Pagtagamtam sa Teokratikanhong Panag-ubanay
1 Ang mga Saksi ni Jehova nagatawagay sa usag usa nga “brother” ug “sister.” Kini nagakahulogan ug suod nga panag-uban nga maglungtad gayod taliwala sa tanang mga alagad ni Jehova.
2 Ang terminong “brother” sa literal nagakahulogan ug “anak nga lalaki sa samang mga ginikanan.” Gibati ba nimo ang mga bugkos sa mainit espirituwal nga relasyon uban sa tanan nga nagpahinungod nga mga alagad ni Jehova? Sa unsang paagi atong dugang nga maugmad ang inigsoong gugma uban sa atong Kristohanong mga kaubanan?
DIHA SA MGA TIGOM
3 Gipabilhan sa mga tinun-an ni Jesus ang importansiya sa panagkatigom. (Buh. 2:42, 46; 20:7, 8) Ato usab nga gimahal ang mainit Kristohanong panag-ubanay. (Roma 16:3, 5) Apan, ang ato bang mga pulong diha sa mga tigom nagapakita nga kita sa tiunay nabalaka sa espirituwal nga kaayohan sa atong mga igsoon? Pinaagig atong mga komento sa mga miting, atong mapalambo ang gugma ug di-mahakogong interes sa kaayohan sa uban, nga nagapalig-on sa atong mga igsoon nga magmasiboton sa pag-alagad ug sumbanan sa panggawi.—Heb. 10:24, 25.
4 Adunay daghang kahigayonan alang sa teokratikanhong panag-ubanay sa dili pa ug human sa mga tigom. Gamiton ta gayod kini sa pagpadako pinaagig pag-abiabi sa mga bag-ohan ug pagsinati sa daghan nga atong maarangan. Ang pagpaambit ug mga eksperiyensiya makadugang sa pagpalig-on sa uban.—1 Tes. 5:11, 15.
MAAYONG PANAG-UBAN
5 Ang usa dili makalakaw uban sa Diyos samtang nagapakig-uban kanilang daotan ug sa masakitong katilingban nga nagauyon sa bisan unsa nga gidumtan sa Diyos. Ang Bibliya nagapasidaan: “Ang daotang mga panag-uban makadaot sa mapuslanong pamatasan.” (1 Cor. 15:33) Ang uban basin mahilig sa pagdapit sa kalibotanong mga kaila ug di-magtutuong mga paryente sa sosyal nga mga tigom, nga nagahunahuna nga kini hayan makapalig-on kanila sa pagdawat sa kamatuoran. Apan, kini ba maalamon ug uyon sa Kasulatan?
6 Kita gitambagan nga magmaalamon sa atong mga pakiglabot sa mga tawo sa mga nasod ug sa mga dili magtutuo. (Tan-awang Nobyembre 15, 1988 nga Watchtower, mga panid 15-16.) Nganong batonan ta man gayod ang wala-kinahanglanang sosyal nga kontak sa mga tawo nga nagapalabi sa kalibotanong mga paagi ug dili mga magsisimba ni Jehova? (2 Cor. 6:14, 15) Ang pipila nga nagapasagad sa espirituwal basin mangita niadtong nagasunod sa kalibotanong panghunahuna ug mga paagi inay kay mangita sa panag-uban sa hamtong nga mga Kristohanon nga makaabag kanila nga magmalig-on sa pagtuo. Sila napakyas sa pagkaamgo nga ang pagtambong sa sosyal nga mga tigomtigom uban sa walay-prinsipyo kalibotanong mga tawo makahuyang sa ilang pagtuo ug makadaot kanila.—Itandi ang 2 Tesalonica 3:14, 15.
7 Ang atong mga higala ug mga kaubanan makahimog dulot nga epekto kanato. Busa, pagkamaalamon nga ang pangitaon mao ang panag-uban sa diyosnong mga tawo nga nagahupot kanunay sa suod nga relasyon uban kang Jehova ug kinsa motabang kanato sa pagpadayon nga molakaw diha sa kamatuoran!