Sinatia Pag-ayo ang Imong mga Igsoon

¹ Ang atong pakiglabot uban sa atong isigka-magsisimba nagalangkit ug labaw pa kay sa pagtambong lamang sa mga tigom uban kanila diha sa Kingdom Hall. Kita mga magbubuhat sa kabubut-on sa Diyos, ug kana magadala kanato ngadto sa usa ka espirituwal nga pakiglabot kang Jesus. (Mar. 3:34, 35) Kana, sa baylo, magapakiglabot kanato ngadto sa usa ka espirituwal nga pamilya uban sa atong kaigsoonan sa Kristohanong kongregasyon, kang kinsa kita gisugo sa paghigugma. (Juan 13:35) Busa, ingong “mga sakop sa panimalay sa Diyos,” kinahanglan kitang maningkamot sa pagsinati pag-ayo sa usag usa.​—Efe. 2:19.

² Ilha ang Imong mga Igsoon sa Ngalan: Nahibaloan ba nimo ang mga ngalan sa tanan diha sa inyong Pagtuon sa Libro sa Kongregasyon? Sagad ang grupo gamay ra, nga magpasayon sa pagkat-on sa mga ngalan sa kadaghanang nanambong. Kon dili gani nimo mailhan bisan ang ilang mga ngalan, makaingon ka ba nga nasinati ka nila pag-ayo?

³ Komusta na man ang pagkaila sa uban, lakip na sa mga kabataan, nga nagatambong sa mga tigom sa Kingdom Hall? Hayan kita makiling sa pagpakig-uban lamang sa pipila ka higala. Samtang dili man sayop nga magkalipay sa pagpakig-uban sa tinong mga tawo, dili gayod nato buot nga ilimite ang mainitong mga pagtimbaya ug panaghisgot sa pipila lamang. Kinahanglan nga kita “magpasangkad,” nga manlimbasog sa pagsinati pag-ayo sa atong mga igsoong lalaki ug babaye.​—2 Cor. 6:11-13.

⁴ Ang mga igsoong lalaki nga nagadumala sa mga tigom angay nga mosulay sa pag-ila sa mga ngalan sa tanang nanambong. Ang pagtawag sa matag usa pinaagig ngalan gikan sa plataporma nagapakita nga gipabilhan ang ilang mga komento, ug makatabang usab kini sa uban sa pagkaila sa ilang mga ngalan. Hinuon, anaay mga bag-ohan kanunay o mga bisita sa mamiminaw, nga magpalisod sa pag-ila sa matag ngalan. Bisan pa niana, ang mapinadayonon sinserong paningkamot makapadasig sa uban.​—Roma 1:11, 12.

⁵ Manguna sa Pagsinati Pag-ayo: Ang nagapanawng mga magtatan-aw sagad makahimo sa pagsinati pag-ayo sa daghang igsoon. Sa unsang paagi gihimo nila kana? Sa tulo ka paagi: (1) Sila makanunayong nakig-uban kanila sa pag-alagad sa kanataran; (2) sila nagadawat ug mga pagdapit sa pagduaw kanila sa ilang mga balay; ug (3) ilang ginatimbaya ang mga hamtong ug kabataan diha sa mga tigom.

⁶ Nakita ba nimo ang mga paagi nga magpasangkad ug labi pang makaila sa imong mga igsoon? Kita makadapit sa uban sa pagkuyog kanato sa pagsangyaw. Ang pagpamalaybalay, paghimog mga balikduaw, pag-adto sa mga pagtuon sa Bibliya, o pagsangyaw sa kadalanan maoy mga ekselenteng mga paagi nga makailaila. Maayo usab ang pagdapit sa uban sa imong balay. Ang pagduol sa mga bag-ohan o niadtong mga maulawon makapalig-on sa matag usa.​—Buh. 20:35; 1 Tes. 5:11.

⁷ Si Pablo nakaila pag-ayo sa iyang mga igsoon. Ang iyang personal nga paghisgot sa daghan pinaagig ngalan diha sa iyang mga sulat maoy pamatuod sa iyang interes kanila ug sa iyang tiunay nga gugma alang kanila. (1 Tes. 2:17; 2 Tim. 4:19, 20) Ang atong mga panlimbasog sa pagsinati pag-ayo sa atong mga igsoon magakahulogan ug mga panalangin alang kanatong tanan.