Abanteng Pagplano sa Septiyembre
1 Sa pangandam-daan sa pagsugod sa bag-ong tuig sa Septiyembre, maayo alang kanatong tanan sa pagtagad kon unsa ang atong nalampos niining miaging tuig ug kon unsa ang atong tinguha nga palamposon sa sunod tuig. Ingon sa gisulti ni apostol Pablo: “Ngadto sa gidak-on nga kita nag-uswag, padayon kitang magalakaw nga mahapsay niini nga naandan.”—Filip. 3:16.
2 Daghang batan-on sa eskuwelahan naghimo nga ilang tumong sa pagpamatuod nga mas pa ngadto sa ilang mga isigkaestudyante ug nagapanlimbasog sa pagsugod ug pagtuon sa Bibliya. Kamo nga mga ginikanan ug kansang mga anak anaa sa eskuwelahan makakaplag nga ang Septiyembre maoy maayong bulan sa pag-oksilyare payunir. Ibutang sa hunahuna nga ang Septiyembre niining tuiga adunay lima ka Sabado ug lima ka Domingo, busa daghan gayod ang makahimo sa katabang nga pagpayunir niining bulana.
3 Daghan kinsa malamposong nakaoksilyare payunir sa di pa dugayng mga bulan buot nga motagad sa pag-aplay ingong mga regular payunir sugod sa Septiyembre 1 kon ang ilang mga kahimtang motugot. Pagkamaayo kaayong paagi sa pagsugod sa bag-ong tuig sa pag-alagad!
4 Alang kanilang nagatungha sa eskuwelahan, inyo bang ieskedyol ang panahon alang sa teokratikanhong pagtuon maingon man sa inyong ‘homework’? Kini motabang kaninyo sa pagkahimong takos alang sa karera sa bug-os-panahong pag-alagad ug mobulig kaninyo sa pagpabilin diha sa dalan paingon sa kinabuhi. (Isa. 30:21) Ang bililhong panahon mawala sa pagtan-awg telebisyon. Nganong di gamiton ang maong panahon alang sa teokratikanhong mga kalihokan?—1 Tim. 4:15.
5 Ayawg tugoti nga labyan ka sa panahon samag mga panganod sa kahitas-an, apan planoha ang imong panahon ug ipahimutang ang mga tumong sa paggamit sa imong panahon diha sa paagi nga magpasidungog kang Jehova.—Eccl. 11:4.