Padayon sa Pagsulti Maylabot sa mga Butang nga Imong Nakita ug Nadungog
1 Bisan sa dihang gihulga sa mga pagbukbok ug pagkabilanggo, ang mga apostol mipahayag ngadto sa ilang mga magsusupak: “Dili kami makahunong sa pagsulti maylabot sa mga butang nga among nakita ug nadungog.” (Buh. 4:20) Ilang gipabilhan ang kabililhon sa mga buluhaton ug mga pagtulon-an ni Jesus.
2 Ang maayong balita bahin kang Jesus ug sa iyang Gingharian maoy sama ka hinungdanon alang sa katawhan karon maingon sa kaniadto. Busa, kinahanglang sakmiton ta ang matag higayon sa pagsulti maylabot sa atong nakita ug nadungog gikan sa Pulong sa Diyos.
3 Mga Batan-on, Sulti sa Eskuwelahan: Daghang batan-ong Saksi nagapahimulos sa mga kahigayonan sa pagsangyaw ngadto sa mga klasmet ug mga magtutudlo. Usa ka batan-ong Saksi kinsa kanunayng nanglimbasog nga pabiling alisto sa bag-ong mga ulohan nga mahisgotan taliwala sa mga klasmet mipahimulos sa usa ka hitabo diha sa eskuwelahan ug miduol sa mga magtutudlo ug mga klasmet uban sa tukmang basahon. Ang resulta? Siya nakapahilunag 35 ka libro sa usa ka adlaw! Sanglit daghang tawo karon ang nabalaka bahin sa kalinaw, dili ba maayong masayod ang mga klasmet ug mga magtutudlo kon sa unsang paagi si Jesus ingong nagamandong Hari makasulbad sa mga suliran sa kalibotan?—Itandi ang Lucas 2:14.
4 Kon ang paglikay mo sa pagpakig-ambit sa mga pagsaulog sa Pasko sa miaging Disyembre nakapatunghag mga pangutana, makaingon ka:
◼ “Wala ko makig-ambit sa mga pangilin sa Pasko tungod kay kanang mga kasaulogana wala magapasidungog kang Jesus ingong mao lamang ang paagi sa atong kaluwasan ug mao lamang ang usa nga magatapos sa gubat. [Kutloa o basahang Buhat 4:12.] Si Jesus dili na usa ka bata apan usa ka nagamandong Hari. Kining libroha, Ang Labing Bantogang Tawo nga Nabuhi Sukad, nagahisgot sa tanang pagtulon-an ni Jesus ug mga milagro ug nagapakita kon sa unsang paagi iyang taposon ang pag-antos sa tawo.” Unya ipakitang ilustrasyon diha sa kapitulo 133, ug basaha ang ikaduhang parapo sa sunod nga panid. Ipakita ang ubang mga puntos nga gibati mong makadani sa tawo ug itanyag ang libro.
5 Sulti Ngadto sa Kaubanan sa Trabaho: Ang usa ka igsoong lalaki nakapahilunag 63 ka libro pinaagi lamang sa pagbutang ug usa ka kopya sa librong Labing Bantogang Tawo diha sa iyang lamesa. Ang madanihong hitsura niini ug ang ulohan mismo makaaghat ug mga pangutana. Sa yano makasukna ka sa usa ka kauban sa trabaho: “Kinsa man ang imong ikaingon nga labing bantogang tawo nga nabuhi sukad?” Dayon dugangi: “Kining libroha nagakobre sa detalye sa tibuok kinabuhi ni Jesus, nagahisgot sa matag diskurso nga iyang gihatag, nagatubag sa mga pangutana nga gisukna sa daghan maylabot sa iyang mga milagro, ug nagahatag ug uban pang makaiikag nga mga detalye. Kini maoy bug-os nga pagrepaso sa gitudlo sa Bibliya bahin kang Jesus ug nagapamatuod nga walay pagduhaduha nga si Jesu-Kristo mao gayod ang labing bantogang tawo nga nabuhi sukad.” Unya ipunting ngadto sa komento ni Napoléon bahin kang Jesus ingon sa gikutlo sa ikatulong parapo sa pasiuna niining libroha.
6 Ang susamang mga kahigayonan motungha nga makapamatuod ngadto sa mga silingan o di-magtutuong mga partidos. Pag-ampo nga si Jehova magahatag kanimog kaisog ug katakos sa pagsulti diha sa tukmang panahon. (Buh. 4:29, 31) Aduna pa bay mas maayong kasinatian nga atong mabatonan kay sa pagtabang sa usa ka klasmet, kauban sa trabaho, silingan, o paryente nga makasubay sa dalan sa walay kataposang kinabuhi?—Juan 14:6.