⁶ Daghan ang nakatilaw sa bug-os-panahong pag-alagad una ingong mga katabang payunir, ug kini nagpadasig kanila sa pagkahimong mga regular payunir. Ang matag adlaw nagapaduol kanato ngadto sa katumanan sa dagkong mga saad ni Jehova. Pagkadakong panalangin nga maangkon niadtong makaarang sa pagpahimulos sa pipila ka luna sa bug-os-panahong pag-alagad! Pagplano nga abante alang niana, ug hinaot si Jehova magapanalangin sa imong mga panlimbasog.