Sinatia ang Imong mga Igsoon

¹ Gihubit sa Bibliya ang tinuod nga higala ingong tawo nga motapot nga mas suod kay sa usa ka igsoon, nga magpabilin diha sa iyang gugma ug pagkamaunongon, ug motabang sa iyang kauban sa panahon sa kalisdanan. (Prov. 17:17; 18:24) Dili kita mahutdan sa maong mga higala diha sa kongregasyon kon kita manlimbasog sa pagsinati ug paghigugma sa usag usa.​—Juan 13:35.

² Ang maayong mga kahigayonan sa pagsinati sa atong mga igsoon mabatonan man sa dili pa ug pagkatapos sa mga tigom. Nganong dili moabot nga sayo ug magpabiling dugaydugay pagkahuman aron imong mapahimuslan ang mainiton ug makapadasig nga panag-ubanay? Duola ang lainlaing mga igsoon nga ikaestorya, lakip ang mga gulanggulang nga may kasinatian ug mga batabata o mga maulawon.

³ Sugbi ang mga Panaghisgot: Buhata ang labaw pa sa pahapyaw nga pagtimbaya sa imong mga igsoon. Makasugod ka ug panaghisgot pinaagig pagpaambit ug kasinatian sa ministeryo sa kanataran, usa ka punto nga makapainteres diha sa usa ka bag-ong magasin, o komento bahin sa tigom nga bag-o pang natapos. Dako ang imong makat-onan bahin sa imong mga igsoon pinaagig maayong mamiminaw, nga magdasig kanila sa pagsulti bahin sa ilang mga kasinatian ug sa mga butang nga ilang nakat-onan. Ang pagpangutana lamang kon sa unsang paagi ang usa nakaila kang Jehova mahimong magbutyag na ug daghan. Ang pipila nakasinatig makapalig-on-pagtuo nga mga kasinatian sa ilang mga kinabuhi, samtang ang uban nagaantos ug mga kahimtang bisan karon nga hayan malisod palandongon sa daghan. Ang pagkaamgo niini motabang kanato, ingong tinuod nga mga higala, nga magmabination ug masanongon sa mga panginahanglan sa uban.

⁴ Higalaa ang Usag Usa: Human sa kamatayon sa iyang anak, usa ka sister nalisdan sa pagkanta sa mga awit sa Gingharian nga naghisgot bahin sa pagkabanhaw. Siya miingon: “Usa ka higayon, usa ka sister nga naglingkod sa atbang nga kilid sa agianan nakakita nako nga naghilak. Miduol siya, miagbay kanako, ug miawit sa nahibilin sa awit uban kanako. Akong gibati ang tugob nga gugma alang sa mga igsoong lalaki ug babaye ug malipayon kaayo nga kami mitambong sa mga tigom, nga nakaamgo nga atua didto ang among tabang, didto sa Kingdom Hall.” Angay kitang makighigala sa atong mga igsoon pinaagi sa paghupay kanila sa dihang kini gikinahanglan ug pagdasig sa tanang panahon.​—Heb. 10:24, 25.

⁵ Samtang kining daang kalibotan nahimong mas pa gayong madaogdaogon, kita magdeterminado nga sination pa ug maayo ang atong mga igsoon. Kining pagbayloanay ug tiunay nga pagdasig mapamatud-an nga mahimong panalangin alang sa tanan.​—Roma 1:11, 12.