Tabangi ang mga Batan-on sa Pagsalindot sa Katalagman
1 Gusto ni Jehova nga mapahimuslan ta ang kinabuhi. Sa maong tumong, siya nagtugot kanato ug igong kagawasan aron atong mapangagpas ang mga tinguha sa atong kasingkasing. Apan uban sa maong kagawasan, si Jehova sa husto nagahimo natong maoy manubag sa atong pagabuhaton.—Eccl. 11:9.
2 Sanglit kay kita di-hingpit, sa unsang paagi ikasalindot ta ang katalagman? (Eccl. 11:10) Posible ba bisan sa walay kasinatian nga batan-on sa paglikay sa kalamidad? Oo. Si Jehova sa mahigugmaon nagtagana ug tambag ug giya sa pag-abag sa mga batan-on ug mga tigulang sa paglingkawas latas sa dagkong mga suliran niining kataposang mga adlaw.—Sal. 19:7; 119:9; 2 Tim. 3:1.
KAAKOHAN SA MGA GINIKANAN
3 Sa moabot ang suliran, ang mga batan-on nagakinahanglan sa masaligang mga ginikanan kinsa makahimo sa ‘pag-isa sa nahuyhoy nga mga kamot aron ang bakol dili malisa, apan hinuon magmaayo.’ (Heb. 12:12, 13) Sa pagtabang sa ilang mga anak, ang mga ginikanan kinahanglang sa pupanahon magpasig-uli sa panghunahuna sa ilang mga anak. Kini nagakinahanglan sa pasensiya ug kahanas.
4 Ang mga ginikanan dili sa bug-os makapanalipod sa ilang mga anak gikan sa daotang mga impluwensiya. Apan sa unsang paagi ang hunahuna sa bata mahimong mapalig-on? Pinaagig ‘pagmatuto kaniya diha sa nagatultol-hunahuna nga iya ni Jehova.’ (Efe. 6:4) Kini nagalangkit sa pagtuon sa pamilya, espirituwal ug moral nga giya, haom nga disiplina, ug maayong ginikananong panig-ingnan.
5 Ang librong Mga Pangutanang Gisukna sa mga Batan-on—Mga Tubag nga Mosaler gidesinyo sa pagbulig sa mga batan-on. Kini makaabag usab sa mga ginikanan sa pagpangatarongan uban sa ilang mga anak maylabot sa hustong mga sukdanan. Kon ang kasugoan sa Diyos masilsil sa hunahuna ug kasingkasing sa bata, kini mahimong nagatultol nga impluwensiya. Ang panaghisgot sa banay niining bag-ong basahon magpalig-on sa mga batan-on sa pagsalindot sa katalagman.
6 Sa giluwatan kining libroha didto sa mga kombensiyon, ang mga ginikanan gipalig-on nga gamiton kini ingong basihanan sa panaghisgot sa pamilya. Sa kataposan sa matag kapitulo adunay “Mga Pangutana nga Mahisgotan.” Wala kini himoa alang sa parapo-por-parapo nga pagtuon. Ang kada pangutana nagakobre sa usa o mas pang mga sub-ulohan. Ang pipila ka ulo sa pamilya mahimong magpalabi nga tagdon ang mga pangutana human sa pagbasa sa bug-os nga kapitulo. Ang uban basin mosukna sa mga pangutana samtang ang materyal ubos sa katumbas nga mga sub-ulohan ginabasa.
PAGBULIG SA MGA BATAN-ON SA ATONG TERITORYO
7 Daghang batan-on sa atong teritoryo adunay mga pangutana nga sama nianang gihisgotan niining bag-ong libro. Busa sa Hunyo atong itanyag ang librong Batan-on Nangutana diha sa kanataran. Hayan buot mong mosulti sama niining mosunod:
8 “Atong sagad gihunahuna nga ang pagkabatan-on mao ang labing malipayong yugto sa atong kinabuhi. Apan ikasubo nga makita tang daghang batan-on karon nga dili malipayon. Di ba mao? [Tugoting motubag.] Ang nagakausab nga mga sukdanan nakapatunghag nalibog nga kalibotan uban sa daghang gumonhap nga nagaapektar sa mga batan-on ug naghikaw kanila sa kalipay. Diin man nila makaplagi ang kasaligang pagtultol? [Tugoting mokomento.] Matikdi ang girekomendar sa Bibliya sa Salmo 119:9. [Basaha.] Gipasiugda sa Bibliya ang ginikananong responsabilidad sa pagtudlo kon unsa ang matarong ug mihatag niini nga instruksiyon diha sa Proverbio 1:8: [Basaha.] Uyon niini, ang basahong Mga Pangutanang Gisukna sa mga Batan-on—Mga Tubag nga Mosaler maoy puno sa mapuslanong giya nga gipasukad sa Bibliya. Aduna usab kini ing tinuod-kinabuhi nga mga eksperiyensiya nga moabag sa mga batan-on sa pagsagubang sa umaabot nga malamposon. [Ipunting sa pipila ka kapitulong mga ulohan nga magpahaling sa interes.] Mapahimuslan mo kining basahona sa amot nga ₱21.00.”
9 Tino nga kining bag-ong libro mopunting sa daghan ngadto sa tinubdan sa way-limite nga kaalam—ang Bibliya. Pagkabililhon nga himan kini sa pagtultol sa mga batan-on ngadto sa bug-os nga kinabuhi karon ug sa seguradong ugma-damlag!—Eccl. 12:1.