Mga Batan-on, Sangyaw nga Epektibo sa Eskuwelahan
1 Ang pag-alagad kang Jehova samtang ikaw batan-on maoy maayo kaayong butang. (Eccl. 12:1) Kamong mga batan-on aduna ing linaing higayon sa pagpaambit sa kamtuoran uban sa inyong mga klasmet ug mga magtutudlo, usa ka teritoryo nga sagad di-maabot sa mga hamtong. Kamo ba alisto sa pagpamatuod sa impormal nga paagi sa eskuwelahan?
2 Nganong nakaplagan sa pipila nga malisod ang pagsangyaw sa eskuwelahan? Tungod ba sa kahadlok kon unsay isulti sa ilang mga klasmet? (Itandi ang Marcos 8:38.) Hayan nakasugamak ka sa maong kahadlok sa una mong pagduyog sa pamalaybalay. Apan, kon imong pabilhan ang panginahanglan nga nabatonan sa ubang mga batan-on alang sa kamatuoran, ikaw mangita man ug mga higayon sa pagpaambit sa balita sa Gingharian ngadto kanila. (Mat. 9:36-38; Luc. 12:8, 9) Sa pagbuhat niini nga epektibo nagakinahanglan ug abanteng pangandam sa imong bahin.
KON UNSAON SA PAGHIMO NIANA
3 Usa ka batan-on mibasa sa iyang librong Bible Stories sa eskuwelahan sa kada adlaw sulod sa 15-minuto nga pahulay. Sa nangutana ang usa ka klasmet bahin sa maong libro, siya gidapit sa paglingkod ug duyog nilang gitagad ang usa ka estorya. Human niana siya maikagon nang mitagad sa sunod nga estorya. Iyang gitug-anan ang iyang inahan sa iyang nakat-onan. Ingong resulta, ang iyang inahan misugod sa pagtuon sa Bibliya ug mitambong sa mga tigom uban sa iyang anak nga babaye.
4 Nganong dili manlimbasog ug mosulti ngadto sa uban bahin sa librong Bible Stories? Pananglitan, ikaw moingon: “Kining basahona nagapakita sa paagi sa Diyos sa pagpanalipod sa iyang matinumanong mga alagad. [Paklia ngadto sa estorya 79.] Si Jehova mipanalipod kang Daniel sa lungib sa liyon. Sa hunahuna mo siya ba moluwas sa iyang katawhan pinaagig pagtapos sa pagkadaotan sa umaabot?” Dayon imong mapakli ngadto sa estorya 114 aron ipakita nga si Jehova molaglag sa pagkadaotan ug luwason ang iyang katawhan.
5 Mahimong ibutang mo ang librong Creation ibabaw sa imong talad-sulatanan aron ang uban makamatikod niana. O imong mapakli ngadto sa hulagway sa panid 83 ug pangutan-on ang usa ka klasmet o magtutudlo: “Sa hunahuna mo ingon ba niini tan-awon ang atong mga katigulangan?” Dayon imong mahisgotan ang impormasyon sa panid 89, mga parapo 19 ug 20. Ang pagkamakisayron sa uban mahimong mapukaw kon sila pakitaan sa mga ulohan sa mga kapitulo nga natala sa panid 5. Kon sila magpakitag interes, hayan imong ikapasundayag kon sa unsang paagi matun-an ang libro pinaagig pagbasa sa usa ka parapo ug pagsukna sa pangutana sa ubos sa panid.
6 Usa ka tin-edyer nga magmamantala sa hayskul mihimo sa iyang tumong nga makasugod ug usa ka pagtuon sa Bibliya. Usa ka klasmet adunay pipila ka suliran uban sa iyang mga ginikanan ug mitug-an sa Saksing batan-ong babaye bahin niini. Ang batan-ong magmamantala mipakita kaniya sa tukmang “Young People Ask . . .” nga artikulo gikan sa Awake! Ang maong klasmet nasumeter ug nangutanag dugang. Unya ang batan-ong magmamantala mipahiluna ug librong Live Forever kaniya, nga mipatin-aw nga kini makatabang sa pagtubag sa iyang mga pangutana, ug nasugdan ang usa ka pagtuon sa Bibliya.
7 Aron mahimong saksi nga dapig kang Jehova, kinahanglan nga kita mosulti bahin kaniya. (Isa. 43:10-12) Ikaw ba tim-os nga naninguha sa pagpaambit sa kamatuoran uban sa mga klasmet o mga magtutudlo sa imong eskuwelahan? Andama ang makapainteres nga mga ulohan nga hisgotan uban kanila. Panikaysikay. Hangyoa ang imong mga ginikanan o uban pa sa pag-abag kanimo. Pag-ampo kang Jehova sa pagpanalangin sa imong mga panlimbasog, maingon nga siya gayod nagpanalangin niadtong ubang mga batan-ong mga magmamantala kinsa epektibong mga saksi dapig kang Jehova diha sa eskuwelahan.—Col. 1:9, 10.