Pag-una sa Intereses sa Gingharian

¹ Pagkamakadani kaayo ang pagpasundayag ni Jesus nga ang Gingharian giuna niya sa iyang kinabuhi! (Mat. 6:33) Sa gihusay atubangan ni Pilato, siya nagpabiling malig-on. (Juan 18:35, 37) Oo, bisan siya gibitay nga himalatyon sa usa ka kahoy, iyang gipasiugda ang paglaom sa Gingharian, nga miingon sa mamumuhat sa daotan: “Ikaw mahiuban kanako sa Paraiso.”​—Luc. 23:43.

PAGBANABANA SA BILI

² Nganong giisip ni Jesus ang Gingharian nga importante kaayo? Tungod kay siya nasayod nga ang Gingharian sa Diyos magpaposible alang sa kabubut-on sa Diyos nga matuman ibabaw sa yuta ingon sa langit.

³ Ang pagsundog kang Jesus ingong tigpaluyo sa Gingharian sa Diyos nagalakip sa pagpas-an ug “kahoy sa pagsakit” ug sa tanan nga nalambigit niini. Ang ‘pagbanabana sa bili’ nagakahulogan nga kita gayod andam sa pag-ingon ug “adyos” sa materyal nga mga kabtangan kon kini makababag sa atong pag-alagad sa Diyos. (Luc. 14:27, 28, 33) Ang pagkab-ot sa kinabuhing walay kataposan ubos sa pagmando sa Gingharian takos sa bisan unsang bili.​—Mat. 13:44-46.

AYAWG KABALAKA

⁴ Ang paglabay sa 19 ka siglo wala magpakunhod sa panginahanglang unahon pagpangita ang intereses sa Gingharian sa atong kinabuhi. Si Jesus mipatin-aw: “Walay tawo nga mahimong ulipon sa duha ka agalon . . . Dili kamo mahimong ulipon sa Diyos ug sa mga Bahandi. . . . Ayawg kabalaka bahin sa inyong mga kalag kon unsa ang inyong pagakan-on o kon unsa ang inyong pagaimnon, o bahin sa inyong mga lawas kon unsa ang inyong igasapot.” (Mat. 6:24, 25) Kita ba mabalak-on bahin sa atong mga kalag? O kita ba adunay igong pagtuo sa pagpangita una sa Gingharian, nga nagasalig nga kining tanang ubang mga butang igadugang ra?

⁵ Ang pipila sa kaigsoonan nagdumilig dako-suweldong mga trabaho tungod kay ang eskedyol sa trabaho makabalda sa teokratikanhong mga kalihokan. Ang uban mibalhin ug trabaho sa dihang adunay sumpaki niana sa mga prinsipyo sa Bibliya. Ang pipila ka amo naghimog mga pagtugot ngadto sa mga igsoon kay sila mahinangpon, kasaligan man nga mga trabahante. (Col. 3:23, 24) Sa pagkamatuod, ang kongregasyon mapalig-on kon ang mga ansiyano, ministeryal nga mga alagad, ug mga payunir nagapasunod ug maayong panig-ingnan sa pagpangita una sa Gingharian.

PAGPLANO KARON

⁶ Ang uban kaninyong mga batan-on sa dili madugay mahuman na sa pag-eskuwela. Nagahimo ba kamog mga plano alang sa teokratikanhong karera? Nagaplano ba kamo nga motrabaho una nga bug-os panahon antes magpayunir? Dalayegon man nga planohon mo ang pagpayunir sa umaabot. Apan kon ang Gingharian una gayod sa imong kinabuhi, nganong dili magpayunir una? Kon unahon ang sekular nga trabaho, anaa ang kapeligrohan nga mabug-atan ang imong kasingkasing uban sa mga kabalaka nga magpaluya sa pagpayunir.​—Mat. 6:27, 34; Luc. 21:34.

⁷ Inay kay madaldal sa mga panglila sa kalibotan, pagkamaayo gayod sa pagsalig kang Jehova, kinsa nahibalo sa atong mga panginahanglan ug nagsaad nga itagana kana! Sa pag-una sa intereses sa Gingharian, ang atong mga kinabuhi makabaton ug tinuod nga katuyoan.​—Mat. 6:32; 1 Tim. 6:17-19.