Pagtukod ug Suod nga mga Relasyon sa Pamilya
1 Tungod sa daghan kaayong panginahanglan sa ilang panahon, ang mga ginikanan nagaatubang sa hagit sa pagtukod sa pamilya nga malig-on diha sa matuod nga pagsimba. Ang Kristohanong mga banay nagakinahanglan ug suod nga bugkos nga magsuportar sulod sa presenteng malisod nga kapanahonan. (Eccl. 4:9-12; 2 Tim. 3:1-5) Samtang ang espirituwalidad maugmad ang pamilya mapalig-on.
PAGTUKOD UG ESPIRITUWAL NGA MGA HIYAS
2 Ang mga tigom sa kongregasyon ug pagtuon sa Bibliya sa pamilya maoy mga hinungdanon diha sa senemanang eskedyol sa pamilya. (Deut. 6:6, 7; Heb. 10:23-25; w86 11/1 pp. 23-5) Apan, mas pa ang gikinahanglan. Ang usa ka maayong relasyon sa banay maugmad sa dihang ang mga ginikanan magbaton ug lunsayng interes sa espirituwal nga kaayohan sa mga anak. Sa Israel, ang mga ginikanan maoy responsable sa edukasyon ug pagbansay sa ilang mga anak, nga nagtudlo kanila pinaagig pulong ug panig-ingnan. Ang Israelinhon edukasyon nga programa naglakip sa mapuslanong pagbansay alang sa hamtong nga pagkinabuhi, pagtudlo sa pasukaranang pagbasa ug mga kahanas sa pagsulat, ug instruksiyon sa pag-ugmad sa espirituwal nga mga hiyas. Sa pag-edukar sa mga anak, ang pasiugda gihimo maylabot sa pagtudlo kanila sa pagkahadlok kang Jehova, sa Kasugoan, pagtahod sa mga ginikanan ug sa mga tigulang, ug ang importansiya sa pagkamasinundanon.
3 Ang mga ginikanan karon kinahanglang manlimbasog nga magamit ug maayo ang panahon uban sa ilang banay sa kada adlaw. Mahisgotan man ang espirituwal nga mga butang diha sa impormal nga kahimtang, sama sa mga panahon sa pagkaon aron tukoron ang gikinahanglang espirituwal nga mga hiyas diha sa mga anak aron sila makalikay sa mga lit-ag sa kalibotan!—1 Cor. 3:10-15.
PAGPAHIMULOS SA BULUHATONG PAGSANGYAW SA KANATARAN
4 Ang kangaya maoy pagbati nga gipatugbaw pinaagig paglaom. Sa dihang ang usa ka tawo andam alang sa pag-alagad sa kanataran, siya sa husto makadahom sa maayong mga resulta. Busa, ang pangandam mao ang yawi sa malipayong pag-alagad sa kanataran. Ang regular nga pagbansay kon unsa ang isulti ingong pamilya sa dili pa moadto sa pag-alagad sa kanataran magpatukod ug pagsalig.—Itandi ang Tito 3:1b.
5 Sa pagkuyog sa ilang mga anak diha sa ministeryo, ang mga ginikanan makabulig kanila sa pag-ugmad sa personal nga interes sa mga tawo nga gihimo ni Jehova ug ni Jesus ang panig-ingnan. Ang ministeryo usab makabulig kanato sa pag-ugmad sa suod nga relasyon uban ni Jehova. (w81 11/1 pp. 14-20) Ang ubang mga pamilya nagaeskedyol sa bug-os nga mga adlaw sa tingob, nga nagaplano sa maayong lulinghayaw pagkahuman sa pag-alagad sa kanataran. Kini nagatugot ug panahon sa panagsultihanay diha sa relaks nga kahimtang ug nagapahiusa sa mga ginikanan ug mga anak.
6 Mahimong determinado sa pag-ugmad sa gikinahanglang mga kahanas sa komunikasyon aron magpadayon ang suod nga relasyon uban sa inyong mga anak. Ayawg tugoti ang bisan unsa sa pagpugong kaninyo sa paggahin ug gikinahanglang panahon sa paglig-on sa inyong pamilya sa espirituwal nga paagi.—Sal. 127:1; Prov. 24:3.